كل بلد طبعا بتكون مشهورة فى العالم بأكلاتها، بيكون لها 3 أو 4 أكلات كده عاملين لها جوا وشهرة عالمية.. يعنى لما نقول إيطاليا، يبقى الباستا والبيتزا، ولما نقول المكسيك يبقى التاكوز والناتشوز، ولما نقول مصر يبقى الفول والطعمية J

أنا ساعات بيتهيألى إننا كمصريين حياتنا متنفعش من غير الفول.. بناكله فى الفطار أو العشاء أو فى وجبة السحور فى شهر رمضان المبارك.. بنحبه زى عنينا وبنعمله مع الطحينة أو سادة، ساعات بالطماطم، بناكله بزيت حلو وزيت حار.. بنلعب دايما فيه بتغيير نوع الزيت، أو بإضافة خضروات وطماطم عشان نحس بالتجديد ونرفع القيمة الغذائية بتاعته.

الفول أكلة مشبعة وغنية جدا بالبروتين، زى ما بنقول عليه (الكباب الشعبى)، ولما احنا الستات نفكر فى الفطار، خصوصا يوم الجمعة، ميجيش على بالنا غيره، الفول المدمس، مع التحابيش اللازمة والبصل الأخضر، ونضرب منه كميات مع البصل الأخضر ومتسألنيش عن ريحة الفم ازاى بتبقى عجب J

من الصور اللى محفورة فى دماغى عن الفول، مشهد لينا ومسعودى فى مسرحية المتزوجون، وهمه بكوميديا ساخرة بيتكلموا عن الفول.. وقال يعنى الفول بيجيب تناحة ويخلى المخ تخين J بس الحقيقة لما الواحد يقرا عن الفول وفوايده يتأكد تماما إن اللى اتقال فى المشهد الكوميدى ده كان للضحك وبس.. النهاردة هنعرف سوا فوايد الفول العظيمة جدا للصحة، من خلال مدونة جوا الحلة اللى هتقدم طبق الفول بشكل مختلف جدا وستايل جدا.

هنقدم لكل الأسرة طبق فتة الفول المدمس.. حاجة كده م الآخر وهمية.. تجديد جامد وشكل حلو فى التقديم ومكونات متوفرة ورخيصة، بس قبل ما نتعرف على المكونات وطريقة التحضير، نتعرف الأول على القيمة الغذائية والفوائد الصحية للفول.

فوائد الفول:

غنيّ بالبروتينات، والفيتامينات، والأملاح المعدنية، مثل الحديد والفسفور. يقاوم التّوتر والإجهاد الذي يصيب الجسم بسبب احتوائه على البروتين وبعض الفيتامينات.

مفيد لصحة القلب حيث يعمل على زيادة مستوى الكولسترول الجيّد في الدّم، ويخفّض ضغط الدّم لدى النساء في مرحلة سّن اليأس، ويحافظ على مستوى السكّر في الدّم.

يحتوي على مواد تعمل على تقوية مناعة الجسم ضّد الأمراض، كما يحتوي على نسبة عالية من الألياف التي تساعد في علاج الإمساك الذي يصيب الجسم.

المكونات:

2 علبة فول مدمس

2 حبة طماطم مُقطعة مكعبات صغيرة

ملعقة طعام من البقدونس المفروم

1 كوب لبن

عصير ليمون

2 ملعقة طعام طحينة

1 ملعقة طعام صلصة طماطم

حبة بصل أبيض مُقطعة شرائح

2 فص ثوم مُقطع شرائح

2 رغيف خبز شامى مُقطع مثلثات ومحمص أو مقلى

ملح، فلفل أسود، كمون

2 ملعقة طعام زيت زيتون

طريقة التحضير:

يُوضع زيت الزيتون فى وعاء على نار متوسطة إلى ضعيفة، ثم يُوضع البصل والثوم مع التقليب.

تُضاف قطع الطماطم وصلصة الطماطم والملح والكمون والفلفل، وتُقلب المكونات لمدة 3- 5 دقائق.

يُضاف الفول وتُقلب جميع المكونات على النار لمدة 5 دقائق.

يتم تحميص الخبز، بوضعه فى الفرن، أوقليه فى كمية من الزيت حتى يصبح ذهبى اللون.

يُوضع الخبز المحمص فى طبق التقديم، ثم تُوضع فوقه طبقة الفول مع المكونات الأخرى.

تُحضر طبقة الطحينة باللبن، بخلط كمية اللبن مع عصير الليمون والطحينة، وتُقلب جميع المكونات جيدا مع بعضها البعض، ثم تُضاف كطبقة أخيرة على طبقتى الخبز المحمص والفول فى طبق التقديم، ويُراعى أن تُفرد طبقة البن والطحينة جيدا لتغطى جميع جوانب الطبق.

يتم تزيين طبق التقديم بالبقدونس ويُقدم على مائدة الإفطار أو العشاء أو السحور.