ساعات كتير بنكون محتاجين نفرح أو نفرح حد بنحبه.. بس الميزانية بتبقى محدودة ومتسمحش إننا نشترى الحاجة اللى نفسنا فيها من بره.. لكن لما تلاقى وصفة سهلة وحلوة وتقدرى تنفذيها بنفسك فى البيت وتاخدى منها نتيجة مضمونة.. أكيد يبقى لاقيتى معانا الحل المثال.. اعملى أحلى تورتة لأغلى الناس بأقل التكاليف وبطريقة سهلة.. والنتيجة هايلة.. وده اللى هنتعلمه مع بعض فى وصفة طريقة تحضير تورتة الشيكولاتة والكريمة بالفواكه!!

البنات والسيدات فى مصر والوطن العربى فعلا ستات شاطرين جدا فى مهارات الطبخ والحلويات بكل أنواعها من الشرق للغرب، وبارعات فى عمل حتى الأصناف الغربية اللى من مطابخ عالمية، مفيش حدا يقدر يقف قدام الست العربية فى حبها للمطبخ وشغل البيت، ومحدش يقدر يقاوم حلاوة وصفاتها أو عمايل ايديها.. ومن الوصفات اللى بتبدع فيها عمل تورتة عيد الميلاد.. طعمها طبعا من عمايل ايدينا بيكون أحلى من لو اشتريناها من بره.. والأحلى إن قبل الطعم بيكون فى إحساس رهيب بيدخل قلوبنا قبل ما التورتة تدخل معدتنا.. هو إحساس الحب والاهتمام من ست البيت سواء كانت الأم أو الأخت أو الابنة أو الزوجة، اهتمامها بإنها تعمل كل حاجة بايديها عشان تسعد كل اللى حواليها!!

النهاردة بنقدم لكم وصفة تورتة الشيكولاتة والكريمة بالفواكه، ومين يقدر يقاومها.. التورتة النصفين دى بترضى جميع الأطراف.. وتقريبا عليها إجماع من أغلب الناس.. بس هى تنزل على سفرة الاحتفال، وتتنسف فى الحال.. هنقدم لكم الوصفة بطريقة سهلة تقدرى تنفذيها بنفسك فى البيت ونتيجتها مضمونة وعن تجربة.

طريقة تحضير تورتة الشيكولاتة والكريمة بالفواكه:

المكونات:

لعمل دقيق سبونج:

1 ونصف كوب دقيق أبيض (طحين) منخول

كوب ونصف سكر أبيض مطحون

8 بيضات

معلقة طعام بيكينج بودر

ملعقة شاى فانيليا سائلة

للتزيين:

مكسرات

فواكه

كريمة

شيكولاتة

طريقة التحضير.

يضرب البيض مع السكر جيدا بالمضرب حتي يصبح كريمي القوام ولونه ابيض فاتح جدا وبعدين بدأت ارش الدقيق حبه حبه واستعملت شوكة خشب لتوزيع الدقيق بنص دايرة وخط ولما خلصت كميه الدقيق حطيت نص الكميه في صينية مبطنه زبده ودقيق والنص التاني زودت عليه كاكاو وقلبته بنفس الطريقة وبعدين النص دا في الصينية بس طبعا حطيت فاصل بينهم من ورق الزبدة ودخلتها الفرن علي درجه حراره ١٨٠ وبعد ما استويت خرجتها من الفرن علي ورق زبده وسبتها لغايه لما بردت وبعدين بدأت افتحها واحشي كريمه مضروبه بالحليب وفاكهه في الجزء الفانيليا وكريمه بالشوكولاتة وشوكولاته ومكسرات في الجزء الشوكليت وبعد كده حطيت كريمه وفاكهه علي الوش وكريمه وشوكولاته علي الجزء التاني.

لو عندكم أى استفسارات أو أسئلة عن طريقة التحضير اضغطوا على الرابط ده هتلاقوا أسئلتكم وإجابتها من صاحبة الوصفة نفسها، أو تقدروا توجهوا أسئلتكم مباشرة ليها بردو عن طريق نفس الرابط.. وبالهنا.