ممكن جدا نعمل حاجة حلوة وبكميات وتكون مش مُكلفة.. حاجة كده يعنى على قد الإيد.. وبالرغم من كده تكون شيك جدا ومبهرة فى شكلها وطعمها وطريقة تقديمها.. وصفة الحلو اللى معانا هى بسكويت بالكريم كراميل.. حاجة كده سهلة وممتعة.. تقدرى تحضريها فى 10 دقايق بس وتقدميها بأكتر من طريقة.. طريقة تحضير بسكويت بالكريم كراميل أهم ما فيها طريقة التزيين اللى فى الآخر هتظهر للكل وتعشقها العين قبل الفم.. يلا حالا نتعرف عليها بالتفصيل.

طريقة تحضير بسكويت بالكريم كراميل:

المكونات:

أولا: مقادير البراونيز.

2 باكو بسكوت سادة أى نوع

2 كيس كريم كراميل (الأكياس البودرة)

علبة قشطة المراعي

كوب كريمة حلويات سائلة

نصف كوب لبن (حليب)

طريقة التحضير.

نخلط الكريم كراميل والقشطة مع بعض كويس وبعدين نضيف الكريمة السائلة ونضرب بالمضرب حوالي ٥ دقايق أو لحد الكريمة ما تتماسك والخليط يتقل.

هنجيب البسكويت ونسقيه في الحليب ونرصه في طاجن البايركس.

نعمل طبقتين من البسكويت وبعدين نضيف نص خليط الكريمة اللي عملناه وبعدين نرص طبقتين تاني من البسكويت متغطس بالحليب وآخر طبقة نضيف باقي خليط الكريمة، و زينيه بالطريقة اللى تعجبك.

يدخل التلاجة شوية يبرد علي الأقل نص ساعة وقدميه.

التزيين:

 زي ما تحبي، أنا هنا طحنت بسكويت لوتس رشيته علي الوش وعليه صوص شيكولاتة،
ممكن تستخدمي بسكويت شاي بدل اللوتس أو ممكن بس صوص شيكولاتة زي ما تحبي وعلي حسب المتوفر عندك ابدعي وبألف هنا.

 دى كانت وصفتنا.. نتمنى تعجبكم.. ولو عندكم أى استفسارات تقدروا تدخلوا على الرابط ده وتسألوا صاحبة الوصفة مباشرة عن أى حاجة تخص الوصفة.. وبالهنا.