في الفترة الأخيرة زادت حملات توعية الناس بأهمية شرب المياه بنسب كبيرة يوميا. طبعا ده أساسى حوالى 3 لتر يوميا. وده مش بس عشان نضارة البشرة والحفاظ على الشباب، لكن أيضا لأنها شيء مهم وأساسى في التخلص من جفاف الجسم والحفاظ على ترطيبه على مدار اليوم.

ولأن الواحد ممكن يزهق من شرب المياه، خاصة لو بتتمرن كتير وبتحب تشرب سوائل وقت التمرين، ويتجه لشرب العصائر إللى ممكن تكون بتحتوى على نسب عالية من السكر الضار، فكرنا أننا نكتب موضوع عن طريقة عمل ديتوكس الماء Detox Water   أو Infused Water  .

يعنى ايه ديتوكس؟

الكلمة بالانجليزية هي Detoxification  والاختصار Detox  وباللغة العربية ترجمتها إزالة السمية، وهى عملية الإزالة الفسيولوجية أو الطبية للمواد السامة والمواد غير الصحية من الكائنات الحية بما في ذلك جسم الإنسان.

ومشروب الديتوكس هو مشروب الماء المضاف إليها قطع من الفواكه والأعشاب، انتشر بسرعة لأنه سهل وسريع جدا في تحضيره وفى نفس الوقت مهم جدا في فوائده. ومن أهم فوائده:

• التحكم في الشهية ودعم حرق الدهون للناس اللى بتحاول تخس أو تظبط أكلها.
• الترطيب الدائم، وناخد بالنا أن جفاف الجسم يبطئ عملية حرق الدهون، الناس إللى بتحاول تفقد وزن تاخد بالها من الموضوع ده جدا.
• بيطهر الجسم من السموم، حرق السعرات قد يكوّن بعض السموم في الجسم، المياه دورها هام جدا في التخلص من هذه السموم.
• هضم الطعام بطريقة سليمة ومنع حالات الإمساك.
•  تحقيق التوازن في درجة الحموضة، حماية الجهاز المناعى، إدارة الوزن وتنظيم نسبة السكر في الدم.

كما أن مياه الديتوكس بالليمون بالأخص معروف عنها أن لها فوائد كثيرة للبشرة والتجميل، تحافظ على البشرة صحية ونضرة، وتحافظ على صحة الكلى وتوفر نسبة جيدة من فيتامين سى للجسم والبشرة.  

طريقة عمل ديتوكس الماء:

زى ما قلنا قبل كدة، الموضوع سهل جدا ومش محتاج تحضير، تقدروا تصحوا الصبح أو قبل ما تروحوا الجيم وتعملوها بالمكونات المتوفرة في البيت مش هياخد أكتر من 5 دقائق.

احنا بس هنتكلم عن أشهر التكوينات المعروفة وهنكتب النسب الدارجة لواحد لتر مياه، وعليكم تختاروا النكهات المفضلة وعدد القطع الأنسب، ويمكن تركيب نكهات جديدة مع بعضها حسب الذوق. وممكن تغيير نسبة المياه أيضا.

أهم وأشهر تركيبات الديتوكس:

• فراولة، رمان

1 لتر مياه، 6 فراولة مقطعة، نصف رمانة

• شاى أخضر، نعناع، ليمون أخضر

1 لتر مياه، 2 ليمون أخضر مقطع، 2 ملعقة صغيرة شاى أخضر

• فراولة، زعتر

1 لتر مياه، 6 فراولة مقطعة، 2 عود زعتر

• خيار، ليمون أخضر، ليمون أصفر

1 لتر مياه، نصف خيار مقطع، 1 ليمون أخضر مقطع، 1 ليمون أصفر مقطع

• فراولة، ريحان

1 لتر مياه، 6 فراولة مقطع، 2 عود ريحان صغير

• توت أحمر، روزمارى

1 لتر مياه، نصف كوب صغير توت أحمر، 2 عود روزمارى

• تفاح أحمر، قرفة

1 لتر مياه، نصف تفاحة مقطعة، 1 عود قرفة

• بطيخ، ليمون أصفر، زنجبيل خام

1 لتر مياه، 3 قطع بطيخ صغيرة، نصف ليمون أصفر مقطع، 3 قطع زنجبيل مقطع

• برتقال، نعناع

1 لتر مياه، برتقالة مقطعة، أوراق نعناع حسب الرغبة

• برتقال، ليمون أصفر، ليمون أخضر

1 لتر مياه، نصف برتقالة مقطع، 1 ليمون أصفر مقطع، 1 ليمون أخضر مقطع

• جريبفروت، نعناع

نصف جريبفروت مقطع، أوراق نعناع حسب الرغبة

• توت أزرق، ريحان

نصف كوب توت أزرق، 2 عود ريحان صغير

• تفاح أخضر، خيار

1 لتر مياه، نصف تفاحة مقطعة، نصف خيار مقطع  

• خوخ، كيوى

1 لتر مياه، نصف خوخ مقطع، 2 حبة كيوى مقطع

النسب والكميات بردو هتعتمد على ذوقك، يعنى لو عايز/ة النكهة تكون خفيفة ضيف عدد قطع قليل من المكونات على كمية مياه كبيرة، لو بتحبها مركزة ضيف عدد قطع أكبر على كمية مياه أقل. شدة النكهة هتعتمد كمان على مدة نقع المكونات في المياه.

وناخد بالنا أن في بعض المكونات نكهتها بتظهر بسرعة في المياه زى الخيار والنعناع، عكس الروزمارى والتوت هتحتاج تبات في المياه عشان طعمها يبان.

الوقت المفضل لنقع المكونات في المياه هو من ساعة إلى ساعتين، لو محتاجين نكهة أقوى ومدة أطول للنقع يبقى لازم نحطها في الثلاجة حتى لا تكوّن بكتيريا. ولو عاملين عزومة وناويين نقدم كمية كبيرة للضيوف في دسبنسر مثلا، يبقى نحط معاها مكعبات ثلج بكثرة حتى تظل طازجة.

لو فات على المكونات مدة طويلة وحابب تزود عليها مياه، يجب التأكد من نضارتها وصلاحيتها ورائحتها أولا، يعتمد على تقديرك الشخصي وعلى مدة تركها. الليمون أكتر حاجة ممكن يضاف إليها مياه جديدة، إذا ظلت فترة طويلة في الخارج خاصة لو في حرارة عالية يجب التخلص من المكونات واستخدام مكونات جديدة.

نتمنى الموضوع يحوز على إعجابكم ولو جربتم الطريقة بانتظام عرفونا النتيجة كانت ايه. شاركو صور الديتوكس بتاعكم معانا على صفحتنا على فيسبوك خاصة لو عملتم تكوينات جديدة وطلع طعمها حلو.