لو عندك باقي كيك او تورته مترمهاش هنغير من شكلها و نعملها بطريقه مختلفه والولاد هتستمتع بيها جدا، و تنفع لعيد ميلاد او مناسبه، هنعمل كيك بوبس ببواقي تورتة أو كيكة، طريقتها سهلة جدا ومش هتاخد منك أى وقت.

طريقة تحضير كيك بوبس ببواقي تورتة أو كيكة:

المكونات:

بواقي كيكة أو تورتة

حليب مكثف محلى (ممكن نستبدله بكريم شانتيه مخفوق أو جبنة كريمي)

شوكولاتة خام بيضاء

شوكولاتة خام غامقة

معلقتين كبار زيت 

ألوان شوكولاتة

سبرينكيلز

عصيان كيك بوبس

طريقة التحضير.

بواقي كيك فرمته وحطيت عليه حليب مكثف محلى (ملوش معيار) لما تحسي إن الكيك ماسك ينفع يتشكل بس مش ناشف اوي عشان الطعم يبقى حلو، شكليه كور ودخليه التلاجة يمسك شوية.

التـزيـيـن:
شوكولاتة غامقة وشوكولاتة بيضة، على حمام ميه عليها معلقة زيت نباتي،
حطيت العصاية في الشيكولاته وغرزتها في الكورة، حطيت الكور في الشوكولاتة وزينتها بسبرينكيلز مختلفة، والشوكولاتة البيضة لونت منها شويه بألوان سائله للشيكولاتة.

 دى كانت وصفتنا للاستفادة من بواقي تورتة أو كيكة.. عملنا منها كيك بوبس وحولنا البواقي لوصفة جديدة لذيذة وشكلها يجنن، وتنفع جدا في أعياد ميلاد الأطفال، أو في حفلة في يوم مدرسي.. لو عندكم أى استفسارات تقدروا تدخلوا على الرابط ده وتسألوا صاحبة الوصفة مباشرة عن أى حاجة تخص الوصفة.. وبالهنا.