الدنيا ربيع والجو بديع قفلى على كل المواضيع إلا موضوع واحد متقفلش عليه وهو الرنجة.. اشتهرنا كشعب مصري فى العالم كله، إننا بنحب أكل الرنجة المدخنة جدا، وعملنا لها موسم ناكلها فيه بشراهة وهو أعياد الربيع أو شم النسيم، البيوت المصرية فى اليوم ده بتاكل رنجة تكفيها لحد السنة اللى بعدها! سمك الرنجة من الأسماك اللى بتعيش فى البحر المتوسط، وتعتبر من فصيلة الرنكات، وطبعا ميختلفش على طعمها اتنين من مُحبى النوع ده من الأسماك، وبمناسبة شم النسيم بنقدم لكم وصفة طاجن الرنجة اللذيذ، تعالوا نعرف بيتعمل ازاى.

طريقة تحضير طاجن الرنجة:

المكونات:

نصف كيلو رنجة مخلية

عصير ليمونة

2 قرن فلفل أخضر حار

بصلة مقطعة جوليان "شرائح"

2 حبة طماطم مقطعة مكعبات صغيرة

2 ملعقة كبيرة زيت زيتون "أو زيت نباتى"

2 ملعقة كبيرة طحينة

طريقة التحضير:

فى طاسة على النار نحط ٢ معلقة زيت ومعاهم البصلة يا دوب نقلبها تقليبة سريعة، ونضيف الطماطم، نشوحها ونضيف الرنجة ونقلبها تقليبة واحدة سريعة.

نحط الخلطة دي ف طاجن أو صينية وندخلها الفرن مدة من ٥ لــ ١٠ دقايق علي حسب الفرن ونحمر الوش تحت الشواية، ونطلعها نزوقها بشوية طحينة وخلاص كدة

سهلة جدا وطعمها حلو أوي.

نتمنى تكون وصفتنا سهلة وتكون عجبتكم.. لو عندكوا أى أسئلة بخصوص الوصفة، افتحوا  الرابط ده واسألوا صاحبة الوصفة.. وبالهنا.