بيقولوا إن البطاطس أكلة شعبية، هى كده فعلا، وعالمية، هى كده بردو، وبيقولوا إنها بتقبل القسمة على أى وصفة، حطوا كده البطاطس مع أى وصفة أكل، حتى لو طبق جانبى، هتظبط معاها.. احنا بنلبس أحيانا وننزل من البيت عشان ندخل مطعم بيقدم بطاطس بشكل مختلف، أو مميز، أو مش بيقدم غير البطاطس أصلا، احنا لو فكرنا فى حياتنا إيه أكتر حاجة أكلناها، هتطلع البطاطس، صح كده والا أنا ببالغ؟!

مشكلة البطاطس الوحيدة، إننا لو لزقنا فى طبخها أو تحميرها يوميا هنزهق منها أكيد، كل يوم بطاطس، أوفر جدا الصراحة، وحتى لو 3 أو 4 مرات فى الأسبوع، ملل بردو، لكن احنا هنا قررنا نكسر معاكم الملل، ونقدم وصفة جديدة من وصفات كتيرة لسه هنقدمها للبطاطس أو البطاطا زى ما بيقول عليها أهالى الشام والمغرب العربى.. وصفة النهاردة هى بطاطس بالروزمارى، لذيذة سريعة دمها خفيف فى الأكل، والبيت كله هيتخانق عليها لحد آخر قطعة منها فى الطبق. البطاطس بتحتوى على نسبة من البروتين اللى بيخلي ليها قيمة غذائية مناسبة، لأنه البروتين اللى فيها بيحتوى على نسبة عالية من الأحماض الأمينية الأساسية للجسم. كمان بتتميز البطاطس إن سعراتها الحرارية عالية، يعنى بتمد الجسم بالطاقة والنشاط.

ده بالنسبة للبطاطس، أما الروزمارى أو حصى البان أو إكليل الجبل، فله فوايد كتيرة جدا، فهو بيساعد على مكافحة مرض الزهايمر وتحسين الذاكرة ،لأنه بيحتوي على مواد فعالة مضادة للأكسدة مثل حمض الروزمانيك وعلى بعض المركبات الأخرى اللى بتمنع تكسر أو تحطم المادة الكيميائية الدماغية اللي بيسبب تكسرها إحداث مرض الزهايمر ومن أهمها الزيت الطيار وحمض العفص. ونبات إكليل الجبل له تأثير منشط للذاكرة وبيحسن القدرة على التركيز وبينشط الذاكرة، هو كمان مفيد بدرجة ملحوظة للشعر، لأنه بيؤدي إلى تماسك الشعر ومنع سقوطه ومساعدته على النمو بسبب مساعدته للدم على الوصول والتدفق إلى الرأس. بيستخدم كمان لعلاج الإفرازات المهبلية حيث تؤخذ أوراق إكليل الجبل مع قشور البلوط بأجزاء متساوية مقدار ملعقة على كوب ماء سبق غليه وتوضع فيه لمدة عشر دقائق مع تغطيته ويستعمل كغسول مهبلي وهو دافئ مرتين يوميا. بيستخدم لمقاومة التعب وضعف الأعصاب.

تعالوا بقى نتعرف مع بعض على طريقة عمل البطاطس بالروزمارى ونبدأ نعملها إن شاء الله فى البيت عندنا لو حبينا الوصفة.

المكونات:

3 حبة بطاطس (البطاطا) متوسطة الحجم

1 ملعقة طعام زيت زيتون

1 ملعقة شاى ملح

1/4 ملعقة شاى فلفل أسود مطحون (أو كمون حسب الرغبة)

3 عود روزمارى طازج (أو مجفف)

طريقة التحضير

تغسل حبات البطاطس وتجفف وتُقطع على شكل مكعبات مناسبة فى حجمها، ثم توضع فى وعاء عميق به ماء (حوالى 2 لتر)، وملح وتُسلق نصف سلقة.

تستخرج مكعبات البطاطس من الماء، وتُوضع تحت ماء الصنبور حوالى دقيقة لتفقد الحرارة الناتجة عن السلق، ثم نقوم بتقشير قشرتها الخارجية.

فى مقلاة غير قابلة للالتصاق، نضع زيت الزيتون، وبعدها نضع حبات البطاطس التى تم سلقها ثم نُضيف الملح (1/2 ملعقة شاى) والفلفل الأسود، ونُراعى أن يتم رش الملح والفلفل بحيث يُغطى جميع الحبات، بعدها نضع أعواد الروزمارى فى المقلاة.

نبدأ فى تحمير مكعبات البطاطس، وذلك على درجة حرارة متوسطة، ويراعى أن يتم تقليب المكعبات على جميع جوانبها حتى يتم تحميرها جميعا بشكل جيد، ويراعى كذلك تقليب أعواد الروزمارى على الاتجاهين حتى نستفيد بأكبر قدر من زيوتها وعطورها النفاذة الجميلة.

بعد أن يتم تحمير جميع المكعبات جيدا، يتم اختبار وصولها للتسوية التامة، وذلك بتناول قطعة لتذوقها، فإذا وصلت للتسوية التامة يتم رفع المقلاة من على النار، ووضع مكعبات البطاطس فى طبق التقديم المناسب.

يمكن أن تقدم هذه الوصفة فى وجبة الإفطار، أو العشاء، أو تُقدم كطبق جانبى مع أى وصفة أخرى من اللحوم أو الدجاج أو حتى الأسماك.

إيه رأيكم فى وصفتنا؟! سهلة؟! لو جربتوها فى البيت وحستوا إن طعمها مميز وجميل، شاركونا ده بصور وتعليقات عشان نفضل على تواصل مع بعض وبالهنا.