فى روايح بتلزق فى ذاكرة الواحد، بيبقى صعب ينساها أو يقاومها، الروايح الحلوة للأكل بتحرك الواحد ناحيتها، تاخده كده وراها من غير تفاهم، وتصحى الجوع فى المعدة، حتى لو كانت المعدة مليانة وشبعانة.. الريحة الوحيدة اللى بتعمل فيا المأساة دى، ريحة شوى الكفتة، يا قلبى على الموقف ده لو حصل معايا وأنا ماشية فى أى منطقة، تفكيرى بيتشل، ومبفهمش غير حاجة واحدة بس، إنى لازم أقف آكل فى المكان اللى بيشوى كفتة ده، انا معنديش مقاومة نهائى لريحة الشوى بصفة عامة، والكفتة نقطة ضعفى الكبيرة.

من أحلى أيام السنة فى حياتى، أيام عيد الأضحى المبارك، هى دى أيام الشوى الوحيدة تقريبا فى البيت، وبابا ربنا يبارك فى صحته وعمره، هو عميد كلية الشوى فى العيد، ومسئول الأضحية والدبح والتقطيع والتوزيع، هو بطل المشهد بتاع العيد من أول ما يروح يخطب خطبة العيد فى الجامع ويصلى بينا وبكل رواد المسجد، لحد ما يرجع البيت ويكون أب بيشوف أضحية بيته ويساعد فى حفلة الشوى الجميلة، أو بصراحة يقوم بيها كلها لوحده. 

الله على منظر الشواية وبابا بيرص عليها الفحم وبيعلمنا ازاى نولع الفحم، واحنا بنتفرج بانبهار على حرفيته العالية، كأنه اتولد فى مطعم كباب وكفتة، ويا سلام على رصتنا جنب الشواية، واحنا زى القطط مستنيين صاحب الأكل يناولها حتة يسد بيها جوع البطون، وأنا بقى لما أعيش دور الاستهبال، وكل 3 دقايق أقول لبابا : "مش عايز حد يدوق؟" وآكل حتة ورا التانية لحد ما يشخط فيا عشان أستنى وقت نهاية الشوى وناكل كلنا سوا. 

فى بردو ذكريات لحرق اللحمة وتفحمها تماما على الشواية، وكآبة النتيجة إننا هناكل لحمة عادية من مشوية، وشوية عتاب من كل واحد للتانى يفهمه بالطريقة كده إن هو السبب فى حرق اللحمة.. يمكن كانت أسوأ ذكرى لحرق اللحمة، لما دبحنا فى البلد، وكنا متجمعين كلنا احنا وأهل بابا وكانوا جايبين حاتى يشوى لنا اللحمة، بصرف النظر عن إنه اتأخر جدا، هو الحقيقة حرق معظمها باقتدار وبدم بارد.. اللى عوضنى عن الصدمة دى، كانت فسحتى على ظهر الحمار وسط المزارع والغيطان.

النهاردة عملت لكم وصفة من أحب الوصفات لقلبى، لأنها مرتبطة بأيام وذكريات الشوى اللى حكيت لكم عنها باختصار، وصفة كفتة الحاتى، أعتقد كل العالم بيحبوها، مفيش خلاف على ده، المشكلة بس إن الوصفة مش بتظبط مع ناس كتير، لكن احنا معانا الحل فى وصفتنا. يلا نعرف سوا الوصفة السحرية لنجاح كفتة الحاتى فى البيت، واللى ممكن تتعمل على الطاسة الجريل عادى مش لازم على شواية فحم، او حتى تتعمل فى الفرن.

المكونات:

كيلو لحم مفرومة (كندوز) أو (80% كندوز + 20% ضانى) لنتيجة رائعة
2 بصلة متوسطة

4 فص ثوم مفروم
2 ملعقة شاى ملح

1/2 ملعقة شاى فلفل أسود مطحون

1/2 ملعقة شاى بودرة بصل

ملعقة طعام كزبرة ناشفة مطحونة

ملعقة شاى زعتر ناشف
ملعقة طعام زنجبيل بودرة

ملعقة طعام بقدونس ناشف

ملعقة طعام كبابة صينى بودرة

1/2 ملعقة شاى فلفل أحمر حار (حسب الرغبة)

1/2 ملعقة شاى حبهان (هيل) مطحون (حسب الرغبة)

طريقة التحضير

نقوم بفرم البصل فى الكبة ثم نرش البصل بكمية من الملح، ونتركه لمدة تتراوح بين 10 – 15 دقيقة ليستخرج الماء الموجود به، ثم نقوم بتصفية البصل من الماء، بواسطة اليد، حيث نمسك البصل براحة اليد ونعصره  جيدا، حتى يتخلص تماما من الماء الموجود به، ونحتفظ بالطبق المحتوى على ماء البصل.

فى طبق عميق، نضع اللحم المفروم، ونُضيف إليه البصل الذى سبق إعداده وتخليصه من الماء، ثم نضيف الملح والفلفل الأسود المطحون والثوم المفروم، وجميع البهارات، وبراحة اليدين نبدأ فى عجن الكفتة جيدا، بحيث تتحول لكتلة واحدة، بعد العجن نثدخل الكفتة فى الثلاجة لمدة ساعة على الأقل، وهذه الخطوة ضرورية جدا فى تماسك الكفتة على الأسياخ وتُساعد على تشكيلها جيدا.

نستخرج اللحم المفروم من الثلاجة ونقوم بتقسيم اللحم المفروم إلى كور متساوية الحجم، ونبدأ بعد ذلك فى تشكيل كل كورة من الكور، على الأسياخ الحديدية أو الخشبية، ويُراعى أثناء تشكيل الكفتة على الأسياخ، أن نقوم باستخدام ماء البصل، وذلك بتندية أطراف الأصابع بماء البصل المُضاف إليه القليل من الملح والفلفل الأسود، ثم نبدأ فى تشكيل اللحم على الأسياخ بالأصابع المبللة بماء البصل، ثم نبدأ فى شوى الكفتة على الشواية بالحم أو تحت شواية الفرن.عملية الشواء فى الفرن لا تستغرق أكثر من 20 دقيقة، ويُراعى عدم الإفراط فى وضع اللحم تحت الشواية حتى لا يفقد اللحم طراوته ويصعب أكله.

 يمكن تنفيذ نفس الخطوات والشوى على مقلاة الشوى Grill على البوتاجاز العادى، وذلك بدهان المقلاة بزيت الزيتون، وتقليب أسياخ الكفتة (الأعواد الخشبية) على جميع الجهات لمدة تتراوح من 7-10 دقائق على نار متوسطة.

يمكن تنفيذ نفس الخطوات فى صينية فى الفرن، وللحصول على رائحة ونكهة الشواء، نشعل 4 قطع من الفحم على النار العادية، ثم نضع كل قطعة فحم فى ورق القصدير (الفويل) ثم نضع نقطة زيت على كل قطعة فحم مشتعلة، ثم نضع الفحم داخل الصينية المحتوية على الكفتة التى تم تسويتها، ثم نُغطى الصينية بالكامل بورق القصدير مدة ثلث ساعة حتى تكتسب الكفتة رائحة ونكهة الشواء.

تقدم الكفتة مع سلطة التومية والبطاطس مع المايونيز، والطحينة، ويُفضل وضع البقدونس ليس فقط للتزيين ولكن ليتم أكله مع الكفتة، لأنه يمتاز بقدرته العالية على امتصاص الدهون الضارة وإذابتها، ويمكن أن تقدمى صوانى الرقاق باللحم المفروم، وطبق الفتة المصرية الشهير بالخل والثوم على مائدتك والاستمتاع بالكل والصحبة الجميلة.

دى كانت وصفتنا لشوى كفتة الحاتى فى البيت، جربوها واستمتعوا بكل لحظة فيها، ومتنسوش تشاركوا حبايبكم وصحابكم فى متعة الشوى. وفى انتظار صور لحفلات الشوى بتاعتكم، عشان نتشارك كلنا فى التجربة والفرحة بتاعتها.