سد جوعك.. جملة قصيرة جدا، مشهورة فى وطننا العربي وفي مصر، بنقولها لبعض لما نشعر بالجوع الشديد، وتكون "عصافير المعدة بتزقزق" زي ما بنقول فى مصر.. يعنى الجوع بقى فظيع، والمعدة بتشتكي، ومحتاجة تغذية فورا.. "سد جوعك" جملة صحيح قصيرة، بس ممكن معناها يبقى خطير على صحة الإنسان، إذا لم يُحسن توصيل المعدة لحالة شبع صحية.. يعني، إذا حاولنا بعد ما نسد جوعنا، نستزيد من الطعام، بشكل مبالغ فيه، أو أمدينا المعدة بغذاء بكميات أكبر من احتياجها الحقيقي وقتها، ساعتها بندخل فى مشكل صحية أخطرها زيادة الوزن، وكل اللي ممكن يترتب على زيادة الوزن من مشكلات صحية تانية كتيرة وخطيرة!!

طيب والحل؟! الحل في الكلمتين دول (بروتين بار) اللي ترجمتهم باللغة العربية (ألواح البروتين)، ومن تسميتهم نقدر نعرف معناهم.. بروتين بار أو لوح البروتين، وصفة غذائية صحية رائعة لكل اللى بيلعبوا رياضة، ولكل اللى بيتبعوا نظام غذائي لإنقاص الوزن.. طيب ازاي؟ وايه هو تحديدا معنى بروتين بار؟ وإيه استخداماته؟!

البروتين بار هي ألواح غذائية يتم تصنيعها كوجبات خفيفة وسريعة، وتتكون بدرجة أساسية من البروتين بالإضافة اٍلى بعض المكونات الأخرى كالألياف، والسكر. أشهر أنواع البروتين المستخدم فيها هو مصل اللبن (whey)، وبروتين الصويا ومشتقات الصويا. هذه الالواح غنية بالبروتين تحتوي على 20 جراما من البروتين في اللوح الواحد، أي نفس كمية البروتين الموجودة في 70 جراما من اللحمة.

يلجأ البعض ممن يتبعون نظاماً غذائياً غنيا بالبروتين أو رجيم إنقاص الوزن إلى تناول البروتين بار كوجبة خفيفة أو "سناك" لتساعدهم على الشعور بالشبع والامتناع عن تناول المزيد من الطعام. بعض أنواع "بروتين بار" تكون غنية بالسعرات الحرارية، حيث يحتوي بعضها على قرابة 300 سعرة حرارية اي ما يعادل ساندويتش جبن مع خضار. لذلك بكمية السعرات يستطيع الإنسان الشعور بالشبع بمجرد تناوله للوح من ألواح البروتين.

طيب إيه رأيكم بدل ما ندور على البروتين بار في الأسواق، والصيدليات، ونستهلك جزء كبير من وقتنا فى اللف والدوران بحثا عنه، ونستهلك وقت تاني أطول، في قراية المكونات عشان نضمن إنها مناسبة لصحتنا ونظامنها الغذائي، إيه رأيكم نعملها بنفسنا في البيت، بمكونات بسيطة ومتوفرة، وبطريقة تحضير سريعة ومضمونة ميه في الميه!!

طريقة تحضير بروتين بار:

المكونات:

كوب جوز هند

كوب زبدة فول سوداني

طريقة عمل زبدة الفول السوداني في البيت، بالتفصيل اضغط هنا>>>  رابط الفيديو  

كوب بندق أو لوز أو عين جمل مجروش

كوب لبن بودرة خالي الدسم

كوب عجوة

رشة ملح

للزينة شكولاتة داكنة ذائبة

طريقة عمل بروتين بار:

نخلط المكونات السابقة معا في الكبة أو مُحضر الطعام حتى تُصبح كتلة واحدة متجانسة ومتماسكة.

 نأخذ العجين ونعمل على تشكيله، على الأشكال التي نرغبها (مستطيلات، مربعات أو غيرها). نضع العجين بعد تشكيله فى الفريزر حوالي ساعة إلا ربع، ليتماسك.

نُخرج العجين من الفريزر، ونعمل على تكسيته بالشيكولاتة الذائبة، ثم يتم تصفية الشيكولاتة الزائدة.

توضع الألواح، بعد التزيين بالشيكولاتة، فى الفريزر مرة أخرى (حوالي نصف ساعة)، لتتماسك وتتجمد.

تُستخرج من الفريزر وتوضع بالثلاجة وتُستخدم عند اللزوم (وقت الجوع أو وقت الذهاب للتمرينات الرياضية) وتؤكل.

يا رب تكون وصفة بروتين بار عجبتكم، وزي ما قريتم، تنفيذها سهل ومش بياخد وقت، ومكوناتها متوفرة في كل بيت، حتى زبدة الفول السوداني، نقدر نعملها بنفسنا ومش بتاخد وقت ولا تكلفة، وطريقتها زي ما وضحناها لكم فى رابط الفيديو.. استمتعوا بحياة صحية مليئة بالطاقة، وبالهنا، والسعادة.

الوصفة من إعداد وتحضير شيف: رباب داوود