طريقة تحضير خُضار سوتيه


الأكل ممكن يكون دواء، وممكن يكون داء، ده قرارنا واختيارتنا، وطريقتنا فى الأكل هى اللى فى النهاية بتسبب إننا نعيش بصحة جيدة أو لا قدر الله يكون دايما الجسم بيعانى من الأمراض! الأكل الصحى، أو healthy food فى ناس كتير مش بتحبه، لأنهم معتقدين إن وصفاته مملة وسخيفة ومفيش فيها أى حاجة تفتح الشهية، بس احنا هنقدم مجموعة الوصفات الصحية بطريقة لذيذة جدا وطعمها يفتح النفس!

أكتر شئ بيأثر على صحة الإنسان هو الغذاء، مش بس نوعه وطريقة طبخه، لكن كمان كميته اللى المفروض الواحد يبقى عارف إنه لا إفراط ولا تفريط، يعنى ياكل بس يحاسب، ميفضل دايس بنزين فى كل وجبة، لازم يتعلم يفرمل عشان عربية الصحة متخبطش بيه فى الحيطة وتكلفه خساير كتيرة ممكن لا قدر الله تنهى حياته. أمراض كتيرة للأسف بيكون سببها المباشر التغذية السيئة، زى الإفراط فى تناول اللوحم الحمراء، الإفراط فى تناول السُكريات، والإفراط فى استخدام الملح وتناول المخللات المختلفة، كل دى بتسبب أمراض القلب وضيق الشرايين، ومرض السُكر، وأمراض الضغط، واللى معاها ميقدرش الإنسان يمارس حياة طبيعية أبدا، فى حين إننا لو اتعلمنا، وعلمنا أطفالنا من صغرهم إنهم ياكلوا اللى نفسهم فيه بس مع الحرص وعدم الإفراط هتكون حياتنا أجمل وصحتنا أفضل!

الخُضار السوتيه من الوصفات الهايلة لمُحبى الأكل الصحى، ووصفة رائعة لمرضى السكر، وهى أصلا طبق جانبى رائع بيتقدم فى أفخم المطاعم والفنادق حول العالم، وصفة بتقبل القسمة على الكل، هايلة مع الأسماك واللحوم والفراخ، ورائعة للكبار والصغار، وفيها كمية ألوان كافية إنها تفتح نفس الواحد على الحياة كلها مش الأكل بس! وصفة الخضار السوتيه ممكن تكون سهلة جدا فى تنفيذها لو مشيتى معانا فى الطريقة واتبعتيها حرفيا عشان تظبط معاكى، خصوصا فى اللون الأخضر الزاهى للخضار اللى احنا بنكون عاوزين نحافظ عليه، كل التكات والحركات الخاصة بطبق خضار سوتيه ناجح هنقولها لك فى وصفتنا! طبق الخضار السوتيه، مكوناته أهم شئ فيها التنوع عشان تحقق فايدة غذائية أعظم لينا ولأجسامنا.

 

المكونات:

خضار طازج مشكل (جزر. كوسة. فاصوليا. بروكلى)

2 ملعقة طعام زيت زيتون

1/2 ملعقة شاى ملح

1/4 ملعقة شاى فلفل أسود مطحون (أو كمون حسب الرغبة)

1/2 ملعقة شاى زعتر مجفف

 

طريقة تحضير خُضار سوتيه:

 

الطريقة الأولى:

فى طاسة ساخنة نضع زيت الزيتون، ثم نضيف الخصار الطازج بعد غسله وتصفيته من الماء تماماً.

على نار متوسطة إلى هادئة نقوم بتقليب الخضار بملعقة خشبية، ونراعى أن يكون التقليب بشكل مستمر على جميع جوانب الخضار.

تستغرق هذه الخطوة مدة 5 دقائق يرفع بعدها الخضار من على النار ويقدم.

 

الطريقة الثانية:

فى وعاء عميق نضع كمية مناسبة من الماء والقليل من الملح، ونقوم بتغطية الوعاء؛ نترك الماء حتى يصل لدرجة الغليان.

بعد غليان الماء نقوم بتهدئة النار ثم نضيف الخضار الطازج.

نقلب الخضار فى الماء ونتركه به مدة من 5 - 7 دقائق فقط، نرفعه بعدها من الماء الساخن ثم نضعه مباشرة فى وعاء عميق به ماء بارد وثلج.

خطوة الماء والثلج تفيد فى وقف عملية التسوية سريعا ومنع تأكسد الخضراوات المحتوية على حديد، وبالتالى الاحتفاظ باللون الأخضر الزاهى الجميل.

 

ملحوظة مُهمة:

الخضار السوتيه لازم يكون بيقرمش مش طرى فبلاش نبالغ فى مدة التسوية ونعمل التوقيتات اللى فى الوصفة وبالهنا.

إيه رأيكم فى وصفتنا؟! لو جربتوها فى البيت وحستوا إن طعمها مميز وجميل، شاركونا ده بصور وتعليقات عشان نفضل على تواصل مع بعض وبالهنا.