فى أكل للرجالة، وفى أكل للستات.. بيحصل عادى جدا تلاقى فى وصفات فى الأكل بيُقبل عليها الرجال، أكتر بكتير من إقبال السيدات على أكلها، ومن الوصفات دى، المخاصى.. أعتقد إن كتير من الرجالة بيحبوا ياكلوا مخاصى، خصوصا لو طريقة تحضير مخاصى فيليه كانت سهلة بالنسبة لست البيت ومش بتلاقى صعوبة فى تحضيرها أو طبخها فى البيت.

وأنا طفلة بصراحة كنت بحب آكل المخاصى، كان بابا ربنا يديله الصحة بيعملها مخصوص بنفسه ويقدمها لى، كنت باكل أنا واحدة وهو كان بياكل واحدة.. محدش غيرنا فى البيت كان بياكلها، بس بابا كان بيسلقها عادى خالص ويقدمها لى مسلوقة وكنت بلتهمها بنهم وشغف غريب على طفلة فى ابتدائى.. وبطلنا نجيب المخاصى، وبطلت آكلها تماما لما كبرت، بس لما بيجى علينا موسم عيد الأضحى المبارك، بسترجع أيام الطفولة، وبقوم أوضب طبق مخاصى مفتخر، وبتكون طريقة تحضير مخاصى فيليه، من تخصصى وبطريقة سهلة وطعمها ظريف جدا، خصوصا لو لسه بتجربوا تاكلوا مخاصى لأول مرة. تعالوا نتعلم مع بعض طريقة تحضير مخاصى فيليه.

طريقة تحضير مخاصى فيليه:

المكـونـات:

2 قطعة مخاصى بقرة أو خروف

حبة بصل أبيض متوسطة مُقطعة شرائح

ملح، فلفل أسود، كمون

هريسة شطة حمراء (حسب الرغبة)

فص ثوم مُقطع شرائح

طريقة التحضير:

نقوم بتخلية المخاصى، حيث نعمل على قطع الحصية بالسكين من المنتصف، ثم نبدأ فى هدوء بنزع الجلد من على اللحم الطرى للخصية.

نقوم بعدها بتقطيع الخصية لشرائح متوسطة الحجم.

يتم غسل المخاصى جيدا، حيث نحضر وعاء مناسبا، ونضع به كمية مناسبة من الماء، ثم نشطفه مرتين أو ثلاثة، ثم نُصفيه تماما من الماء.

نضع مقلاة بها زيت على نار متوسطة، ويُراعى أن تكون المقلاة غير قابلة للالتصاق، حتى نحصل على النتيجة المطلوبة.

بعد أن يسخن الزيت، نبدأ فى إنزال قطع المخاصى فى المقلاة، ونُضيف لها بصلة مقطعة شرائح، ونُقلب المكونات جيدا لمدة دقيقتين.

نُضيف التوابل المختلفة، من الملح والفلفل الأسود المطحون، والكمون الناعم، ونُقلب المكونات مرة أخرى جيدا، ثم نُضيف الهريسة الحمراء الحامية، وإذا كنا لا نُفضل الطعم الحار، نستغنى عن استخدام الهريسة تماما ونستبدلها برشة من الببريكا.

نضع فص الثوم المفروم فى المقلاة، ونُقلب المكونات جيدا، ثم نتركها حتى تصل للتسوية الكاملة، حيث تستغرق فترة حوالى ربع ساعة.

تستخرج المخاصى من المقلاة، وتوضع فى طبق تقديم مناسب، وتُقدم مع سلطة الطحينة، والسلطة البلدى، ويُفضل أكلها بالخبز البلدى المصرى.

دى كانت طريقة تحضير مخاصى فيليه، أتمنى تكون سهلة بالنسبة لكم، وتقدروا تنفذوها فى البيت خصوصا فى العيد الكبير.. جربوها وبألف هنا.