أيام ما كنت طالبة فى إعدادى وثانوى كنت بشوف أغلب زميلاتى البنات بيطلعوا من المدرسة على محلات الأكل وخصوصا يوم الخميس لأنه كان نص يوم، وكل مجموعة تطلع على المحل اللى نفسها تاكل فيه، كان الغالبية بيروحوا على محلات الكشرى والباقى بيهجموا على محلات الحواوشى.. لما دخلت الجامعة اتعودت على أكل المحلات والتيك أواى والكافيتريات بتاعت الجامعة، وكان فى كافيتريا جنب باب المترو بتاع جامعة القاهرة بتعمل ساندوتشات تحفة ومن بينها أرغفة الحواوشى، كنا رايحين جايين على الكافيتريا دى نضرب حواوشى وكبدة اسكندرانى، كنت بحس إن الحواوشى مهما اتعمل فى البيت عُمره ما يبقى بطعامة حواوشى الشارع، تحسوه كده ليه سر صنعة، بس لما انتشرت قصة اللحوم الفاسدة ومن بعدها #لحوم_هوهو وبعدين الكارثة الكبيرة بقى اللى هى انتشار لحوم الحمير فى أغلب المحلات، وكل شوية خبر عن غلق مطعم وتشميعه بالشمع الأحمر، بطلت آكل أى لحوم بره البيت، وقلت الواحد يتعمل يعمل كل اللى نفسه فيه فى البيت، وكانت محاولتى لعمل الحواوشى فى البيت ناجحة جدا، واتشهرت فى العيلة برغيف الحواوشى بتاعى والتتبيلة بتاعته، وقلت لازم أشارك الناس الوصفة بتاعته لأنها سهلة ومش محتاجة أى مجهود.

فى أوقات اجازة الصيف بنحتاج ناكل بردو، بس بنكون احنا الستات ملناش مزاج نطبخ، بنقول فى سرنا "احنا طالعين نتفسح ونستريح والا نعمل اللى بنعمله فى بيتنا؟!"، وكتير من الشباب بيطلعوا مصايف مع بعض كشلة وبيحجزوا شقة أو شالية عشان يكونوا مع بعض من ناحية ومن ناحية تانية يوفروا فى الفلوس، بس بردو أكيد الشباب دول هياكلوا مش هيفضلوا جعانين، وأكيد الشقق والشاليهات المصيفية بيكون فيها بوتاجاز وتلاجة، يعنى تحسوا كده إن الأجهزة بتبصلنا وتكلمنا وتقول لنا مستنيين إيه؟ اتفضلوا اطبخوا وكلوا... عشان كده قلنا نفكر الناس بأكلات سريعة التحضير مش هتاخد من وقت الفسحة او الراحة، وفى نفس الوقت الأكلة تشبعنا وتملا المعدة بمنتهى القوة، والحواوشى واحدة من الأكلات اللى هنعملها معاكم فى #جوا_الحلة واللى هنسميها #أكلة_بلاج وصفة دايما سريعة ومش مكلفة ونفس الوقت بتشبع والأهم من ده كله إنها #مفيهاش_فزلكة فى التحضير.. تعالوا معانا نعمل حواوشى. 

المكونات:

مكونات اللحم المفروم
كيلو لحم مفرومة
2 بصلة مفرومة

4 فص ثوم مفروم
2 ملعقة شاى ملح

1/4 ملعقة شاى فلفل أسود مطحون

1/2 ملعقة شاى بودرة بصل

1/2 ملعقة شاى ببريكا

1/2 ملعقة شاى كزبرة ناشفة مطحونة

1/2 ملعقة شاى حبهان (هيل) مطحون (حسب الرغبة)

1/2 ملعقة شاى زعتر ناشف
1/2 ملعقة شاى كمون

1/2 ملعقة شاى فلفل أحمر حار (حسب الرغبة)

1 حبة فلفل أخضر كبيرة مُقطعة مكعبات صغيرة

1 حبة طماطم كبيرة مُقطعة مكعبات صغيرة

12 رغيف خبز بلدى أسمر صغير

سمن بلدى

ورق زبدة

طريقة التحضير

فى طبق عميق نقوم بخلط البصل المفروم والثوم المفروم وجميع التوابل مع بعضها البعض، مع مُراعاة أى يتم تصفية البصل المفروم من أى ماء زائد به قبل إضافته مع باقى المكونات.

نُضيف خليط البصل والثوم والتوابل السابق إلى اللحم المفروم وبواسطة قبضة اليدين نقوم بدعك اللحم المفروم جيدا مع الخليط السابق حتى يصبح عجينا متماسكا.

نُضيف الفلفل الرومى المقطع والطماطم المقطعة والبقدونس المفروم إلى العجين السابق، ثم نتركه فى الثلاجة (البراد) حوالى ساعتين.

نقوم بتحضير أرغفة الخبز البلدى، وذلك بعمل فتحة صغيرة فى الرغيف، لنتمكن من خلالها من إدخال الحشو فى الرغيف.

نستخرج اللحم المفروم من الثلاجة ونقوم بتوزيع اللحم المفروم فى كل رغيف بحيث تملأ كمية اللحم كافة أجزاء الرغيف من الداخل.

نقوم بدهن الرغيف من الوجه والظهر، بالسمن البلدى بواسطة فرشاة الدهان المناسبة، على أن يُغطى السمن سطح الرغيف وظهره بالكامل.

نقوم بلف كل رغيف على حدة بورق الزبدة أو ورق القصدير (الفويل) ثم نضعه فى صوانى، فى فرن على درجة حرارة 160°م لمدة ساعة، ونُراعى أن توضع الصوانى على صاج الفرن نصف ساعة، ثم تُرفع وتوضع على الشبكة (فى أقرب مكان لصاج الفرن) لمدة نصف ساعة أخرى، حتى لا تحترق الأرغفة من أسفل. تُقدم أرغفة الحواوشى مع المخللات وسلطة الثومية.