من بين كل الأسماك المملحة، الرنجة تيجى بالنسبة لى فى المقام الأول.. وأعتقد إنها بتحتل نفس المكانة عند عدد كبير من المصريين.. الرنجة حل وسط ما بين كل أنواع الأسماك المملحة التانية، حل مثالي للى ملهومش فى الفسيح أو الملوحة.. ولما بقت الرنجة بيتم تحضيرها وتدخينها بطرق حديثة متطورة، بقى طعمها أجمل وطرق تحضيرها أسهل.. أشهر المواسم اللى بيتم الإقبال فيها على أكل الرنجة، أعياد شم النسيم، وعيد الفطر المبارك.. الأول عادة مصرية قديمة، والتانى، بيكون كل واحد/ة فينا معدته تعبت من أصناف اللحوم والطواجن، وبنكون ملينا جدا منها، والرنجة بتبقى حل مثالي لكسر الملل ده!! احنا بنقدم لكم طريقة تحضير قوارب الرنجة والبطارخ، ومش أى بطارخ، دي بطارخ مرملة جدا.. طريقة تحضير قوارب الرنجة والبطارخ، طريقة جديدة، مش معروفة بالنسبة للمصريين، بنقدمها لكم لأنها سريعة، وجديدة، وبتقرمش.. اختلاط المكونات فيها مثالي ومش مُكلف، أما الألوان، فمتعة ملهاش حدود.. تعالوا نتعرف على المكونات وطريقة التحضير.

طريقة تحضير قوارب الرنجة والبطارخ:

المكونات:

شرائح رنجة مخلية

عصير ليمونة

حبة طماطم مقطعة مكعبات صغيرة

بصل أخضر مقطع دوائر

مسطردة

خس أخضر طازج

طريقة التحضير:

نبدأ بغسل قطعة الخس، غسلا جيدا، بالماء وقطرات الخل، ونتركها جانبا حتى تجف.

نقوم بتفصيص قطع الخس، فى شكل ألياف منفصلة عن بعضها البعض، ثم نأخذ قارب واحد من ألياف الخس، ونقوم بفرد صوص المسطردة عليه، بحيث يُغطى سطح قطعة الخس.

نقوم بتقطيع شرائح الرنجة المخلية، بحيث تُناسب فى حجمها، حجم قطعة الخس، ثم نرص شرائح الرنجة فوق قطعة الخس المدهونة بالمسطردة.

نقوم بتقطيع أجزاء من البطارخ، ونضعها فوق قطعة الخس، ونرش القليل من قطرات عصير الليمون فوق الرنجة، ثم نبدأ فى رص شرائح البصل فوق الرنجة، ونُزينها بقطع الطماطم.

نُكرر الخطوات، مع باقى قطع الخس، أو حتى نكتفى من الكمية المراد تحضيرها.

تُقدم قوارب الرنجة والبطارخ على سفرة احتفالات شم النسيم، مع باقي الأصناف من الأسماك المملحة والسلطات المختلفة.

نتمنى تكون وصفتنا عجبتكم.. افتحوا الرابط ده عشان تشوفوا فيديو طريقة التحضير، وبالهنا.