طريقة تحضير أرز بني_أرز الصيادية


الرز البنى أو رز الصيادية، اللى بيتعمل مخصوص على حس وجبة سمك مُحترمة.. يعنى عشان ناكل شوية سمك مع الجبرى والسبيط، يبقى مش هيسد مع الوليمة دى غير طبق رز بنى بالبصل، يعنى المذاق الرايق والذوق العالى.

طبخ الرز عموما بمختلف أنواعه، بيكون عُقدة عند كتير من البنات والسيدات، لأسباب كتيرة، ساعات لأنه بيعجن، أو بيتلسع من القعر، ومع ستات تانية مش بيستوى من النص كويس، ومن فوق بيكون ناشف، وتلاقى الحكاية عملت أزمة للبنوتة أو العروسة الجديدة اللى واقفة تعمل الرز فى بيتها، وفعلا بتحس لما مش بيظبط الرز معاها إنها فاشلة فى شغل المطبخ، أصل الرز أساسى فى سفرة الغدا المصرية ومفيش غنى عنه. وعشان كده هنقول طريقة سهلة وسريعة لعمل الرز البني وفى خلال 10 دقايق بس وهنكتب الطريقة والمقادير بالظبط بحيث تظبط مع أى بنت أو سيدة ويطلع طعمه حلو إن شاء الله.

 

طريقة تحضير أرز بني_أرز الصيادية 

المكونات:

2 كوب أرز مصرى

2 بصلة متوسطة مفرومة أو مبشورة

2 كوب ماء صنبور

2 ملعقة شاى ملح

3 ملاعق طعام زيت ذرة

ملعقة شاى ببريكا + نصف ملعقة شاى قرفة (حسب الرغبة)

كرفس طازج مقطع رفيع

كرات طازج مُقطع رفيع

 

طريقة التحضير:

 

يُغسل الأرز جيدا بالماء الجارى، ثم يُصفى من الماء الزائد.

فى وعاء عميق، نضع الزيت النباتى، ثم نُضيف البصل المفروم ونقلبه جيدا حتى يأخذ اللون الذهبى.

أثناء تحمير البصل، نقوم بتسخين الماء، فى وعاء عميق مناسب حتى تصل لدرجة الغليان.

تُضاف كمية الأرز المغسول إلى البصل، ونضع أكواب الماء الساخن، ثم نضيف الملح، وباقى التوابل، ونُقلب جيدا ثم نُضيف الكرفس والكرَّات ونُقلب مرة أخرى.

نُقلب المكونات، وبعد غليان الماء لمدة دقيقتين مع الأرز، نهدئ النار جدا، ونُغطى الوعاء، ونضع الشياطة أسفل الوعاء، ونترك الأرز حتى يصل لتمام التسوية؛ بعد حوالى 10 دقائق، نتأكد من تسوية الأرز بتذوق جزء منه بطرف ملعقة.

يُقدم الأرز البني مع وجبات السمك المختلفة، ويُقدم معه أنواع السلطات المختلفة مثل سلطة الطحينة، والسلطة الخضراء.

 

ملحوظة:

استخدام المياه المغلية بيقلل مُدة التسوية جدا، وبيسرعها، يعنى لو راجعة من الشغل متأخرة وعايزة تنجزى الأكل بسرعة والتسوية تكون 100 – 100، اعملى الطريقة دى وهتتبسطى من نتيجتها، أهم شئ فى الموضوع تستخدمى المعيار الخاص بالميه بالظبط، يعنى لو عملتى معيار الرز بكوباية معينة يبقى لازم وضرورى معيار الميه يكون بنفس الكوباية.

دى وصفتنا للرز البني، وصفة مُجربة كتير وعلى مدار سنين طويلة، وصفة ناجحة، وهى دى الوصفة اللى بيستخدمها الشيفات فى المطاعم والفنادق، عايزين نعرف التجربة دى نجحت معاكم واللا حصل مشاكل، شاركونا رأيكم وصوركم على صفحتنا الرسمية على الفيسبوك وبألف هنا.