أنت شايفنى هندى؟! ليه هو أنا هندي قدامك؟!

من أشهر الجُمل اللى بنقولها فى مصر لما نحس إن حد بيحاول يضحك علينا فى الكلام، أو يعمل علينا حوار. بنعتبر إنه شايفنا هنود، يعنى دماغنا مريحة ومش بنفهم بسهولة، أو يعنى ممكن حد يضحك علينا بسهولة.

طيب ده جايز تشبيه بنستخدمه فى كلامنا العام، لكن تفتكروا التشبيه ده يمشى على الأكل الهندى كمان؟! من الآخر، لأ؛ لأن المطبخ الهندى مطبخ قوى جدا بأكلاته ووصفاته، ومميز فى طرق إعداد الطعام والمكونات والتوابل والبهارات اللى بتدخل فيه. لما تقول إنك داخل تاكل فى مطعم هندى، تبقى مُستعد لحاجتين، الشطة الفظيعة فى كل الوصفات تقريباً، والأرز البسمتى اللى ملوش مثيل.

أول مرة عملت فيها دجاج بالكارى فى البيت عندنا، كانت أختى أميرة بتزورنا فى اليوم ده، سألتنى أنا عاملة إيه على الغداء؟ قلت لها فراخ بالكارى.. عيونها طلعت لبرا 2 متر زى أفلام الكرتون، وقالت لى الحقينى بسرعة بالأكل.. مش هنسى منظرها اليوم ده وهى بتاكل بدون توقف، وبدون ما تتكلم كلمة واحدة، وبعد معركة غير متكافئة مع الأكل، أخدت نفس طويل وقالت لى: "يااااه يا إيمان رجعتينى لأيام ما كنت فى انجلترا، هناك اتعزمت على مطعم أكل هندى، وكانت أول مرة أجرب الأكل الهندى المشطشط ده، خدتينى لذكريات جميلة فى الغُربة"!

الأكل بيسيب جوانا ذكريات، بتربطه بالأماكن والأشخاص والأوقات، تمام كده زى ما حصل مع أميرة أختى، ده بيحصل معانا كلنا، بنفتكر ذكرياتنا مع أنواع الأكل والأماكن اللى كلنا فيها. أنا مقدرش أقول على نفسى إنى من عُشاق الأكل اللى مليان شطة، لكن  فى ناس كتير بتعشقها وتلاقينى بهتم بالوصفات المشطشطة عشان فى شريحة كبيرة فى مصر بيحبوا الأكل الحراق!!

الفراخ بالكارى وجبة منتشرة على نطاق واسع جدا فى جنوب آسيا، وجنوب شرق أسيا، وفى جزر الكاريبي.

اتكلمت معاكم قبل كده عن الملل فى الأكل، وصفتنا النهاردة بتكسر حاجز الملل، وبتاخدنا لعالم السحر الهندى بكل ما فى مطبخه من توابل وبهارات، الدجاج بالكارى أكيد مع مدونتنا هيبقى ملوش حل، نروح سوا نتعرف على طريقة عمله.

المكونات:

1/2 كيلو صدور دجاج مخلى ومُقطع مكعبات

2 بصلة صغيرة مفرومة

1/4 ملعقة شاى زنجبيل طازج مفروم

2 ملعقة طعام معجون الطماطم

1/2 لتر عصير طماطم

1/2 ملعقة شاى فلفل أحمر حار (شطة خشنة)

2 ملعقة طعام كارى بودرة

4 فصوص ثوم مفروم

1 كوب كريمة طهى لبانى (أو حليب جوز الهند)

1/4 ملعقة شاى فلفل أسود مطحون

ملعقة طعام ملح

2 ملعقة طعام زيت زيتون

طريقة التحضير:

نضع مقلاة عميقة على نار متوسطة ونتركها قليلا حتى تسخن.

يُضاف إلى المقلاة زيت الزيتون، ثم يُضاف البصل والثوم المفروم، ويتم تقليبها بشكل مستمر بملعقة خشبية، حتى تأخذ اللون الأصفر.

نبدأ فى إضافة جميع التوابل والملح والفلفل إلى المقلاة، وتُقلب جميع التوابل مع البصل المفروم والثوم لمدة 5 دقائق.

نُضيف معجون الطماطم وعصير الطماطم  إلى الخليط ونستمر بالتقليب لمدة 5 دقائق أخرى.

نقوم بإضافة مكعبات الدجاج إلى الخليط ونُقلب قطع الدجاج جيدا على جميع الجوانب حتى تتشرب الخليط جيدا.

نقوم بإضافة الكريمة إلى المكونات بالمقلاة، مع استمرار تقليب جميع المكونات، لمدة 5 دقائق أخرى على نار هادئة جدا حتى تمام التسوية.

تُقدم مع الأرز البسمتى الأبيض، بعد تزيينها بشرائح البقدونس الأخضر الطازج، والقليل من الكريمة الحامضية.