حاجات كتير بنستغربها لما بنشوف غيرنا بيعملها، مش بنصدق فى يوم إننا هنتغير، أو شئف ى شخصيتنا حاله هيتغير ويقبل يعمل حاجة كان مستغربها وهو بيشوفها على غيره من الناس.. القانون ده بيشتغل جامد جدا فى حوار الأكل، بنستغرب لما بنشوف ناس بتاكل حاجات معينة وبعدين هووووووب نلاقى نفسنا بقينا ناكلها ونحبها، طبعا الحوار ده بعيدا عن المحرمات فى الأكل، أو الشرب... من الوصفات اللى أول ما سمعت عنها استغربتها، وصفة الكبدة بدبس الرمان، والدبس معناها العسل بس عسل الفواكه، قعدت أتخيلها فى دماغى مركبتش أبدا، وبعدين خدتنى الجلالة وقلت ما المانع؟ أعملها وأجرب طعمها فى البيت عندى! جربتها واتبسطت من النتيجة، مش انا بس أنا والضيوف اللى كانوا معزومين يومها عندنا، كنت من الجرأة والتهور إنى أول مرة أعملها يكون على سفرة عزومة، وقد كان، وحبيت الموضوع أووووى وعملتها كتير وأكلتها وأكِلتها لضيوف كتير.. الواحد طالما مفيش حرام لازم يجرب أنواع وأصناف وطرق جديدة فى الأكل تخلى السفرة دايما جديدة والمعدة مبسوطة بالتنوع.

فوائد الكبدة:

تُعالج مشكلة فقر الدم ويقيه منها لغناه بفيتامين "ب 12". تُسهم بشكل كبير جداً في تكوين كريات الدم الحمراء. لها دور كبير في بناء عضلات الجسم. تقوية حاسة البصر وتحسين الرؤية. تعمل على مقاومة التوتر والضغط النفسي وتُقوي الإخصاب. تعمل على تقوية جهاز المناعة في الجسم، وجعله أكثر مقاومةً للأمراض. مفيدة جداً للبشرة فهى تقويها كما تقوي الأظافر أيضاً. تحافظ على صحة وسلامة الأسنان والعظام. مهمة جداً للأم الحامل وجنينها لغناه بحمض الفوليك الضروري لهما. تُمد الجسم باحتياجاته اليومية من السعرات الحرارية. تحتوي على حمض البنتوثينيك الضروري للعمليات الحيوية التي تسير داخل الجسم والتي من خلالها يتم تحويل الطاقة الكيميائية إلى أشكال الطاقة الأخرى.

المكونات:

كيلو كبدة بقرى
4 فصوص ثوم مفروم

1/4 ملعقة شاى بودرة ثوم
1 ملعقة شاى ملح

1/4 ملعقة شاى فلفل أسود مطحون

ملعقة طعام دبس الرمان (أو ملعقتين لمحبى دبس الرمان)

ملعقة شاى بهارات لحمة

ملعقة طعام خل أبيض

2 ملعقة طعام سمنة بلدى (أو زيت نباتى)

2 ملعقة طعام عصير ليمون

طريقة التحضير

نقوم بتقطيع الكبدة شرائح كبيرة أو صغيرة حسب الرغبة، ثم نبدأ بتحضير الخلطة المستخدمة فى التتبيل.

فى المطحنة الكهربائية نقوم بخلط الثوم وجميع التوابل مع بعضها البعض، ثم إضافة الخل الأبيض لتصبح التتبيلة جاهزة للاستخدام، وفى طبق عميق أو علبة بلاستيكية، نضع قطع الكبدة، ونُضيف إليها خلطة التوابل المطحونة، ثم نُضيف ملعقة دبس الرمان بحيث نتأكد أن التتبيلة والدبس قد غمرت كل قطع الكبدة، ثم نقوم بوضع عصير الليمون على القطع المتبلة، ونترك الكبدة بعد تتبيلها فى الثلاجة لمدة ساعة على الأقل حتى تتشرب التتبيلة، وتحتفظ قطع الكبدة بطراوة داخلية بسبب التتبيل تجعلها لا تنشف أثناء التحمير.

نضع مقلاة غير قابلة للالتصاق على نار متوسطة، ثم نضع بها السمن أو الزيت، وبعد أن يسخن السمن قليلا، نضع قطع الكبدة البقرى فى المقلاة، ونُراعى أن نقلب الكبدة على وجهيها برفق حتى تأخذ اللون البنى الداكن.

فى حالة الرغبة فى الحصول على كبدة تشبه الكبدة المشوية، نقوم بالاستمرار فى تشويح الكبدة حتى تأخذ لونا أكثر دكانة، وهو لون الشواء، أما فى حالة التحمير العادية، نقوم بإضافة ربع كوب من الماء إلى الكبدة ثم نقوم بتغطية المقلاة ونتركها على نار هادئة لمدة من 10 – 15 دقيقة، ونراعى أن نقوم بتذوق قطعة من الكبدة قبل رفعها من على النار حتى نتأكد من وصولها للنضج التام. يُمكن إضافة المزيد من دبس الرمان قبل تمام تسوية الكبدة وذلك لمحبى الطعم الحلو الزائد فى الوصفة.

تُقدم الكبدة بدبس الرمان مع الأرز البستمى الأبيض، أو المكرونة بالصلصة الحمراء، وتكون سلطة التومية والطحينة والباذنجان المخلل من أفضل السلطات التى تُقدم معها على سفرة الغداء.

الوصفة دى تنفع كمان جدا مع الكبدة الضانى، وتكون هايلة وتغيير حلو لو اتعملت فى العيد الكبير، عيد الأضحى، الكل هيحس بالاختلاف وهتميز أطباق العيد عندكوا. ويا ريت متنسوش تحطوا على السفرة يومها طبق جرجير كبير واعصروا ليمونة على الجرجير بتخلى طعمه مزز ولذيذ، ويا سلام سلم لو علمتوا عصير كركديه فريش أو برتقال فريش مع الوصفة دى، تبقى تحفة على السفرة ولايقة جدا علي الكبدة بالدبس، نتمنى إنكم تجربوا الوصفة وخصوصا تتبيلة دبس الرمان والليمون اللى هتعمل فرق كبير فى طعم الكبدة معاكم، عايزين نعرف منكم فى التعليقات حكاياتكم الشخصية عن الكبدة ومغامراتكم فى أكلها أو طبخها.. شاركونا بآرائكم وتعليقاتكم واعملوا تاج ومنشن للى شاركوكم ذكريات الأكل.