الأكل شهوة رهيبة فى حياتنا، اللى يفرقها عن الشهوات التانية إنها ضرورة لاستمرار الحياة، يعنى شهوة لازم إشباعها وبشكل يومى. تلاقينا لما نفسنا بتروح لأكلة معينة نقول "أنا مشتهيها" يعنى نفسى فيها، ولما بنشم ريحة أكلة حلوة واحنا ماشيين فى الشارع بنجوع حتى لو كنا لسه واكلين وشبعانين، ولما بنشوف صورة أكلة حلوة ريق الواحد بيجرى وراها كأنه عمره ما أكل. كانوا زمان واحنا أطفال يقولوا لنا متكلوش وانتوا واقفين عشان الأكل مينزلش فى رجلكم، حاجة توقع من الضحك، انتوا كمان اتقالت لكم الجملة دى؟! هو بصراحة الأكل عمره ما ينفع على الواقف، الأكل عايز بال رايق، ومزاج عالى عشان الواحد ياكل ويستطعم، الأكل له هيبة.

لما الواحد(ة) فينا بيختلط بالناس فى عزومة أو خروجة أكل، بيتعرف إن الناس طبايعها فى الأكل مختلفة، وذوقها فى الأكل، مختلفة جدا، يعنى تلاقى اللى مش بياكل لحوم حمراء نهائى، أو اللى مش بياكل بط أو وز، بس صعبة جدا جدا، يمكن مستحيلة تلاقى حد مش بياكل فراخ، الدجاج قصة عشق لا تنتهى عند كل البشر، لو حد فيكم يعرف حد مش بيحبه، ميقوليش عشان هتصدم صدمة عمرى.

احنا بقى الستات متهمات من رجالتنا، إننا مش بنغير فى أصناف الأكل اللى بنقدمه، لازقين على صنفين تلاتة ومعيشينهم فى الملل، بس فى مدونة جوا الحلة الكلام ده مش صح، احنا كل يوم بنقدم لكِ الجديد عشان تتعلميه كويس وتقدميه فى بيتك وتتمتعى بميزة التنويع ويبقى عندك كل يوم وصفة جديدة.

ولما نقول وصفة جديدة للفراخ، نلاقى قايمة طويلة جدا ملهاش نهاية، كل شوية هنقدم لك حاجة تجنن فى طعمها ومكوناتها، بعيد بقى عن الكلام الكتير وصفتنا النهاردة وهمية، جاية من عالم تانى، عالم الطعم الرهيب، هنتعلم النهاردة من المطبخ الإيطالى طريقة عمل دجاج بالبروكلى وصوص ألفريدو، وصفة بتتكلم عن نفسها، بتقول اطبخونى، كلونى، التهمونى بقوة، لا تأخدكم بى أى رحمة.

الوصفة من اسمها مكونة من 3 حاجات، صدور دجاج مخلية، البروكلى، وأخيرا وهو أعظم ما فى الوصفة صوص ألفريدو الجبار. بينا سوا ع المطبخ نعمل الوصفة.

طريقة عمل دجاج بالبروكلى:

المكونات:

1/2 كيلو صدور دجاج مخلى

10 حبات زهرة البروكلى

200 جرام جبنة بارميزان مبشورة

1/2 كوب من الزبدة الذائبة

2 مكعب من الجبنة الكريمى

2 كوب لبن

2 فص ثوم مفروم

1/4 ملعقة شاى ثوم بودرة

1/4 ملعقة شاى فلفل أسود مطحون

ملح "عند الحاجة"

زيت زيتون

طريقة التحضير:

نبدأ بتجهيز صوص ألفريدو، بوضع وعاء على نار متوسطة إلى هادئة، يُضاف إلى الوعاء الزبدة الذائبة، ثم يُضاف لها الجبنة الكريمى، وتقليبها بشكل مستمر باستخدام المضرب اليدوى، حتى تمتزج المكونات.

نبدأ فى إضافة اللبن بالتدريج إلى خليط الزبدة والجبنة الكريمى، حتى نحصل على القوام المطلوب، وهو القوام اللبانى.

نُضيف 150 جم من الجبنة البارميزان إلى الخليط ونستمر بالتقليب.

نقوم بإضافة الثوم المفروم والفلفل الأسود وبودرة الثوم إلى الخليط، مع الاستمرار فى التقليب.

فى مقلاة ساخنة، نُضيف زيت الزيتون، ثم نبدأ بوضع قطع صدور الدجاج، بعد أن قمنا بتتبيلها بالملح والفلفل الأسود، حتى تأخذ تصل لنصف التسوية فقط.

فى وعاء آخر عميق، نضع 2 لتر ماء وملعقة صغيرة من الملح، ونترك الماء حتى يغلى، ثم نُضيف له زهرات البروكلى، ونُخفض درجة الحرارة إلى متوسطة.

نترك زهرات البروكلى بالماء المغلى مدة 3-4 دقائق فقط، ثم نرفعها ونصفيها من الماء الساخن، ونغمرها فى واعء به ماء برد وثلج، وذلك حتى تحتفظ زهرات البروكلى بلونها الأخضر الزاهى.

فى طاجن مناسب، نقوم بفرد طبقة فى الأرضية من صوص ألفريدو، ثم نقوم برص قطع الدجاج فوق تلك الطبقة بشكل متناسق.

نقوم بوضع زهرات البروكلى فوق قطع الدجاج بحيث تغطي كل القطع.

نبدأ بعدها بتوزيع باقي صوص ألفريدو على السطح، ونُراعى أن يغمر كافة أجزاء الدجاج والبروكلى بشكل متساوٍ.

نقوم برش كمية الـ50 جرام المتبقية من الجبنة البارميزان المبشورة على سطح الطاجن، ثم ندخله الفرن على درجة حرارة 180° م لمدة نصف ساعة.

بعد تمام التسوية، نُخرج الطاجن من الفرن، ويُقدم مع الأرز الأبيض المصرى، أو الأرز البسمتى الأبيض.