يا سلام على كوباية الشاى الصبحية أو وقت العصرية.. ويا حلاوتها ومعاها بسكويت ناعم كده بيدوب دوبان فى الفم.. الله على الطعم والمزاج الحلو.. البسكويت عليه إجماع من كل أفراد العيلة.. صغير وكبير، شباب وكبار.. محدش يقدر يقف فى وش البسكويت ويقوله مش عاوزك.. احنا كلنا ضعفاء قدام حلاوة وروعة البسكويت وخصوصا لما يكون ناعم ومعمول بطريقة حلوة بناكل منه ومش بنشبع.. تعالوا نعمل بسكويت شاى ظريف وخفيف!

طريقة تحضير بسكويت شاى

المكونات:

2 كوب دقيق لكافة الأغراض

نصف كوب زيت ذرة

نصف كوب سكر

نصف كوب لبن (حليب) أو عصير برتقال (حسب الرغبة)

كيس بيكينج بودر

2 كيس فانيليا

رشة ملح

طريقة التحضير

نحط السكر مع الزيت ونضربهم كويس وبعدين ننزل بالحليب وكيسين الفانيليا ونضربهم كويس وننزل بالدقيق اللي عليه البيكنج بودر ورشة الملح

على الخليط السابق واحدة واحدة لحد العجينة ما تتماسك

نسيبها ترتاح ١٠ دقايق

وبعدين نفردها بالنشابة سمك ٢/١ سم مثلا ونشكلها 

وفي صينية مفروشة ورق زبدة وفي الفرن على درجة حرارة ١٨٠°م من ١٠ دقايق لربع ساعة حسب سخونة الفرن.