مساء الحلويات والكالوريهات، بنقدم لكم النهاردة طريقة تحضير ميني تشيز كيك نوتيلا

حاجة كده بونبونايه ملبسايه.. مبدئيا التشيز كيك ليها طرق كتير جدا منها علي السخن وعلى البارد وهي بتتكلف بس تستحق الصراحة، ومهما كان تكلفتها فهي أقل من الجاهزة.

طريقة تحضير مينى تشيز كيك نوتيلا:

المكونات:

أولا: طبقة البسكويت:

باكو بسكوت (اي نوع بس يكون طعمه حلو)

50  جرام زبده اللي هما ربع كوبايه

ثانيا: طبقة الكريم تشيز:

علبه كريمة خفق +١٠مكعبات كيري + ربع كوباية سكر  +نص كوباية حليب مكثف +3 معالق جيلاتين متدوبين في ربع كوباية ميه سخنة + معلقتين نوتيلا كبار

ثالثا طبقة التزيين:

صوص شيكولاته (شيكولاته خام مع لبن)

طريقة التحضير:

هانطحن البسكوت ونسيح الزبدة وننزل عليه بيها ونقلبهم كويس مع بعض لحد مايبقي شبه رمل البحر.
هانجيب بقي قوالب الكب كيك ونحط فيها ورقه زبده في الأرضية وفي الجوانب وننزل بالبسكوت ونضغط عليه جامد وندخله الفريزر 10 دقايق.

هانضرب الجبنه مع السكر وبعد كده ننزل عليهم بكريمه الخفق وبعدها الحليب المكثف ونحط عليهم الجيلاتين ونقلب كويس ونقسم الخليط 2 جزء نسيبه زي ماهو والجزء الثاني نحط عليه النوتيلا ونقلب.

هانصب بقي الجزء اللي عليه النوتيلا علي البسكوت وندخله الفريزر نص ساعه لحد الوش ما يمسك ونخرجه نصب الجزء الابيض من الكريمه وندخلها بقي الثلاجة ٣ ساعات.

نخرجها نزينها زي ما نحب، أنا مزيناها بصوص شيكولاته (شيكولاته خام مع لبن) ، ممكن تستغنوا عن الحليب المكثف، ممكن تستبدلوا النوتيلا بشيكولاته سايحة.

دى كانت وصفتنا.. نتمنى تعجبكم.. الواحده صحيح صغيره بس جبارة..

تقدروا تدخلوا على الرابط ده وتشوفوا أصل الوصفة في الجروب عندنا.. وبالهنا.