طريقة تحضير موس الشيكولاتة ببواقي كيكة شيكولاتة


عاوزنكوا تشاركوا معانا بوصفاتكوا من بواقي الأكل ازاي بتستغلوه وتحولوه لأكلة جديدة ومحدش ياخد باله إنها بواقي.. النهاردة هنعمل لكم ببواقي كيكة الشيكولاتة، كيكة ديسباسيتو، طعمها جميل جدا، وفيها تجديد ظريف ومختلف لبواقي كيكة الشيكولاتة.. تعالوا نعملها بسرعة سوا.

 

طريقة تحضير موس الشيكولاتة ببواقي كيكة شيكولاتة:

 

المكونات:

بواقي كيكة شيكولاتة

مقادير الموس:
كوب موس بودرة
كوب لبن مثلج

مقادير الصوص
بواقي شيكولاتة
ربع كوب لبن

 

طريقة التحضير.

نغلي اللبن ونحطه على الشيكولاتة ونقلب، أو ممكن على حمام ميه.

نضرب بودره الموس مع اللبن المثلج.

 

التقديم
نحط طبقة كيك عليها شوية صوص بعد كده طبقة موس، بعدها طبقة كيك وموس تاني
وعلى الوش صوص شيكولاتة، ممكن نستخدم فراولة أو موز أو أي فاكهة تفضلوها، ممكن بدل الموس نستخدم كريم شانتيه.

ممكن لو الكيك ناشف نسقيه (سفن أب - سيريب خفيف - ماء كمبوت).

 

 دى كانت وصفتنا للاستفادة من بواقي كيكة الشيكولاتة.. عملنا معاكم موس الشيكولاتة وحولنا البواقي لوصفة جديدة لذيذة وشكلها تجنن.. لو عندكم أى استفسارات تقدروا تدخلوا على الرابط ده وتسألوا صاحبة الوصفة مباشرة عن أى حاجة تخص الوصفة.. وبالهنا.