فى أفكار كده عبقرية فى نفسها، المخبوزات بصفة عامة فكرة عبقرية وحل مثالى للجوع وفى كل أوقات اليوم، وفى كل فصول السنة وكمان لكل الأعمار والأذواق. احنا نقدر بعجينة بسيطة وتكلفتها قليلة نعمل وصفات كتيرة جدا بس نغير فى حاجتين اتنين بس، فى شكل العجينة وفى الحشو بتاعها، والنهاردة بنحاول ننفذ ده مع أسهل وصفة لعمل الفطاير التركية، يعنى هنعمل معاكم مخبوزات كشكل بتكون جذابة جدا للأطفال والكبار كمان، وبتكون حلوة تقدرى تحشيها بالحشوة اللى على مزاجك!

مكونات الفطاير التركية بسيطة ومتوفرة فى كل بيت ومش مكلفة إطلاقا، وطبعا المكون الرئيسى فيها هو الدقيق أو الطحين زى ما بيقول عليه أهل الشام والخليج، وبيبقى معاه حاجات تانية هنعرفها بالتفصيل فى الوصفة بتاعتنا النهاردة، وكلها فى متناول الجميع. المخبوزات من مميزاتها إنها بتتقدم فى أى وقت ومع أى مشروب، وبقت تلاقى انتشار كبير جدا فى حفلات أعياد الميلاد، وحفلات التجمع والتعارف فى المدارس، تقدرى تعمليها لأولادك وأصدقائهم فى البيت بكل سهولة زى ما هنتعلم دلوقتى.

طريقة تحضير فطائر تركية.

المكونات:

للعجينة:

2 كوب دقيق

ملعقة طعام سكر

1/2 كوب زيت

كوب لبن بدرجة حرارة الغرفة

ملعقة طعام خميرة فورية (دريم الحمراء أو Pacmaya)

بيضة واحدة

للحشوة والتزيين:

رومى مدخن

جبن موتزاريلا مبشورة Mozzarella

جبنة شيدر مبشورة

شرائح زيتون (أسود وأخضر) مخلية من البذوز

زعتر جاف

حبة البركة

طريقة التحضير.

ف بوله هنحط معلقه خميرة ومعلقه سكر وكوب لبن دافي أو بحرارة الغرفة ونص كوب زيت وبيضه ونقلب بشوكة وبعدين ننزل كوبيتين دقيق ممكن يبقى اقل شويه او اكتر شويه هنحط كوبايه الاول ونقلب براحه ونحط التانيه لو احتاجتي زودي 
هنعجن كويس ونغطي الطبق ونسيبه يخمر.

العجينه خمرت

هنحضر طبق فيه حبة زيت صغيرين وطبق تاني فيه صفار بيضه عليه حبه ملح ناخد العجين نفرده دايره ونرش زيت هتلاقي العجين بيتفرد بسهوله جدااا من غير نشابه حتى 
نطبق الدايره تبقى نص ونطبق تاني هتبى ربع دايره وبلاش نضغط. 
رصيهم ف صينيه مدهون زيت أو عليها ورق زبدة ونغطيها بفوطه ساعة وندهن الوش بصفار البيضه ونرش سمسم .. حبه البركه .. زعتر او ملح خشن ونحطها على ١٨٠° م لحد ما تاخد اللون الدهبى الجميل.

هتلاقيها بتتفتح زي الفينو ممكن نحطلها شيدر ورومي وتركي مدخن بجد وهميه

** ملحوظة مهمة:

أهم حاجه ف المعجنات عموما اول ماتطلعيها من الفرن تغطي الصينية بفوطه لحد ماتهدي هتلاقيها طريه اوووووي.. وبالهنا.

شكرا للشف بسمة على الوصفة والصورة ومشاركتها مع جوا الحلة.

انضموا لجروبنا عشان نشارك سوا وصفات الأكلات وتكونوا جزء من عالمنا.