حد يقدر يقول للدوناتس لأ؟! ولا أنا أقدر الصراحة خصوصا لما تبقى محشية كريمة وشيكولاتة، يبقى من المستحيل حد يقدر يقاومها.. تعالوا نتعلم طريقة تحضيرها فى البيت.

طريقة تحضير دوناتس بالكريمة والشيكولاتة:

المكونات:

2 كوب دقيق للعجن

2 معلقة صغيرة خميرة  

معلقة كبيرة سكر

ذره ملح

كوب إلا ربع لبن دافئ (حليب)

ربع كوب ماء فاتر

بيضة واحدة

ملعقة كبيرة زبدة

للحشوة والتزيين:

* صوص الشيكولاته عبارة عن قطع شيكولاتة وعليها معلقة كبيرة لبن وبتدخل الميكرووييف لمدة دقيقة لحد ما المكونات تتجانس، ولو مفيش ميكروويف بنعمل نفس الشئ على البوتاجاز.

* معلقتين كريم شانتيه خام ومعلقه سكر بودر ومعلقه كاكاو خام وربع كوب لبن ونضرب كويس بالمضرب ونسيبه فى التلاجة شوية وبعدين نعمل فتحه من فوق وندخل الحشو بكيس الحلواني.

طريقة التحضير.

نضع معلقتين صغيرين خميرة ومعلقة سكر ومعلقتين ميه دافية في كوب مناسب ونغطيهم ونسيب الخميرة تشتغل. 

فى بولة العجن بقا نضع البيضة ومعلقة زبدة كبيرة ومعلقة سكر كبيرة
ومعلقة فانيليا وكوب إلا ربع كوب لبن دافي وننزل خليط الخميرة اللي اشتغلت
ونلقب كويس ونضيف ٢ كوب دقيق ننزلهم براحة على الخليط ونعجن كويس جدا.

نسيب العجينة تخمر، أنا سبتها نص ساعه وطلعتها نفرد العجين على رشة دقيق خفيفه ونخلي العجين تخين شويه ونقطع بكوباية أو طبق أو أشكال زي ما نحب ونرص على رشه دقيق خفيفة ونغطيها كويس ونسيبها تخمر تاني .. أنا سبتها تاني مره ساعه إلا ربع.

نسخن الزيت كويس اوي ويكون زيت غزير وننزل ونتابع كويس لأنه بيحمر بسرعه ونقلب على الوش التاني ونطلعها على مناديل.

ملحوظة مهمة:

الحشو نبدأ نحطه في الدوناتس بعد ما تطلع من الزيت وتبدأ تبرد شوية.

نتمنى تكون الوصفة سهلة.. لو عندكم أى استفسارات اضغطوا على الرابط ده ووجهوا الاستفسارات بتاعتكم لصاحبة الوصفة وهى هترد عليها كلها.. وبالهنا.