هنا فى قسم بايتاباقى بنحاول نوفر كل وصفات الأكل وطرق تحضيرها الخاصة ببواقى الأكل. ليه نرمى بواقى الأكل؟ لما ممكن نستفيد منها ونعمل وصفة جديدة كاملة طعمها جميل وشكلها رائع!! 

الوصفة دي لكل الناس اللى عندهم بواقي كيك الشيكولاتة، مخصوصة للناس اللي بتحب تغرق في طعم الشيكولاتة، حاجه كده جنان من جوا وروعة من برا. 

طريقة تحضير طاجن الشيكولاتة بالنوتيلا ببواقي كيكة:

المكونات:

بواقي كيكة شوكولاتة مفتت

نص كوب كريمة حلويات

كوب نوتيلا

نص كوب لبن

فراولة 

آيس كريم فانيليا

طريقة التحضير.

نسخن الكريمة واللبن كويس ونرفعها من على النار ونضيف النوتيلا ونقلب كويس يبقى صوص بس مش تقيل اوي.

فى الطاجن نرص طبقة من الكيك ونعرفها صوص ونحط عليها قطع فراولة صغيرة كتيرة.

نحط طبقة تانية من الكيك ونغطيها بالصوص.

للتزيين:
 

نحط فراولة وآيس كريم على الوش.

 دى كانت وصفتنا للاستفادة من بواقي كيكة شيكولاتة.. عملنا منها طاجن الشيكولاتة بالنوتيلا وحولنا البواقي لوصفة جديدة لذيذة وشكلها يجنن، وتنفع جدا تتقدم لضيوف عندنا خصوصا في سهرة جميلة في ليل صيفي.. لو عندكم أى استفسارات تقدروا تدخلوا على الرابط ده وتسألوا صاحبة الوصفة مباشرة عن أى حاجة تخص الوصفة.. وبالهنا.