فى البحر سمكة، بتزق سمكة، على الشط واقف، صياد بشبكة!! أغانى جميلة اتعملت عشان تحكى للأطفال، قصة كفاح الصيادين فى كسب لُقمة العيش، والنزول للبحر كل يوم عشان صيد أنواع السمك المختلفة، اللحم الطرى الشهى، اللى بيعشقه الناس وخصوصا سكان المناطق الساحلية.. الصيد هواية رائعة بتعلم الصبر وطول البال، وكمان بتنفع أصحابها فى الحصول على اكلة سمك شهية، من رزق ربنا أعطاه للجميع من خلال ثروة سمكية كبيرة متوفرة فى البحار والأنهار.. ومن انواع السمك المُحببة جدا للشعب المصرى، السمك البورى، اللى بيستخدمه المصريين كتير فى صناعة السمك المملح (الفسيخ)، واللى بيتاكل فى أعياد شم النسيم، كمان السمك البورى بيبقى لذيذ جدا لو اتعمل مشوى، زى وصفتنا النهاردة، اللى بتقدمها لنا مدام ولاء، وهى طريقة تحضير سمك بورى مشوى بالرَّدة، وهنتعرف مع بعض من خلال الوصفة على طريقة الشوى بشكل سهل وبسيط فى البيت، ونقدر من خلالها ناخد طعم أحلى بمراحل من محلات السمك، مع كل التقدير للوصفات اللى بتتقدم فيها، والخبرات اللى موجودة عند كل شيف فى كل محل أسماك.  

 طريقة تحضير سمك بورى مشوى بالرَّدة، وصفة سريعة، مش هتاخد منكم وقت فى التحضير، خصوصا لو اشتريتوا السمك ونضفتوه فى المحل، يعنى كل المطلوب وقتها مننا، نعمله علطول، ونستمتع وسط أسرتنا أو ضيوفنا برائحة الشوى، اللى بتخلينا نجوع جدا، كمان مننساش إن السمك المشوى، وصفة هايلة لمرضى السُكر، وللناس اللى عاوزة تنزل من وزنها. 

طريقة تحضير سمك بورى مشوى بالرَّدة: 

المكونات:

كيلو سمك بورى

ربع كيلو ردَّة (يتم شراؤها من العطار)

للحشوة:

1/2 ملعقة شاى ملح أو أكثر قليلا حسب الرغبة

1/2 ملعقة طعام كمون مطحون

بشر ليمونة

فص ثوم مفروم

بصلة مُقطعة شرائح صغيرة

رشة فلفل أحمر حار (حسب الرغبة)

بقدونس طازج مفروم

كزبرة طازجة مفرومة

طماطم مُقطعة شرائح صغيرة

فلفل ألوان مُقطع شرائح صغيرة

2 ملعقة طعام زيت زيتون

طريقة التحضير:

يتم غسل السمك البورى جيدا بالماء والملح والخل والليمون، ويُراعى غسل الخاشيم جيدا، للتخلص من رائحة الزفارة، ثم تُصفى الأسماك من الماء الزائد.

نبدأ فى تحضير خلطة الحشوة، ففى المدق الخشبى، نضع التوابل، الملح وبشر الليمون والثوم المفروم والبصل، وباستخدام اليد الخشبية للمدق، نبدأ فى دق المكونات وخلطها جيدا مع بعضها البعض مع مراعاة عدم المبالغة فى الدق والتنعيم.

نضيف إلي الخليط السابق، الخُضرة الطازجة، وذلك بعد تقطيعها بالسكين إلى شرائح رفيعة طولية، حيث نُضيف البقدونس والكزبرة إلى الخليط، ونبدأ فى عملية دق المكونات مرة أخرى مع بعضها البعض، مع مراعاة إضافة زيت الزيتون أثناء عملية الدق، حتى يُصبح الخليط متجانسا وناعما.

نضع الحشوة فى قلب السمك البورى، بحيث يملأ التجويف البطنى للسمكة بالكامل.

على شواية أو صاجة مناسبة، نضع كمية من الملح الخشن على الشواية، لمنع التصاق السمك بالشواية أو الصاجة.

نغمر السمك فى الردَّة من جميع الجوانب، ونتأكد من أن الرَّدة غطت السمك جيدا من كل جانب.

على درجة حرارة عالية، حوالى 220م، نضع السمك على الشواية، أو فى الفرن، حسب المتوفر، ونقوم بشويه، مع مُراعاة التقليب المستمر للسمك على كل جانب.

تستغرق عملية تسوية السمك على الشواية حوالى ثلث ساعة، نرفع السمك بعدها ونضعه فى طبق تقديم مُناسب، ونعصر على السمك من الخارج ليمونة لإعطائه طعما حامضيا رائعا، كما أن عصير الليمون على القشرة يساعد فى سرعة نزعها وفصلها عن جسم السمكة.

يقدم السمك البورى المشوى مع سلطة الطحينة وسلطة بابا غنوج وأرز الصيادية

دى كانت طريقة تحضير سمك بورى مشوى بالرَّدة، سهلة وسريعة، بتحتاج 10 دقايق للتحضير، وتلت ساعة للشوى، يعنى فى نص ساعة بس يبقى عندنا أحلى وجبة غداء.. وعشان تتعرفوا أكتر على صاحبة الوصفة، اضغطوا على الرابط ده، وبالهنا.