فى حد ربنا خلقه فى العالم مش بيحب البطاطس؟! أعتقد من غير ما اضطر ألف على الناس واحد واحد إنه الإجابة مفيش! البطاطس دى فى الأكل زى الميه كده للإنسان، ضرورة أساسية لاستمرار الحياة.. هههههههههه أنا بشوفها كده، هى من ناحية الطعم لذيذة، من ناحية التحضير سريعة، من ناحية السعر رخيصة، من ناحية الوصفات كتيرة، طيب ناقصها ايه بقى البطاطس عشان تاخد المركز الأول فى مطبخك؟! ولا حاجة غير إننا نعمل بيها وصفات كتيرة جديدة ومتنوعة عشان نستمتع بيها فى أشكال وطرق مختلفة تفتح نفسنا على أكلها اكتر ما هى مفتوحة أصلا لوحدها!

البطاطس بتحتوى على نسبة من البروتين اللى بيخلي ليها قيمة غذائية مناسبة ومش مكلفة، لأنه البروتين اللى فيها بيحتوى على نسبة عالية من الأحماض الأمينية الأساسية للجسم. وكمان بتتميز البطاطس إن سعراتها الحرارية عالية، يعنى بتمد الجسم بالطاقة والنشاط، وده اللى بيخلى مطابخ كتيرة تقدمها فى أطباقها الرئيسية سواء مهروسة مع صوص الجرافى، أو مهروسة بس، أو محمرة، أو فى الفرن زى وصفتنا النهاردة، وهى أجنحة البطاطس فى الفرن Potato wedges، وأنا برشح الوصفة دى خصوصا لمُحبى الأكل الصحى، وبالرغم من إنها وصفة صحية جدا، لأنها معمولة فى الفرن وبزيت الزيتون، إلا إن طعمها رهيب من حلاوته، وناعمة جدا وبتدوب فى الفم جدا جدا، أنا عملتها مرات ومرات فى البيت والكل حبها وأقبل عليها، لدرجة فى مرة خلصنا صينية كاملة وبابا كان عاوز منها تانى بس مكنتش عاملة غير صينية واحدة بس، من أجمل ميزات الوصفة دى، إنها بتتبل بالببريكا اللى بتكسب حبات البطاطس لون أحمر جميل، وكمان طعم رائع. تعالوا بقى نتعرف مع بعض على طريقة عمل أجنحة البطاطس بالببريكا ونبدأ نعملها إن شاء الله فى البيت عندنا لو حبينا الوصفة.

المكونات:

2 حبة بطاطس (البطاطا) متوسطة الحجم

3 ملعقة طعام زيت زيتون

1 ملعقة شاى ملح
1 ملعقة شاى ببريكا

1/4 ملعقة شاى فلفل أسود مطحون (أو كمون حسب الرغبة)

1/2 ملعقة شاى زعتر مجفف

1/2 ملعقة شاى ثوم بودرة

بقدونس مفروم للتزيين

طريقة تحضير أجنحة البطاطس بالببريكا.

تغسل حبات البطاطس وتجفف وتُقطع على شكل أجنحة مناسبة فى حجمها، ثم توضع فى مصفاة لنتخلص من الماء الزائد.

بعد غسل البطاطس نضعها فى وعاء عميق ونبدأ فى تتبيلها، نضع كل التوابل المذكورة وزيت الزيتون ونخلط أجنحة البطاطس مع التوابل وزيت الزيتون جيدا لنتأكد من تكسية كل الأجنحة جيداً من كافة الجوانب.

نبدأ فى تسخين الفرن على درجة 180°م لمدة ربع ساعة.

فى صينية مناسبة نضع أجنحة البطاطس المُتبلة وندخلها الفرن لمدة نصف ساعة ثم نستخرجها وتقدم، ومن الممكن تزيينها بالبقدونس المفروم.

يمكن أن تقدم هذه الوصفة فى وجبة الإفطار، أو العشاء، أو تُقدم كطبق جانبى مع أى وصفة أخرى من اللحوم أو الدجاج أو حتى الأسماك فى وجبة الغداء.

ملحوظة مُهمة:

يُراعى تقطيع أجنحة البطاطس بسُمك غير عريض حتى لا يسبب ذلك عدم تسويتها جيدا، لذلك يُفضل تقطعيها بسُمك رفيع قدر الإمكان.

يمكن استخدام ورق الزبدة فى أرضية صينية التسوية المستخدمة لتجنب التصاق أجنحة البطاطس بالصينية، والتى قد تسبب صعوبة بعد ذلك فى استخراجها.

يُمكن عمل نفس الوصفة مع البطاطا، حيث تُقدم فى فصل الشتاء وتعطى إحساسا رائعا بالدفء.

إيه رأيكم فى وصفتنا؟! سهلة؟! لو جربتوها فى البيت وحستوا إن طعمها مميز وجميل، شاركونا ده بصور وتعليقات عشان نفضل على تواصل مع بعض وبالهنا.