الفلفل الرومى المقلى يعتبر طبق فاتح الشهية الرئيسى لبابا خصوصا على سفرة الفطار، بيحب ياكله جدا، هو والبتنجان المقلى، لدرجة إنه لما بيخلص من البيت بنزل أشترى تانى، بابا بيحب يعمله بنفسه، بيتبسط لما يقليه ويجهز له الدَّقة ويغمره فيها، ويدخل علينا على السفرة ومعاه الانتصار العظيم ده كل يوم والتانى في وجبة الفطار! وبالرغم من إن بابا محترف جدا في الحاجات دى والكل بيحب ياكلها من ايده، إلا إنى في الكام السنة اللى فاتوا بقيت ببعد عن تناولها شوية بسبب الأملاح الزيادة والشطة وكمان كمية الزيت الرهيبة اللى بيشربها الفلفل أثناء فترة القلى، وطبعا كل ده مضر بالصحة وخصوصا صحة القلب! طيب هنقول الوصفة بردو برغم كلامى ده؟! أيوه هنقولها من باب المعرفة ومن باب إننا ناكل باعتدال يعنى حلو أوى لو نعملها مرة واحدة في الأسبوع زى يوم الجمعة أو السبت الصبح كده واحنا اجازة ورايقين.. تعالوا نتعرف سوا على الطريقة والمقادير.

طريقة تحضير فلفل رومى مقلى بالدَّقة:

المكونات:

4 حبات فلفل رومى

3 حبات فلفل أخضر حار

ثوم مفروم (رأس ثوم كاملة صغيرة)

2 ملعقة كبيرة خل أبيض

ملعقة كبيرة ممسوحة ملح

ملعقة صغيرة كزبرة ناشفة مطحونة

1/2 ملعقة كبيرة كمون مطحون

عصير ليمونة

ملعقة طعام بقدونس مفروم

ملعقة طعام زيت زيتون

طريقة التحضير:

فى مقلاة عميقة ساخنة بها كمية كبيرة من زيت القلى، يتم وضع حبات الفلفل الرومى المغسول والمجفف، وتترك على نار هادئة إلى متوسطة، مع مراعاة تقليب الفلفل على جميع الجوانب أثناء القلى، حتى يصل إلى التسوية المطلوبة.

أثناء تسوية الفلفل الرومى، يتم تحضير التتبيلة، وذلك بخلط جميع المكونات السابقة، باستثناء البقدونس المفروم، فى الخلاط أو الكبة، حتى تمتزج تماما مع بعضها البعض وتعطى قواما متماسكا.

يتم استخراج الفلفل الرومى من المقلاة  ويوضع على مناديل المطبخ لامتصاص الزيت الزائد، ثم يتم وضع التتبيلة السابقة على كل القطع.

يمكن قلى الفلفل الرومى سليما كما هو، ويمكن تقطيعه إلى أنصاف ونزع البذور من الداخل ثم قليه على شكل شرائح نصفية طولية.

نتمنى تكون وصفتنا عجبتكم، هى تقريبا مفيش غنى عنها فى كل بيت مصرى، خصوصا فى فطار يوم الجمعة، إن شاء الله الوصفة تكون سهلة، جربوها وبالهنا.