طبخ الأرز عموما بمختلف أنواعه، بيكون عُقدة عند كتير من البنات والسيدات، لأسباب كتيرة، ساعات لأنه بيعجن، أو بيتلسع من القعر، ومع ستات تانية مش بيستوى من النص كويس، ومن فوق بيكون ناشف، وتلاقى الحكاية عملت أزمة للبنوتة أو العروسة الجديدة اللى واقفة تعمل الرز فى بيتها، وفعلا بتحس لما مش بيظبط الرز معاها إنها فاشلة فى شغل المطبخ، أصل الرز أساسى فى سفرة الغدا المصرية ومفيش غنى عنه. وعشان كده هنقول طريقة سهلة وسريعة لعمل الرز المصرى الأبيض وفى 10 دقايق بس وهنكتب الطريقة والمقادير بالظبط بحيث تظبط مع أى بنت أو سيدة ويطلع طعمه حلو إن شاء الله.

الأرز الأبيض السادة جميل لأنه بيمشى مع أكلات كتير، يعنى يبقى جميل ومناسب جدا مع وصفة بيكاتا الدجاج بالمشروم  وكمان بيكاتا اللحم ومعاها خضار سوتيه وبطاطس مهروسة. ممكن كمان تقدميه مع اللحمة على الطريقة الآسيوية المميزة. 

يالا بينا نشوف طريقة عمل أرز أبيض سهلة ومظبوطة وجوا الحلة. 

 طريقة عمل أرز أبيض: 

المكونات:

2 كوب أرز مصرى

2 كوب شوربة (أو ماء صنبور)

2 ملعقة شاى ملح (في حالة استخدام ماء الصنبور)

1 ملعقة طعام زبدة

1 ملعقة طعام زيت ذرة

طريقة التحضير:

طريقة عمل أرز بالشعيرية >>>> اضغــــط هنـــــا

يُغسل الأرز جيدا بالماء الجارى، ثم يُصفى من الماء الزائد.

فى وعاء عميق، نضع ملعقة من الزيت النباتى مع الزبدة، ثم نُضيف الأرز.

نقوم بتسخين الشوربة أو الماء، حسب المتوفر فى المنزل، فى وعاء عميق مناسب حتى تصل لدرجة الغليان.

نضيف 2 ملاعق شاى من الملح فى حالة استخدام ماء الصنبور، أما فى حالة استخدام الشوربة فلا نحتاج للملح لأن الشوربة تكون مُمَلحة، ويجب توخى الحذر من النسيان وإضافة ملح مع الشوربة للأرز حتى لا يفسد بالطعم المالح.

نُقلب المكونات، وبعد غليان الماء أو الشوربة لمدة دقيقتين مع الأرز، نهدئ النار جدا، ونُغطى الوعاء، ونضع الشياطة أسفل الوعاء، ونترك الأرز الأبيض حتى يصل لتمام التسوية؛ بعد حوالى 10 دقائق، نتأكد من تسوية الأرز بتذوق جزء منه بطرف ملعقة.

كمان تقدر تشوفى طريقة عمل أرز الصيادية للسمك >>>> اضغـــــط هنـــــــا 

الوصفة دى فيها مميزات كتيرة أول حاجة، استخدام الشوربة المغلية أو الميه حسب المتوفر عندك فى البيت بيقلل مُدة التسوية جدا، وبيسرعها، يعنى لو راجعة من الشغل متأخرة وعايزة تنجزى الأكل بسرعة والتسوية تكون 100 – 100، اعملى الطريقة دى وهتتبسطى من نتيجتها، أهم شئ فى الموضوع تستخدمى المعيار الخاص بالميه أو الشوربة بالظبط، يعنى لو عملتى معيار الرز بكوباية معينة يبقى لازم وضرورى معيار الميه أو الشوربة يكون بنفس الكوباية.

دى وصفتنا للرز المصرى الأبيض، وصفة مُجربة كتير وعلى مدار سنين طويلة، وصفة ناجحة، وهى دى الوصفة اللى بيستخدمها الشيفات فى المطاعم والفنادق، عايزين نعرف التجربة دى نجحت معاكم واللا حصل مشاكل، شاركونا رأيكم وصوركم على صفحتنا الرسمية على الفيسبوك وبألف هنا.