تشيكن سويت اند ساور ورز مكرمل

الفراخ دي ليها طريقتين والاتنين احلي من بعض طريقه 
مكلفه شويه وطريقه ابسط وهقول الاتنين

أول طريقة:

1/2 كيلوصدور فراخ مقطعه مكعبات

معلقتين كبار صويا صوص

معلقتين كبار عسل اسود +معلقه سكر

معلقتين كبار كاتشب

معلقه كبيره خل

1/4 كوب دقيق+معلقتين كبار نشا+ توابل1/2 معلقه صغيره من "ملح، فلفل، ثوم بودر، بصل بودر، بابريكا "

كوب ميه+معلقه كبيره نشا

خضار مقطع جوليان أو جوانح "فلفل رومي ، فلفل الوان، جزر، بصل"

هناخد الفراخ نتبلها بخلطه الدقيق بالنشا بالتوابل نعفرها بيه كويس اوي ونقليها لحد ماتاخد لون دهبي ونطلعها ع مناديل مطبخ.

نشوح الخضار مع بعض لحد مايدبل سنه وننزل عليه بالفراخ ونقلب 
نكون مقلبين السكر والعسل والكاتشب والصويا صوص ومعلقه صغيره من البهارات اللي حطيناها عالدقيق ومعلقه الخل نقلبهم وننزل بيهم عالخضار والفراخ ونقلب 
اول مالخليط يغلي ننزل عليه بكوبايه الميه المتزوده نشا ونقلب لحد مايغلي ويتقل وبس خلاص.

الطريقة الثانية:

بنزود كوبايه أناناس كومبوت متقطه مكعبات مع الخضار وبننقص معلقه سكر ومعلقه عسل، وبنستبدل كوبايه الميه بكوباية عصير من ميه الكومبوت معاها معلقه النشا.

الأرز المكرمل

كوب ونصف أرز بسمتي 
قرفة، ملح، كاري 
زيت أو سمنة 
ربع كوب سكر "لكوب ونص رز"

بنكرمل السكر وأول مايبقي دهبي ننزل معلقه السمنة او الزيت ونقلب وننزل التوابل ونقلب والرز ونقلب وبعدين نزود الميه.

الرز البسمتي بنحط ضعفه ميه "لكل كوب رز 2 كوب ماء" يغلي ونسيبه يستوي على نار هادية ويكون في شياطة "صفيحة" تحت الحلة بعد ما نهدى النار. وبالهنا.

لو عندكم أى استفسارات أو أسئلة عن طريقة التحضير أو المقادير اضغطوا على الرابط ده من خلاله تقدروا توجهوا أسئلتكم مباشرة لصاحبة الوصفة وتتواصلوا معاها بأى سؤال محيركم وهيكون أكيد إن شاء الله عندها الإجابة.. وبالهنا.