مين ينسى ذكريات الجامعة؟! سنين العمر والدراسة كلها وذكرياتها كوم، وذكريات الجامعة كوم تانى خالص.. صعب أيام الجامعة بكل اللى فيها تتنسى وتضيع وسط زحمة الشغل والعيال والمسئولية.. من ذكريات الجامعة اللى مربوطة فى قلبى ذكريات الأكل جوا وبره الجامعة، كافيتريات وعربيات شارع ومحلات برندات أكل وغير وغيره، بس أول ساندوتش ليا فى الجامعة كان مع زميل الدراسة خالد، وكان ساندوتش سجق شرقى من كافيتريا صبرى (ساندوتش الجامعة) اللى قدام باب كلية تجارة جامعة القاهرة... ياااااااه على الأيام، خالد كان مجرب سندوتشات صبرى قبل ما ياخدنى على هناك أجربها، وهو اللى نصحنى يومها بساندوتش السجق الشرقى وقالى: "على ضمانتى"، وكان ضمان 100% ، اتبسطت من الطعم ومن الجو وحتى زحمة المحل حبيتها على غير عادتى، لأنى مبحبش الأماكن الزحمة، خلصت أول ساندوتش وطلبت كمية مهولة بعدها من كترها مش فاكرة عددها، وطبعا الطبق الاستانلس الفضى والساندوتش الملفوف فى ورق الزبدة وشوية الطرشى البلدى اللى جبن كل ساندوتش، توليفة مظبوطة وجو يميل جدا للشعبى، وابتدا المشوار، مشوار حبى للسجق الشرقى وإعجابى الشديد بيه كوجبة شعبية حرشة وروشة! حاسة وانا بكتب الكلام ده دلوقتى فى المدونة إنى محتاجة أرجع طالبة جامعية تانى، محتاجة خالد زميلى ينادى عليا ويقولى تعالى نروح صبرى فى البريك ناكل سجق، محتاجة أرجع أكبر مسئولية فى حياتى هى تفكيرى فى المذاكرة والنجاح وبس، مفيش مسئوليات تانى أكبر من كده.. فاكرين ذكريات الجامعة بتاعتكم؟ شاركونا الذكريات فى التعليقات.. خصوصا ذكريات الأكل!

أنا وخداكم معايا على الذكريات وهنعمل مع بعض سجق شرقى، هنستخدم الطريقة التقليدية اللى كلنا تقريبا عارفينها، بطريقة سهلة وسريعة في التحضير، والطعم لذيذ وشهى، والأهم إن أى حد ست أو راجل ملوش في المطبخ يقدر يعملها بمنتهى السهولة والنتيجة تكون مضمونة 100% إن شاء الله.

طريقة عمل سجق شرقى بالطماطم والخضراوات

المكونات:

كيلو سجق شرقى
بصلة مُقطعة شرائح

2 فص ثوم شرائح
2 ملعقة طعام معجون طماطم

كوب عصير طماطم
1/2 ملعقة شاى ملح

1/4 ملعقة شاى فلفل أسود مطحون

1/2 ملعقة شاى ببريكا

1/4 ملعقة شاى بودرة بصل

1/4 ملعقة شاى بودرة ثوم

1/4 ملعقة شاى فلفل أحمر حار ناعم (حسب الرغبة)

2 حبة طماطم (بندورة) مقطعة مكعبات

1 حبة فلفل أخضر رومى مُقطع مكعبات

1 حبة فلفل أصفر مُقطع مكعبات

زيتون أسود شرائح

ملعقة طعام بقدونس مفروم

ملعقة طعام زيت زيتون

طريقة التحضير

في وعاء عميق، نضع لترين من الماء ونضع الوعاء على نار متوسطة إلى مرتفعة، حتى يصل الماء لدرجة الغليان.

بعد أن يصل الماء للغليان، نقوم بوضع السجق بداخله لمدة 3-4 دقائق، مع تخفيض درجة الحرارة إلى متوسطة ضعيفة، بعد مرور 4 دقائق، نرفع السجق من النار ونُصفيه من الماء.

في مقلاة، نضع زيت الزيتون، وعلى نار متوسطة نضيف البصل والثوم ونقلبهم جيدا حتى نحصل على لون أصفر فاتح، ثم نقوم بإضافة السجق الذى سبق سلقه، ونتركه على النار لمدة 7-10 دقائق مع مراعاة تقليبه على جميع الجهات حتى يأخذ اللون البنى الداكن.

بعد 5 دقائق من إضافة السجق، نُضيف عصير الطماطم ومعجون الطماطم والفلفل الأخضر والأصفر والتوابل والملح إلى السجق ونُقلب جميع المكونات جيدا، ونترك المكونات لمدة 5 دقائق أخرى بحيث يتشرب السجق الطعم الموجود بالإضافات، وقبل أن نرفع السجق من على النار بدقيقة واحدة نقوم بإضافة الزيتون الأسود، وذلك حتى لا يأخذ الزيتون مرارة طعم من وضعه على النار لمُدة طويلة، ثم نضيف البقدونس المفروم، بعدها نرفع السجق ونقدمه مع البطاطس المُحمرة والخبز. 

عايزاكوا تجربوا وصفة جوا الحلة، هى صحيح تبان أنها وصفة تقليدية جدا بس مع إضافة الخضروات والتوابل اللى عندنا، تحسوا أنها بقت وصفة روشة جدا وبجد نفسى اللى يقرأ الوصفة، خصوصا الشباب العزاب والمغتربين، والستات اللى مش بتحب تدخل المطبخ يعملوا الةصفات السهلة دى لأنها مش محتاجة مهارة فى الطبخ، محتاجة بس الواحد يمشى مع الوصفة ويحط الحاجات دى مع بعضها وبعد كدة ياكل بالهنا والشفا. 

جربوا وصفتنا للسجق الشرقى واكتبوا لنا رأيكوا بالتعليقات.