عندى حالة ملل، بفقد فيها الأمل!! كلمات أغنية قديمة لسميرة سعيد، بفتكرها وبحسها جدا لما بيعدى النهار ويدخل وقت الظهر وييجى التفكير فى وجبة الغدا، وييجى معاه السؤال العتيق "هطبخ إيه النهاردة؟!"، وتبدأ رحلة الشك فى قدرتى على عمل سفرة غدا مختلفة عن اللى عملته امبارح وأول امبارح، حاجة جديدة عن الأيام اللى قبلها وفى نفس الوقت يحبها اللى فى البيت عندى، ومش أنا لوحدى اللى بمر بالمأساة دى كل يوم، المرض ده منتشر عند كل ست فى كل بيت، وهى بتعيشه لوحدها، لأن الراجل فى البيت غالبا أو دايما معندوش إجابة على سؤالها "تحب تتغدا إيه النهاردة؟!"

عشان حجم المأساة دى يتقلص، ومفعول ضررها يقل، وخصوصا ضرر التفكير، لازم الست تتعلم وصفات كتير جديدة عن اللى هى متعودة عليها، أو عن اللى اتعلمتها من مامتها، لازم تطلع على مطابخ عالمية، من الشرق الأقصى، والخليج، وأوربا وأمريكا، وغيرها، لازم تجرب تعمل الجديد عن سفرتها المعتادة، وصفات الأكل، عابرة للقارات، عابرة للمحيطات، ولما بتظبط معانا، بتبقى عابرة للمعدة، بتدخل على القلب، وترشق فى العقل، وتسيب علامة، ومن الوصفات اللى عملت معايا التأثير المرعب ده، وصفة فتة شاورما اللحمة، حاجة كده فاخرة، بحسها وجبة لايقة جدا على بعضها، متصالحة مع نفسها، وصفة فتة شاورما اللحمة للناس اللى بتحب الأكل، وبتحب تستمع بيه، يا حلاوة صوص التومية بالطحينة وهو دايب على شرايح اللحمة، ومتغلغل لطبقة الرز البسمتى الأصفر، وبيختلط مع العيش السورى المحمص المقرمش اللذيذ، انفجارات جميلة فى البوء تسرح بيه من عالم الواقع لعالم الخيال. تعالوا معانا نتعرف على طريقة عمل وتحضير الفتة السورية بالشاورما.

المكونات:

1/2 كيلو لحم بتلو شرائح

توابل الشاورما (ملعقة طعام كمون، ملعقة طعام زنجبيل بودرة، ملعقة طعام قرنفل مطحون، ملعقة طعام كزبرة ناشفة، ملعقة طعام بابريكا، ملعقة شاى فلفل أسود مطحون، ملعقة شاى سماق "حسب الرغبة"، ملعقة شاى كركم، 1/2 ملعقة شاى حبهان "هيل" مطحون، 1/2 ملعقة شاى قرفة ناعمة".

2 كوب أرز بسمتى

القليل من الزعفران لصبغ الأرز باللون الأصفر

ملعقة طعام من البقدونس المفروم

علبة زبادى سادة

ملعقة طعام عصير ليمون

2 ملعقة طعام طحينة

2 فص ثوم مفروم

2 رغيف خبز شامى مُقطع مثلثات ومحمص أو مقلى بالزيت

ملح، فلفل أسود، كمون لتتبيل الصوص

طريقة التحضير

أولا: اللحم والخبز

يتم غسل قطع اللحم جيدا وتصفيتها من الماء الزائد، ثم نقوم بتقطيعها فى شكل شرائح طولية رفيعة مثل الشاورما.

نقوم بخلط توابل الشاورما مع بعضها البعض ونضيفها إلى شرائح اللحم، ونتركها عليها لمدة ساعتين أو أكثر، داخل الثلاجة (البراد)، لتتشرب الشرائح التتبيلة وتكتسب الطعم المطلوب.

فى مقلاة على نار متوسطة، نضع ملعقة طعام من زيت الزيتون، ونبدأ فى تسوية شرائح اللحم المتبلة سابقا، حتى تصل لدرجة التسوية المطلوبة (تستغرق حوالى من 10 – 15 دقيقة)، ثم ترفع الشرائح من على النار وتترك جانبا لتبرد قليلا.

يتم تحميص الخبز، بوضعه فى الفرن على درجة 160°م لمدة ربع ساعة تقريبا أو حتى يصبح لونه ذهبيا داكنا، أو يتم قليه فى كمية من الزيت العميق حتى يصبح ذهبى اللون. يُوضع الخبز المحمص فى طبق التقديم، كطبقة أولى فى طبق الفتة.

ثانيا: الأرز:

يُغسل الأرز جيدا بالماء الجارى، ثم يُصفى من الماء الزائد.

فى وعاء عميق، نضع ملعقة من الزيت النباتى مع الزبدة، ثم نُضيف الأرز المغسول، نضع 3 أكواب من الماء فى وعاء آخر ونُضيف له الزعفران ونتركه ليصل لدرجة مقاربة للغليان، ثم نُضيفه إلى الأرز (لكل كوب أرز بسمتى كوب ونصف من الماء)، ثم نضيف 3 ملاعق شاى من الملح، ونُقلب المكونات، وبعد غليان الماء، نهدئ النار جدا، ونُغطى الوعاء، ونضع الشياطة أسفل الوعاء، ونترك الأرز حتى يصل لتمام التسوية، ويُراعى عدم فتح غطاء الوعاء على الأرز قبل ربع ساعة من تهدئة النار. نتأكد من تسوية الأرز بتذوق جزء منه بطرف ملعقة. ثم نضع الأرز كطبقة ثانية فى طبق التقديم.

ثالثا: طبقة الصوص

تُحضر طبقة صوص الفتة، بخلط الزبادى مع الطحينة وعصير الليمون والثوم المفروم والكمون والفلفل الأسود، وتُقلب جميع المكونات جيدا مع بعضها البعض، مع إضافة اللبن فى حالة الرغبة فى الحصول على صوص خفيف وغير سميك.

توضع شرائح اللحم فوق طبقتى الخبز المحمص، والأرز، ثم توضع طبقة الصوص، ثم يتم تزيين الطبق ببعض المكسرات (حسب الرغبة)، والبقدونس المفروم.

هاه.. عجبتكوا الوصفة، لو أيوه سيبوا لنا رأيكم فى تعليق، ولو نفذتوا الوصفة صوروها وابعتوا لنا الصورة فى تعليق على صفحتنا على الفيسبوك.