مين مننا مبيحطش كيس العيش الفينو اللي باقي فالفريزر أو التلاجة ويرجع يحمصه ويحوّله لبقسماط، وفي ناس طبعا بترميه، طب احنا ممكن نعمل حاجه تانية منه سهلة وسريعة و جميلة وهتبهر الولاد وكمان الضيوف، ميني بيتزا العيش الفينو، سهلة وسريعة.

طريقة تحضير ميني بيتزا ببواقي العيش الفينو:

المكونات:

بواقي عيش فينو

أي جبنة متاحة عندك(شيدر-رومى-موتزريلا)

بسطرمة أو لانشون مدخن

زيتون حسب الحاجة

كاتشب أو باربيكيو صوص

طماطم وفلفل حسب الرغبة

رشه زعتر

طريقة التحضير.

نقطع العيش الفينو زي الصورة، وندهنه بالكاتشب أو صوص الباربيكيو.

نحط نوع الجبنة اللي بنفضلها أو المتاحة في البيت، ونضيف شرايح بسطرمة أو لانشون مدخن ونضيف على الوش جبنة موتزريلا أو رومي أو شيدر وشرائح زيتون مخلى من البذور، ممكن كمان تضيفوا شرائح طماطم أو شرائح فلفل أخضر رومي.

نضيف الزعتر على الوش.

و نحط الفينو في صينية مناسبة بعد ما ندهنها بفرشاة خفيفة بشوية زيت زيتون، وندخلها الفرن على ١٨٠°م لمدة 10 دقايق عشان الجبنة تسيح والعيش يقرمش، و بالهنا و الشفا.

 أحلى حاجة في الوصفة دي إنها ملهاش ثوابت اللي بنحبه أو متوفر في البيت نستعمله.. دى كانت وصفتنا.. نتمنى تعجبكم.. ولو عندكم أى استفسارات تقدروا تدخلوا على الرابط ده وتسألوا صاحبة الوصفة مباشرة عن أى حاجة تخص الوصفة.. وبالهنا.