الفطير المشلتت البلدى اللى غرقان فى السمنة البلدى.. يا حلاوته. يا جماله.. احنا المصريين بنعشق الفطير، بناكله مع جبنة حادقة أو مع السكر البودرة والعسل بكل أنواعه (الأبيض، الأسود).. الفطير بالنسبة لنا فى الأرياف خير، وبيتقدم باستمرار فى وجبة الفطار، وطبعا بيكون أساسى فى أكل العرايس والعرسان يوم الصباحية.. بس هو بيحتاج شوية وقت وخطواته كتيرة شوية، بس احنا عملنا فطير سريع وسمناه فطيرة الطاسة، لأنه بيتعمل فى طاسة عادية جدا وبطريقة سهلة وسريعة على عيون البوتاجاز.. تعالوا نتعلمها!

طريقة تحضير فطيرة الطاسة:

المكونات:

كيلو دقيق

ملعقة صغيرة سكر

ملعقة صغيرة و 1/2 ملح

ماء للعجن

للحشوة :

بسطرمة

رومى مدخن

جبن موتزاريلا مبشورة Mozzarella

جبنة شيدر مبشورة

شرائح زيتون (أسود وأخضر) مخلية من البذوز

زعتر جاف

طريقة التحضير.

في طبق غويط هضيف كل المكونات علي بعض الدقيق والملح والسكر والميه الدافية، انزل شوية شوية بالميه لحد ما العجينة تلم خالص.

اقسمها ٣ كور وادهنهم زيت واسيبهم ساعة يرتاحوا، وبعدين افرد أول كورة علي رخامة عليها زيت، افردي اوي وارفعيها كل شوية بالراحة وبعدين ادهني زبدة ولفيها روول وقطعي حسب هتحبي الفطيرة اد ايه.

وفي طبق متغطي في التلاجة سبيها كمان ساعة، وبعدين خدي أول قطعة افرديها بالنشابة وبعدين ادهني زبدة مع زيت واقفليها على شكل ظرف وافريدها تاني براحة وفي طاسة سخنة جدا علي البوتاجاز نزليها ولما أول جنب ياخد لون اقلبيها علي الجنب التاني وبس كدا بي الهنا 
ممكن تقطعيها لما تبرد وتحطي سكر بودرة. 

شوية تكات:

• لو عايزة تعملى الفطيرة محشية بتحطى الحشوات الحادقة، "بسطرمة، رومى مدخن......"، قبل ما تلفيها روول، وبعدين تلفيها وتكملى باقى الخطوات.   

• نفس الطريقة دي لو عايزة تعملي فطيرة زي المشلتت تعملي أول واحدة وتطبيقها ظرف وتفردي واحدة تانية وتحطيها جواها وهكذا مع ٣ أو أربع كور وتسبيها ترتاح واعمليها في الطاسة هتبقي تحفة بردو.

لو عندكم أى استفسارات أو أسئلة عن طريقة التحضير تقدروا توجهوا أسئلتكم مباشرة لصاحبة لوصفة نفسها ... اضغطوا على الرابط ده.