الباذنجان المقلى يعتبر طبق فاتح للشهية، بيتعمل ويتقدم مع أى وصفة تانية على سفرة الغداء خصوصا لو عملناه بالدَّقة، بينفع جدا مع وصفات المأكولات البحرية، سمك، وسبيط، وجمبرى، وغيرها كتير، بينفع جدا مع اليوم اللى فيه محشى، خصوصا لو محشى مشكل، بيبقى طبق أساسى جبن طبق الفول بالطحينة وقرص الطعمية السخنة وشوية البطاطس، طبق فاتح للشهية من الدرجة الأولى، يخليك تاكل أكتر من طاقتك، وتملا المعدة لحد ما تبقى خلاص هتنفجر، وأنت مستمر في جريمة الأكل زى ما أنت، على وضعك. يلا بينا سوا نروح على مكونات ومقادير وطريقة عمل الباذنجان المقلى بالدقة، وأحب بس أوضح إن المقادير دى خاضعة للذوق المعتدل، أما اللى بيحبوا ملح زيادة جدا وشطة زيادة جدا أو اللى بيحبوا طعم الخل يكون أوفر شوية في الباذنجان، يزدوا اللى بيحبوه وربنا يستر عليهم!

طريقة تحضير باذنجان مقلى بالدَّقة:

المكونات:

2 حبة باذنجان رومى

3 حبات فلفل أخضر حار

ثوم مفروم (رأس ثوم كاملة صغيرة)

4 ملاعق طعام خل أبيض

ملعقة ونصف طعام ملح

ملعقة صغيرة كزبرة ناشفة مطحونة

ملعقة كبيرة كمون مطحون

ملعقة كبيرة عصير ليمون

ملعقة طعام بقدونس مفروم

ملعقة طعام زيت زيتون

طريقة التحضير:

فى مقلاة عميقة ساخنة بها كمية كبيرة من زيت القلى، يتم وضع حبات الباذنجان المغسول والمجفف، وتترك على نار هادئة إلى متوسطة، مع مراعاة تقليب الباذنجان على الوجهين حتى يصل إلى التسوية المطلوبة.

أثناء تسوية الباذنجان، يتم تحضير التتبيلة، وذلك بخلط جميع المكونات السابقة، باستثناء البقدونس المفروم، فى الخلاط أو الكبة، حتى تمتزج تماما مع بعضها البعض وتعطى قواما متماسكا.

يتم استخراج الباذنجان من المقلاة ووضعه على مناديل المطبخ لامتصاص الزيت الزائد، ثم يتم وضع التتبيلة السابقة على كل قطعة باذنجان.

ثم يُرش الباذنجان بالقليل من البقدونس المفروم للتزيين وإعطاء طعم مميز.

يُمكن عمل نفس الخطوات السابقة بالضبط، ولكن مع تغيير بسيط، وهو تقليب قطع الباذنجان بعد تقطيعها وتجفيفها جيدا، فى كمية من الدقيق المخلوط بالقليل من الملح، وذلك لكى لا يمتص الباذنجان زيتاً كثيراً أثناء القلى ولإضفاء قرمشة لذيذة عليه بعد القلى.

نتمنى تكون وصفتنا عجبتكم، هى تقريبا مفيش غنى عنها فى كل بيت مصرى، خصوصا فى فطار يوم الجمعة.. إن شاء الله الوصفة تكون سهلة، جربوها وبالهنا.