من حق كل مواطن إنه ياكل، مقلناش حاجة، بس مهم جدا إن الواحد(ة) يفكر كويس فى صحته اللى الأكل الدليفيرى بيسبب لها مشاكل، ومهم كمان نفكر فى الميزانية اللى لو خَرَّمِت يبقى على باقى الشهر يا رحمان يا رحيم، وهنعيش دور المتسولين.

أنا كنت بطلع تعبى مع الأكل الدليفيرى زيكوا، وكنت بحب جدا وصفات المطبخ المكسيكى، المبدعة، المشطشطة جدا، تلاقيها بتجبرك على الوقوع فى غرامها، حتى لو مكنتش من محبى الأكل الحار، وصفات المطبخ المكسيكى سريعة وسهلة التحضير، وتنفع جدا للرجالة عشان ينفذوها، وتنفع أوى للبنات والستات اللى لسه بيقولوا يا هادى فى المطبخ.

النهاردة هعمل معاكم وصفة مكسيكية وهى كساديا الدجاج.. فكرة رغيف الكاساديا قايمة على الحشوة فى الأساس، واللى ممكن تكون زى ما نحب، فراخ ماشى، لحمة شغال، جمبرى يا حلاوته يا شقاوته، المهم إننا نستمتع بالحشوة المُفضلة لينا، جوا رغيف عيش التورتيا الرهيب المخبوز بالذرة أو بالقمح.

المطبخ المكسيكى له خصائص مميز بيها، وبيختلف طريقة تحضير الوصفات فيه حسب المنطقة أو القبيلة، وهنلاقى أغلب وصفاته متأثر فيها بالمطبخ الأسبانى. عشان تتعرفوا عن قرب على المطبخ المكسيكى افتحوا الرابط ده

النهاردة هنعرف سوا طريقة تحضير كساديا الدجاج ونستمتع بالطعم فى كل خطوة من خطوات إعداده وتحضيره.. يلا بينا

طريقة تحضير كساديا الدجاج:

المكونات:

للحشوة:

1/2 كيلو صدور الدجاج المخلية

بصلة صغيرة مُقطعة على شكل هلال "جوليان"

رشة ملح

رشة فلفل

فلفل ألوان

توابل التاكو 

ملعقة طعام زيت زيتون

جبنة شيدر مبشورة

جبنة موتزاريلا مبشورة

خبز التورتيا

طريقة التحضير:

يتم تتبيل قطع الدجاج باستخدام بهارات التاكو، وذلك بخلط جميع مكوناتها جيدا مع بعضها البعض، ثم رشها على قطع صدور الدجاج من الوجهين.

تترك قطع صدور الدجاج لمدة ربع إلى نصف ساعة حتى تتشرب توابل التاكو جيدا.

فى مقلاة بها زيت نباتى تم تسخينه، نضع شرائح البصل، ونعمل على تشويحها لمدة دقيقتين، ثم نضع شرائح الفلفل الألوان ونعمل على تشويحها لمدة دقيقتين أخريين مع البصل.

نرفع البصل والفلفل الألوان من المقلاة ثم نضع قطع صدور الدجاج المُتبلة لتحميرها، ويراعى التحمير على نار هادئة إلى متوسطة، مع تقليب القطع على الوجهين، ونقوم بإضافة رشة الملح ورشة الفلفل الأسود، ونُقلب مرة أخرى حتى تمام التسوية.

يتم استخراج الدجاج بعد تحميره ويترك حتى يبرد قليلا.

يتم إحضار خبز التورتيا (تُباع جاهزة فى المحلات الكبيرة)، حيث نضع الرغيف بالمقلاة، ثم نرص طبقة من خليط الجبن الشيدر والموتزاريلا، ثم نضع طبقة من البصل والفلفل الألوان، ثم كمية من الدجاج المحمر، ثم نغطيها بطبقة جديدة من خليط الجبن، على أن نضع هذه الطبقات فى نصف الرغيف فقط، ثم نثنى النصف العلوى فوقه.

نُقَلِّب الرغيف على الوجه الآخر بحرص، ليتم تحميره، ثم يُرفع الرغيف من على النار، ويُقدم مع الصلصات المكسيكية الشهية مثل بيكو دى جاييو، جواكامولى والكريمة الحمضية. 

لمعرفة طريقة تحضير بيكو دى جاييو اضــــــغط هنــــــا

لمعرفة طريقة تحضير جواكامولى اضــــــغط هنــــــا

الوصفة سهلة وسريعة وكمان شهية جدا، وأنا متأكدة إنها هتعجبكم كبار وصغار، واللى بيزود حلاوتها إنها ممكن تتعمل ببواقى أى أكل عندك فى التلاجة.. احنا جهزنا لكم طريقة التحضير بالتفصيل خطوة بخطوة مع الصور، افتحوا الرابط ده عشان تشوفوها وبالهنا.