أعطنى طبقا مكسيكيا من الناتشوز ثم اتركنى معه وحدى!! ده الإحساس الوحيد اللى بيمتلكنى قدام أطباق الناتشوز المكسيكية بمختلف حشواتاها وبمختلف الصوصات اللى بتضاف عليها! أنا أساسا شخص مبهور بالمطبخ المكسيكى وبكل وصفاته تقريبا، وده يعتبر شئ غريب، خصوصا إنى مش من عشاق الأكل الحار المشطشط، بس سبحان الله، آجى عند الوصفات المكسيكية واتغير كده، وأحب أجرب الوصفات الحارة بتاعتهم معرفش ليه أو ازاى، كل اللى أعرف إنها بتشدنى شكلا وموضوعا ليها، ولما لاقيت الحكاية بقت صعبة، وإنى كل يوم والتانى نفسى آكل وصفة مكسيكى، وخصوصا التاكوز والناتشوز، قلت ما بدهاش يا إيمان، لازم تتعلمى تعملى الكلام ده فى البيت توفيرا لصحتك ولميزانية البيت، أخدت القرار وعملت لأول مرة صينية ناتشوز وكان يوم جمعة فى السفرة العائلية اللى بتجمعنا كلنا فى بيت بابا.. وحرفيا قبل ما تتحط باقى الأصناف على ترابيزة الأكل، كانت صينية الناتشوز بالفراخ اللى غرقانة فى صوص الباربيكيو والشيلى.. خلصانة، ولاقيت الكل بينادى عليا من المطبخ وبيقولى عاوزين واحدة تانية، بس مكن شفى واحدة تانية الصراحة، ومن ساعتها والكل بيطلب منى أحضر الوصفة دى عشان ياكلوها من ايدى مش من المحلات أو المطاعم.

من الحاجات الظريفة اللى حسيت إنى عملتها فى المطبخ، وخصوصا مع تنفيذ وصفة ناتشوز الفراخ، إنى استخدمت العيش "البتاو" الفلاحى المصرى الأصيل بتاعنا، بدل من شرايح عيش التورتيا المكسيكى، حسيت في تشابه كبير من النوعين دول من العيش، وقلت لازم أسيب البصمة بتاعتى على الوصفة، وكانت تجربة ناجحة 100% لكل ست تحب تجربها، وصبغة الوصفة المكسيكية الخالصة بصبغتنا المصرية، كمان فى مرات تانية استخدمت فيها شرايح الدوريتوس، اشتريت أكياس دوريتوس بطعم الجبنة، وفردتهم فى الصينية بدل عيش التورتيا، وكانت طعمها جميل، واللى كان مميزه، إن العيش نفسه عليه توابله اللى بتخلى لطعم الوصفة طابع خاص ومميز بالنكهات اللى فيها.

أتمنى من كل بنت وست سواء عاملة أو غير عاملة، إنها لما تشوف وصفة تحاول تبتكر فيها، تحط شخصيتها أو شخصية المطبخ بتاعها جوه الوصفة، تكون مُبدعة قدر الإمكان، أتمنى إن كل بنت وسيدة تعرف كويس إن وصفة الأكل م شئ مُقدس، مش بيتعمل غير بطريقة واحدة، ده مش صحيح، لازم تكون كل واحدة فينا متأكدة إن الوصفة الواحدة ممكن تتعمل بـ100 طريقة، مُجرد إننا ندخل مُكون جديد أو نحط إضافة جديدة على نفس الوصفة نبقى غيرنا فيها وخليناها ليها طعم وطابع جديد، ويا سلام لو التغيير ده هو اللى بيناسب طبعنا وذوقنا فى الأكل، لأن من الغريب لما واحدة تشوف وصفة بطريقة غير اللى هى بتعملها بيها، تقول : "مش بتتعمل كده!"، دى بتتعمل بألف طريقة مختلفة عن اللى انتى بتعرفيها بس انتى متعرفيش أو مش بتحاولى تجربى وتغيرى!! يا ريت نحاول نجرب كتير فى وصفاتنا ونغير كتير فى طريقة تنفيذها ولو بإضافة مُكون واحد جديد، عشان نعيش تجارب كتيرة ومثيرة فى الأكل. النهاردة هعمل معاكم وصفة ناتشوز الفراخ بصوص الباربيكيو والشطة الحمراء الحامية، وصفة مكسيكية رائعة الجمال.

المكونات:

للحشوة:

1/2 كيلو صدور دجاج مخلية من العظم ومُقطعة مكعبات صغيرة

1/2 ملعقة طعام فلفل أحمر حار أو (صلصة شيلى الحارة) chili sauce

2 ملعقة طعام زيت زيتون

2 ملعقة طعام جبنة شيدر مبشورة

200 جرام جبنة موتزاريلا

شرائح من البصل

شرائح من الطماطم مُقطعة على شكل مُكعبات صغيرة

شرائح زيتون أسود مخلى من البذوز

ملح، فلفل أسود، بودرة ثوم

خبز التورتيا

لصوص الباربيكيو:

1 ملعقة طعام فلفل أحمر حار خشن

1 ملعقة طعام ببريكا

1 ملعقة شاى كركم بودرة

1 ملعقة شاى كمون مطحون

1/4  ملعقة شاى ثوم بودرة

1/4 كوب سكر بنى أو أبيض

1 كوب كاتشاب

1/4 كوب خل التفاح

1/4 كوب ماء صنبور

2 ملعقة طعام عسل أسود

1 ملعقة طعام ويرشيستر صوص

1 ملعقة شاى عجينة ثوم

1 ملعقة شاى فلفل أسود مطحون

للصلصة الوردية Rose sauce

2 ملعقة طعام مايونيز

1 ملعقة طعام صوص أحمر حار chili sauce

طريقة تحضير ناتشوز الدجاج:

يتم تتبيل قطع الدجاج باستخدام الملح والفلفل الأسود والفلفل الأحمر الحار وبودرة الثوم، وذلك برشها على قطع صدور الدجاج من الوجهين.

تترك قطع صدور الدجاج لمدة ربع إلى نصف ساعة حتى تتشرب التوابل جيدا.

فى مقلاة ساخنة نضع زيت الزيتون، ثم نضع قطع صدور الدجاج المُتبلة لتسويتها، ويراعى التحمير على نار هادئة إلى متوسطة، مع تقليب القطع على الوجهين، ثم نقوم بإضافة صوص الباربيكيو على قطع الدجاج، مع الاستمرار فى التقلب حتى تختلط جميع التوابل والمكونات تماما مع قطع الدجاج، وبعد تمام التسوية، يتم استخراج قطع الدجاج وتركها حتى تبرد قليلا. 

لطريقة عمل صوص الباربكيو اضغط على الرابط 

يتم إحضار صينية مُناسبة، لنبدأ فى رص طبقات الناتشوز، حيث نضع شرائح خبز التورتيا (تُباع جاهزة فى المحلات الكبيرة)، ونضع فوقها شرائح البصل والطماطم ونصف كمية قطع الدجاج التى سبق وقمنا بتجهيزها، كذلك نضع شرائح الزيتون ونصف كمية الجبنة الشيدر والجبنة الموتزاريلا.

نقوم بعد ذلك بتكرار رص الطبقات مرة أخرى وبنفس الطريقة، مع مراعاة أن تُغطى طبقة الجبنة الشيدر والموتزاريلا وجه الصينية بالكامل.

فى درجة حرارة 180°م، نُدخل الصينية للفرن لمدة حوالى ربع ساعة (15 دقيقة)، حتى تذوب طبقة الجبنة تماما وتختلط جيدا مع باقى المكونات.

نُخرج الصينية ونقوم بتزيينها بالقليل من الجبنة الكريمى أو الزبادى السادة، وكذلك بوضع شرائح من ثمرة الأفوكادو مع رش القيل من البقدونس المفروم، وتُقدم مع صلصة بيكو دى جايو.

أتمنى تكون وصفتنا سهلة، وهى بصراحة سريعة جدا فى تحضيرها، يعنى مدة التحضير ربع ساعة، وتقعد ربع ساعة تانية فى الفرن وتتاكل، يعنى فى خلال نص ساعة بس تقدرى تعملى وصفة تكون جميلة ومُشبعة لأهل بيتك ومن غير مجهود كبير. يا ريت لو جربتوا الوصفة بتاعتنا وعجبتكم تبعتوا لنا رأيكم على صفحتنا على الفيسبوك وصور الوصفة لو كانت معاكم، وبالهنا.