انزل يا جميل على الساحة واتمختر كده بالراحة.. أنا قد عنيك مع إنى نظرة عينيك دباحة.. مالك طالع بالعالى يا مالى قلبى ليالى.. أمرك يا جميل! أعتقد مفيش أغنية عيد ميلاد اشتهرت وانتشرت زى أغنية الفنان وليد توفيق.. حققت شهرة كبيرة فى الوطن العربى، وما زالت ليها كيانها فى مناسبات أعياد الميلاد.. غالبا فى حفلات عيد الميلاد هى أكتر غنوة بتشتغل فى الدى جى، والكل بيفرح بيها ويهيص معاها، وبتكون معاها أجواء الاحتفال بأعياد الميلاد مميزة جدا ومبهجة جدا جدا!!

البنات والسيدات فى مصر والوطن العربى فعلا ستات شاطرين جدا فى مهارات الطبخ والحلويات بكل أنواعها من الشرق للغرب، وبارعات فى عمل حتى الأصناف الغربية اللى من مطابخ عالمية، مفيش حدا يقدر يقف قدام الست العربية فى حبها للمطبخ وشغل البيت، ومحدش يقدر يقاوم حلاوة وصفاتها أو عمايل ايديها.. ومن الوصفات اللى بتبدع فيها عمل تورتة عيد الميلاد.. طعمها طبعا من عمايل ايدينا بيكون أحلى من لو اشتريناها من بره.. والأحلى إن قبل الطعم بيكون فى إحساس رهيب بيدخل قلوبنا قبل ما التورتة تدخل معدتنا.. هو إحساس الحب والاهتمام من ست البيت سواء كانت الأم أو الأخت أو الابنة أو الزوجة، اهتمامها بإنها تعمل كل حاجة بايديها عشان تسعد كل اللى حواليها!!

النهاردة بنقدم لكم وصفة تورتة الشيكولاتة، ومين يقدر يقاومها.. حب تورتة الشيكولاتة تقريبا عليه إجماع من أغلب الناس.. بس هى تنزل على سفرة الاحتفال، وتتنسف فى الحال.. هنقدم لكم الوصفة بطريقة سهلة تقدرى تنفذيها بنفسك فى البيت بكل سهولة.

طريقة تحضير تورتة الشيكولاتة:

المكونات:

2 ونصف كوب دقيق (طحين) متعدد الأغراض

كوب وربع سكر أبيض

كورب وربع قشدة

1/2 كوب زيت ذرة

5 بيضات

معلقة طعام بيكينج بودر

ملعقة شاى فانيليا سائلة

للتزيين:

1/2 كوب كاكاو خام

كوب لبن

كوب سكر

كوب زيت

كيس كابتشينو بالبندق

كيس فانيلا

طريقة التحضير.

نخلط المواد الجافة مع بعضها البعض.

ونخلط المواد السائلة فى الخلاط ننزل بيها على الدقيق نقلب بالراحة، نضيف الزيت والقشدة فى النهاية ونمزج جيدا ثم نسكب الخليط فى صينية كبيرة وندخله الفرن على درجة حرارة 180°م لمدة حوالى 25 دقيقة بعدها نفتح الفرن ونختبر تسوية الكيكة بخلة أسنان، فإن لم تكن استوت تماما نقوم بتخفيض حرارة الفرن عليها إلى 160 °م لمدة من 5- 10 دقائق.

لعمل صوص الشيكولاتة الثقيل:

نضرب كوب زيت كوب سكر كوب لبن نص كوب كاكاو خام كيس فانيلا كيس كابتشينو بالبندق جيدا إلى أن يصبح ثقيلا في السمك.

بعد أن تكون الكيكة استوت وصارت باردة، نقوم بفرد صوص الشيكولاتة عليها من فوق ومن الجوانب ونعمل على رص البسكويت على الأحرف وفوق والكريز بينهم وفى المنتصف الشوكوبون.

نقوم بعملية بشر البسكويت على السطح، وتقدم.

شكرا للشيف سارة على تقديم الوصفة والصورة ومشاركتها مع جوا الحلة