فى جو العزومة لازم تكونى مُبدعة، ومن أهم أسباب الإبداع إنك تقدمى طبق حلو بعد سفرة الأكل.. وتورتة الآيس كريم مع شيكولاتة الكيت كات والمالتيزرز وصفة خرافية الجمال، مش بس فى طعمها، ده أكتر فى شكلها الخطير شديد الإغراء، أنا لما بشوفها أول كلمة بتطلع من لسانى "الله"، ولما عملتها فى البيت وأختى إسراء شافتها أول كلمة طلعت من لسانها كانت "وواووو"، هى فعلا وصفة مبهرة ومبهجة.

من الأماكن اللى أكلت فيها آيس كريم وعلم فى ذاكرتى بقوة، مدينة فيرونا فى شمال إيطاليا، المدينة دى اللى أخدت شهرة عالمية بسبب رائعة وليم شكسبير فى قصته (روميو وجوليت)، واللى كانت كل أحداثها فى مدينة فيرونا، أنا كنت محظوظة إنى زرت بيت جوليت، واتفرجت على الشُرفة اللى كانت بتقف لروميو فيها، صحيح وقتها استغربت جدا، لأن البيت صغير جدا، والشرفة كمان صغيرة جدا، لكن اتبسطت بالموضوع ككل والتجربة، وزاد انبساطى لما أكلت آيس كريم فى واحد من أشهر المحلات هناك وهو محل (جيلاتو)، الطعم الخرافى فعلا، والإقبال عليه رهيب، وقفنا تقريبا فى الطابور ساعة على ما الدور جه علينا، وده مش غريب على إيطاليا، لأن صناعة الآيس كريم بيقولوا إنها بدأ تتعرف لأول مرة فى إيطاليا، كان فيها أشهر وأمهر صناع للآيس كريم وخصوصا آيس كريم الفانيليا، وفى القرن الـ18 بدأ صناع الآيس كريم الإيطاليين يهاجروا لألمانيا وهولندا، وبدأوا ينشروا طريقة صناعة الآيس كريم هناك، ومن وقتها بدأ الصناعة دى تنتشر فى العالم كله لحد ما الكل عرفها وأتقنها.. واحنا عشان عارفين إن أغلب الناس بتعشق الشيوكولاتة فى الحلويات، قولنا نقدم وصفة تورتة الآيس كريم مع شيكولاتة الكيت كات والمالتيزرز، واخترنا لكم أوريو آيس كريم، عشان يليق مع الوصفة والشيكولاتة اللى هنزين بيها.

المكونات:

أولا: أوريو آيس كريم

30 حبة بسكويت أوريو (حسب مقاس قالب التورتة)

500 جرام كريمة حلويات

1/2 علبة لبن مُكثَف مُحلى  Condensed Milk

1 ملعقة شاى مستخلص الفانيليا Vanilla extract

طريقة تحضير تورتة آيس كريم

فى كيس بلاستيك، نضع كمية بسكويت أوريو، ثم نغلق الكيس بإحكام، ونبدأ فى طحن البسكويت داخل الكيس باستخدام يد الهون، أو أى أداة تُساعد على طحن البسكويت. نراعى أى يطحن البسكويت بحيث يصير مفتتا.

فى طبق عميق، نضع الكريمة وبالمضرب الكهربى نقوم بضربها جيدا لمدة تقريبا 4 دقائق حتى تصبح متماسكة، ثم نضيف إليها اللبن المكثف المُحلى ونُقلب المكونين مع بعضهما بالملعقة جيدا، حتى نحصل على قوام متماسك.

نقوم بخلط بسكويت أوريو الذى تم تفتيته مع الكريمة التى قمنا بإعدادها، ونُراعى أن يكون الخلط جيدا بحيث تشكل المكونات كتلة واحدة.

نقوم بسكب الخليط فى قاع قالب التورتة، ويُراعى أن يكون القالب قابل للفلك حتى يسهل استخراج التورتة منه فيما بعد الانتهاء من إعدادها.

بعد الانتهاء من سكب الآيس كريم، والتأكد من أن سطحه مستوٍ تماما فى قالب التورتة، نقوم بوضعه فى الفريزر، ونتركها بها لمدة لا تقل أبدا عن 12 ساعة، وبعد ذلك يصبح الآيس كريم جاهزا للتزيين.

نقوم باستخراج التورتة، ونبدأ فى فكها من قالب التورتة برفق، ثم نبدأ فى لصق أعواد شيكولاتة الكيت كات حول التورتة من الخارج من جميع جوانبها، وذلك بدهن أعواد الشيكولاتة بنشا سبق وضعه فى الماء وتجهيزه ليصبح مادة لاصقة للأعواد، ويجب أن تتم هذه الخطوة بسرعة حتى لا تسيح طبقة الآيس كريم. بعد ذلك نقوم بوضع كور المالتيزرز على قمة التورتة بحيث يُغطى سطح طبقة الآيس كريم بالكامل. نقوم بربط شريط مناسب فى لونه وشكله على الإطار الخارجى للتورتة وتُقدم.

الوصفة مش صعبة أبدا، هى محتاجة مهارة فى التزيين وسرعة فى التنفيذ عشان لو الآيس كريم ساح الدنيا هتبوظ والتورتة كمان هتبوظ. يا ريت نعرف من متابعى الصفحة رأيكم فى وصفتنا النهاردة؟ ويا ترى تحبوا نعمل وصفات تانية لأنواع مختلفة من تورتة الآيس كريم؟ لو تحبوا اكتبوا لنا الوصفة اللى انتوا عايزنها.