لو فكرنا فى كمية الأكل البواقي والبايت فى التلاجة اللى بنرميها كل يوم، هنزعل أوى من تصرفنا دى .. ده غير إنه بيضر الميزانية بشكل رئيسى.. احنا فى جوا الحلة عملنا باب ثابت بنطرح فيه الأفكار العملية الذكية السهلة للاستفادة من بواقي الأكل والاستفادة من الأكل البايت وتحويلها لوصفة جديدة سهلة وطعمها جميل.. ياريت تشاركونا بأفكاركوا فى كومنت على الموضوع أو فى جروب جوا الحلة مع مشروع #بايتاباقى .. وقولوا لنا ازاي بتستفيدوا من بواقي الأكل ازاى عشان تعملوا منها أكلة جميلة وجديدة.

كنت بعمل مكرونة بالبشاميل و زاد شوية لحمة مفرومة وشوية بشاميل، أرميهم طيب، لأ طبعا، عملت منهم صينية بطاطس باللحمة المفرومة.

طريقة تحضير صينية بطاطس ببواقي لحمة مفرومة وبشاميل:

المكونات:

بطاطس متقطعة دوائر رفيعة ومقلية

بواقي لحمة مفرومة

بواقي بشاميل (كوباية مثلا)

٣ قطع جبنة لافشكيري

جبنه شيدر وموتزريلا

طريقة التحضير.

حطيت الجبن اللافشكيري على البشاميل وقلبتهم كويس مع بعض.

في صينيه مقاسها مناسب، نرص البطاطس ونحط عليها طبقة لحمة مفرومة، بعد كده بطاطس تاني وعلى الوش البشاميل وآخر حاجة الجبنة، وندخلها الفرن ربع ساعة وبعدين نفتح الشواية عليها لمدة خمس دقايق عشان تاخد لون حلو.

بجد حلوه أوي ومختلفة وسهلة كمان جربوها، وبالهنا.

 دى كانت وصفتنا.. نتمنى تعجبكم.. ولو عندكم أى استفسارات تقدروا تدخلوا على الرابط ده وتسألوا صاحبة الوصفة مباشرة عن أى حاجة تخص الوصفة.. وبالهنا.