لما كنت طفلة صغيرة بضفيرة، كان عندى مشاكل صحية كتيرة، كان من أهمها فقر الدم، مكنتش أصلا بحب الأكل، كنت شديدة النحافة، وكمان كنت باكل وجبات مش مفيدة لصحة الجسم، وكنت مع كل دكتور أكشف عنده يوصى ماما تقدم لى وجبات معينة تساعدنى على تحسين صحتى وزيادة وزنى، وكنت مع كل تحليل يتعمل يطلع لى إنى عندى فقر دم! طبعا كان لازم وقفة مع المأكولات ووقفة تانية مع عدم إقبالى على الأكل أصلا، وبدأت رحلة كتابة فواتح الشهية فى صورة حبوب وسوائل حلوة جدا فى طعمها وغيره، يمكن المعدة المقفولة دى تفتح ونقدر نحط فيها الأكل الصحى والمغذى للجسم النحيف ده.. الحكاية كانت فعلا معاناة، أنا استجابتى للأكل كانت ضعيفة جدا، وبدأت المشكلة تكبر لأنه بقى لازم آكل وأنا مليش نفس أصلا للأكل، وفى زيارة جديدة ومتكررة للدكتور، وبعد ما شاف تحليل الدم، بص لى بغضب شديد وفهمنى إنى لو مكلتش مجموعة محددة من الأغذية صحتى بشكل عام هتنهار تدريجيا، ومسك ورقة وكتب فيها مجموعة من الأكلات الضرورية، وكان على أول القايمة #الكبدة. حقيقى فرق معايا إنى كطفلة خفت على صحتى وبدأت ألتزم بقايمة المأكولات اللى كتبها الدكتور، مرة بفواتح شهية ومرة من غير لحد ما الدنيا بدأت تظبط وتحليل الدم قال إنى بقيت تمام، والفضل بعد ربنا كان لفوايد الكبدة اللى هنعرفها سوا.

فوائد الكبدة:

تُعالج مشكلة فقر الدم ويقيه منها لغناه بفيتامين "ب 12". تُسهم بشكل كبير جداً في تكوين كريات الدم الحمراء. لها دور كبير في بناء عضلات الجسم. تقوية حاسة البصر وتحسين الرؤية. تعمل على مقاومة التوتر والضغط النفسي وتُقوي الإخصاب. تعمل على تقوية جهاز المناعة في الجسم، وجعله أكثر مقاومةً للأمراض. مفيدة جداً للبشرة فهى تقويها كما تقوي الأظافر أيضاً. تحافظ على صحة وسلامة الأسنان والعظام. مهمة جداً للأم الحامل وجنينها لغناه بحمض الفوليك الضروري لهما. تُمد الجسم باحتياجاته اليومية من السعرات الحرارية. تحتوي على حمض البنتوثينيك الضروري للعمليات الحيوية التي تسير داخل الجسم والتي من خلالها يتم تحويل الطاقة الكيميائية إلى أشكال الطاقة الأخرى.

فى عالم المطبخ هتلاقى فى معركة كبيرة دايرة بين السيدات بسبب الكبدة، الصراع قائم على فكرة سؤال واحد "الكبدة بتتغسل واللا مش بتتغسل؟!"، وتتفتح حلقات نقاش رهيبة وتحديات فظيعة، مدرسة بتتبنى فكرة إن "الكبدة دم" يعنى لو اتغسلت هتفقد نسبة الدم ويبقى ملهاش طعم، ومدرسة تقولك لازم الكبدة تتغسل أو بمعنى أصح تاخد شطفة سريعة عشان تضمن نضافة أعلى، بصرف النظر عن المدارس والنظريات الكتيرة، أحب أقول إن الأكل يقبل القسمة على كل الطرق، أنا من مدرسة الشطف السريع بالميه، حتى لو كانت الكبدة دم، إحساسى بالنضافة بيغلب على أى شئ تانى، بالإضافة إلى إن الشطفة السريعة مش هتضيع الدم من الكبدة ولا تغير طعمها ولا حاجة بس اللى مجربش مش عارف أو مش عاوز يعرف.. الخُلاصة، عاوزين تاكلوا الكبدة من غير غسل اعملوا كده، عاوزين تشطفوها، اعملوا كده وبلاش نحجر على طرق بعض عشان كل الطرق هتصل بنا إلى المعدة!

طريقة عمل كبدة اسكندرانى

المكونات:

كيلو كبدة بقرى
5 فص ثوم مفروم
1 ملعقة شاى ملح

1/4 ملعقة شاى فلفل أسود مطحون

1/2 ملعقة شاى كمون مطحون

ملعقة شاى بهارات لحمة

ملعقة طعام خل أبيض

2 ملعقة طعام سمن بلدى (أو زيت نباتى)

2 ملعقة طعام عصير ليمون

فلفل أخضر حار (حسب الرغبة)

طريقة التحضير

نقوم بتقطيع الكبدة شرائح كبيرة أو صغيرة حسب الرغبة، ثم نبدأ بتحضير الخلطة المستخدمة فى التتبيل.

فى المطحنة الكهربائية نقوم بخلط الثوم وجميع التوابل مع بعضها البعض، ثم إضافة الخل الأبيض لتصبح التتبيلة جاهزة للاستخدام.

نقوم بتتبيل شرائح الكبدة بوضعها فى التتبيلة المُجهزة فى وعاء عميق، وتركها بالثلاجة (البراد) لمدة ساعتين حتى تتشرب الشرائح التتبيلة جيدا، ويراعى أن نُغلق الوعاء.

بعد مرور ساعتين أو أكثر، نضع مقلاة غير قابلة للالتصاق على نار متوسطة، ثم نضع بها السمن أو الزيت، وبعد أن يسخن السمن قليلا، نضع قطع الكبدة البقرى المُتبلة فى المقلاة، ونُراعى أن نقلب الكبدة على وجهيها حتى تأخذ اللون البنى الداكن، ونُراعى كذلك أن نقوم بتهدئة النار إلى ضعيفة بعد أن تأخذ الشرائح اللون البنى.

نقوم بإضافة نصف كوب من الماء إلى الكبدة ثم نقوم بتغطية المقلاة ونتركها على النار الهادئة لمدة من 10 – 15 دقيقة، ونراعى أن نقوم بتذوق قطعة من الكبدة قبل رفعها من على النار حتى نتأكد من وصولها للنضج التام.

نقوم بإضافة عصير الليمون إلى الكبدة بعد تمام النضج، ونوزع العصير بحيث يغطى كل قطع وشرائح الكبدة، ويجب ألا يتم إضافة عصير الليمون إلا فى النهاية، حتى لا تأخذ الكبدة مرارة من إضافة الليمون أثناء عملية التسوية. يُمكن إضافة الفلفل الأخضر الحار إلى الكبدة حسب الرغبة. تُقدم قطع الكبدة مع الخبز البلدى وسلطة الطحينة، كما يمكن وضعها فى أرغفة الخبز الفينو مع سلطة الطحينة وتقديمها كسندوتشات.

نتمنى إنكم تجربوا الوصفة وخصوصا تتبيلة الثوم والليمون اللى هتعمل فرق كبير فى طعم الكبدة معاكم، عايزين نعرف منكم فى التعليقات حكاياتكم الشخصية عن الكبدة ومغامراتكم فى أكلها أو طبخها.. شاركونا بآرائكم وتعليقاتكم واعملوا تاج ومنشن للى شاركوكم ذكريات الأكل.