دجاج كنتاكى المقرمش الجميل،

الوجبة اللى الكل بيقبل عليها، مش مجرد وجبة، دى فى الأصل قصة كفاح طويلة لإنسان، انتهت بالنجاح الباهر والشهرة العالمية.

كولونيل هارلاند ساندرز   Colonel Harland Sanders بدأ بمطعم صغير جدا فى شارع جانبى فى مدينة Corbin بولاية كنتاكى Kentucky، وكان مطعمه بسيط ونجاحه محدود، لحد ما عمل الخلطة الخاصة للدجاج، واللى أصبحت عالمية واتسمت بدجاج كنتاكى المقلى، وده لما أطلقها بشكل عالمى لأول مرة من خلال مطعم بنفس الاسم وده فى ولاية Utah سنة 1952، ومن وقتها لحد اللحظة دى، ونجاح سلسلة المطاعم دى مستمر وبيتزايد.

ساندرز بقى شخصية بارزة جدا فى التاريخ الثقافى الأمريكى، وصورته زودت شهرته وانتشاره لأنها كانت بتستخدم دايما كنوع من الدعاية على إعلانات وصور الوجبة وسلسلة المطاعم. ومن كتر النجاح اللى حققته سلسلة كنتاكى، ساندرز قرر سنة 1964 يبيع امتياز مطاعم كنتاكي لــ "جان براون" والمليونير" جاك ماسى"، مقابل مليار دولار وراتب شهري 75 ألف دولار مدى الحياة، ومقعد دائم له في مجلس الإدارة.

ستات كتير بتقول إنها مش بتعرف تعمل الفراخ المقرمشة دى فى البيت، وإن دايما فى حاجة مش بتظبط معاهم فى الوصفة فبتبوظ منهم، هنا فى المدونة هنقول شوية نصايح قبل ما نتكلم عن المكونات والوصفة، عشان نساعدك تعملى الفراخ الكنتاكى المقرمشة بصورة مبهرة فى البيت ومن غير أى بوظان. أنا جربت طرق كتير لوصفة الفراخ الكنتاكى، كانت من المشاكل اللى بلاقيها فى الوصفة دى إنها بتبات فى التتبيلة مثلا طول الليل، وبعدين بتتعمل فى البقسماط وتتقلى علطول فى الزيت، الموضوع ده بيعمل مشكلة، حتى يمكن تلاحظوها فى مطعم كنتاكى نفسه، إنه بيحبس الدم فى قطع الفراخ، وبعد عملية القلى، بتلاقى الدم عامل تجمعات على قطع الفراخ بتكون واضحة من برا ومن جوا، عشان كده بننصح ستات البيوت إنهم يسلقوا قطع الفراخ "نص سلقة"، يعنى حوالى نصف ساعة على نار هادية، قبل ما نبدأ فى تتبيلها وقليها.

مشكلة تانية بتقفل الست إنها تعمل الفراخ دى فى البيت، إنها مش بتقرمش معاها، عن تجربة، فى حركة حلوة لو عملتيها الفراخ هتقرمش معاكى وتبقى جنان، ودى هنقولها واحنا بنشرح المكونات، اللى هنكتبها بالتفصيل.

والحاجة التالتة اللى بتخليكى متعمليش الدجاج الكنتاكى فى البيت، إن الخلطة السائلة "خلطة التتبيل" مش بتكون ناجحة معاكى، أنا جربت خلطات كتير لحد ما وصلت للخلطة اللى هوصفها لكم هنا فى المدونة، واللى إن شاء الله هتتبسطى من جمالها وسهولتها. يلا نروح بسرعة نتعرف على مكونات الدجاج الكنتاكى المقرمش وطريقة تحضيره فى البيت.

طريقة عمل فراخ كنتاكى المقرمشة:

المكونات والمقادير:

دجاجة مقطعة إلى 6 أو 8 أجزاء

للتتبيلة الداخلية:

2 كوب دقيق

1 ونصف كوب لبن رايب (حليب رايب)

2 بيضة

ملعقة طعام بيكينج بودر

50 جرام نوع الجبنة المفضلة (شيدر، أو رومى، أو بارميزان)

ملعقة طعام ونصف ملح

ملعقة طعام فلفل أسود مطحون

1/2 ملعقة شاى ببريكا

للتتبيلة الخارجية (الطبقة المقرمشة):
2 كوب دقيق

3 ملاعق طعام نشا

1/2 ملعقة شاى من التوابل الآتية: (فلفل أسود مطحون، بودرة بصل، بودرة ثوم، شطة حمراء)

ملعقة شاى ملح
1/2 لتر زيت قلى

طريقة عمل فراخ كنتاكى المقرمشة: 

خطوات التحضير 

يتم سلق أجزاء الدجاج، نصف سلقة، بالطريقة المعتادة، ثم نُخرج قطع الدجاج من ماء السلق ونضعها فى مصفاة حتى تتخلص من كل كمية ماء السلق الموجودة بها وتبرد تماما.

فى حالة عدم الرغبة فى سلق الفراخ نقوم بوضع الفراخ فى التتبيلة الداخلية وتركها فى الثلاجة لمدة 12 ساعة.

أثناء فترة سلق الفراخ، نبدأ فى تحضير خلطة الدجاج "الخلطة الداخلية"، فى طبق عميق نُضيف المكونات الآتية: (2 كوب دقيق، 1 ملعقة طعام ملح، 1 ملعقة طعام فلفل أسود مطحون، 1 ملعقة طعام بيكينج بودر، 1 ونصف كوب لبن رايب، عدد 2 بيضة، 50 جرام من الجبنة، 1/2 ملعقة شاى ببريكا)، ونقوم بتقليب جميع المكونات جيدا بمضرب الخفق اليدوى، حتى نحصل على القوام المطلوب.

بعد الانتهاء من تحضير الخلطة الداخلية، وبعد سلق قطع الدجاج وتبريدها وتصفيتها من ماء السلق الزائد، نُضيف قطع الفراخ إلى الخلطة ونغلف الطبق جيدا بورق البلاستيك الشفاف، ونترك الدجاج بالخلطة داخل الثلاجة، حوالى ساعة ليتشرب التتبيلة جيدا، ويمكن إضافة ربع ملعقة شاى من كربونات الصوديوم إلى الخلطة السابقة لتسهيل عملية التسوية، كما يمكن عمل فتحات صغيرة بالسكين فى كل قطعة من قطع الدجاج للعمل على تغلغل التتبيلة داخل كل قطعة وضمان نتيجة أفضل فى التسوية.

يتم تجهيز الخلطة الجافة "خلطة القلى المقرمشة"، حيث نقوم بإضافة المكونات التالية لبعضها: (الدقيق، النشا، 1/2 ملعقة شاى من الملح والفلفل الأسود المطحون وبودرة البصل وبودرة الثوم، والشطة الحمراء الخشنة)، ونخلط جميع المكونات جيدا.

بعد مرور 12 ساعة على تتبيل قطع الدجاج فى الخلطة، نستخرج القطع من الثلاجة (البراد)، ونبدأ فى تغطيتها بالخلطة الخارجية السابقة، ونُراعى أن يتم توزيع الخلطة على كل أجزاء قطع الدجاج بحيث تغطيها بالكامل.

فى وعاء عميق، أو قلاية عميقة wok، نضع زيت القلى على نار متوسطة ونتركه حتى يسخن جدا.

نبدأ بعد ذلك فى إضافة قطع الدجاج إلى زيت القلى الساخن، ونُراعى أن نقوم بتهدئة درجة الحرارة قبل وضع قطع الدجاج، كما نُراعى كذلك أن يغمر الزيت قطع الدجاج داخل الوعاء حتى لا نضطر لتحريك القطع كثيرا داخل الزيت، مما يسبب تفكك الخلطة الخارجية.

تأخذ القطعة حوالى 7-10 دقائق فى زيت القلى لتصل لمرحلة التسوية الكاملة، ويجب ألا نُخرج قطع الدجاج من الزيت بمجرد تغير لون الطبقة الخارجية للون الذهبى البنى، لأن لون الخلطة الخارجية يتحول سريعا للون الذهبى البنى، قبل وصول لحم الدجاج من الداخل إلى التسوية الكاملة.

نستخرج قطع الدجاج، ونضعها على ورق المطبخ لنتخلص من الزيت الزائد، ثم نُقدمها مع سلطة الكول سلو والأرز البنى.

* خدع كتيرة ممكن تتعمل عشان تخلى الفراخ تقرمش معاكى بزيادة جدا، من ضمنها إنك تضيفى (كورن فليكس) بعد ما تفتتيه لأجزاء صغيرة، تضيفيه على الخلطة الخارجية السابقة، بيدى قرمشة جامدة وطعم لذيذ بيحبه الكبار والصغار. كمان ممكن تضيفى (دوريتوس) بعد ما تفتتيه لأجزاء صغيرة، تضيفيه على الخلطة الخارجية السابقة، ويا حلاوته لو كان بطعم الفلفل الحار، أو الجبنة المتبلة، بس ساعتها تراعى إنك تقللى كمية التوابل اللى فى الخلطة الخارجية عشان ميطلعش حادق وحار زيادة عن اللزوم.
* مفيش وصفة أكل فى الدنيا بتتعمل بطريقة واحدة، اتعرفى دايما على طرق جديدة لنفس الوصفة وجربيها عشان تستمتعى انتى واللى معاكى بطعم مختلف لنفس الوجبة ولو بشوية تفاصيل صغيرة جديدة عن اللى كنتى تعرفيه أو متعودة تعمليه باستمرار، التغيير مطلوب جدا فى كل حاجة وخصوصا الأكل.

طريقة عمل فراخ كنتاكى المقرمشة بطريقتى ووصفتى من حلاوتها أخواتى بيطلبوا منى أعملها لهم وياخدوها معاهم البيت، جربوها واستمتعوا بيها. 

تقدروا كمان تشوفوا طريقة عمل فراخ كنتاكى المقرمشة فيديو على يوتيوب من >>>>> هنـــــــــــا