تعددت الأشكال والنتيجة واحدة عايزه اقولكوا ان اهم حاجه ف البيتزا العجينة والجبنة.

العجينة لازم تبقى رقيقة خالص وناعمة، والحبنة لازم تبقى كتير كتير. الجبنة تتحط بعد ما البيتزا تستوي نتطلع الصينية نرش الجبنة وندخل الصينية تاني تلات دقايق بس.

طريقة تحضير البيتزا:

المكونات:

كوبين دقيق

معلقة كبيرة زيت زيتون

معلقة صغيرة خميرة

معلقة صغيرة سكر

معلقة صغيرة

ماء  للعجن

الحشو اللي جوه بقا اي حاجه وهتطلع حلوه زيتون وخضار ورومي وبسطرمة وأناناس 
انا بعشق البيتزا بالأناناس والفراخ بصوص الباربكيو واللحمة المفرومة.

طريقة التحضير:

نحط النواشف مع بعض وفى الآخر ننزل بالميه حبة حبة بالراحة لو الميه زادت نزود دقيق نعجن لحد ما تبقى زي اللبانة بتمط ومش بتلزق خالص .. وندهنها نفطتين زيت زيتون ونسيبها تخمر.  لو ف العجان بقا هتعمليه على متوسط وتسيبيه بتاع خمس دقايق كده يعجن براحته.

والعجينة بتخمر هنحضر التوبينج لو فراخ هنشوح الفراخ ف ملح وفلفل وغالبا أنا بعمله بباقي فرخة عندي، مشوي مقلي مش مهم، بشوحه تاني مع بصلة بس البصل مايتهريش ولو بتحبي صوص باربكيو نحط شويه قبل ما نطفي على طول مع معلقه خل صغيرة بتبقى تحفة. نقطع بقا بصل وطماطم وفلفل ونخرط الزيتون الأخضر بيبقى جميل جدا المزز ده.  

الصلصة بقا عندك طريقتين يا إما بتاعة المكرونة ببصلة متشوحة بس، أو الصلصة 
الإيطالية بقا بصلة وتومة نشوحهم ومعاهم زعتر وننزل بالطماطم المضروبة ونحدقها.

نطلع العجينة نحط الصلصة والحشو وعلى الفرن والجبنة بعد السوى ..لو عايزنها رولز هنلف العجينة رول زي السينابون ونقطع بتبقى جميلة جدا
وممكن ستيكس ونلفها وممكن ميني بيتزا .

نحطها ف الفرن على ١٨٠ °م ونطلع نطفي الفرن ونرش الجبنة تدخل البيتزا تلات دقايق ونطلعها بس كده.

نتمنى الوصفة تكون عجبتكم.. جربوها ولو عندكم أسئلة اضغطوا على الرابط ده وقولوا كل الأسئلة اللى عندكم لصاحبة الوصفة وهى هترد عليكم.. وبالهنا.