عروستى؟! أكلة سويسرية.. عروستى؟! حاجة بيضا بس محشية.. عروستى؟! ريحتها زكية.. عرفتوا إيه هى؟! الكوردون بلو... الفراخ المحشية.. وجبة جميلة جدا شهية ومختلفة، فيها الطعم الشيك والحرش فى نفس ذات الوقت.. صديقاتى وأصدقاء المدونة اللى بيحبوها لازم يتعلموا يعملوها فى البيت ويتشجعوا يشوفوا وصفتنا اللى فيها حركات خاصة تليق علينا احنا الشعوب العربية والمصرية خاصة فى طريقة التتبيل والتسوية.

أول مرة قريت وسمعت عن الكوردون بلو كان فى أحد المطاعم الشهيرة عالميا واللى ليها فروع فى كل العالم والوطن العربى طبعا.. كانت صديقاتى واخواتى البنات معايا، رشحت لى أميرة أختى أجرب الكوردون بلو وقالت لى : "دوسى بقلب جامد"، وابتدا المشوار، حبيت الوصفة جدا، ورجعت على البيت أدور على أصلها وفصلها والعيلة الجميلة اللى جت منها فراخ الكوردون بلو، اتبسطت بس كان ليا عليها تحفظات، خصوصا حكاية القلى فى الزيت دى، وقررت أجرب أعمل Twist شوية فى الوصفة عشان أحافظ على الطعم الأصلى وبالمرة أحافظ على صحتى من الزيت الكتير فى القلى.. الوصفة الأصلية بتقول نعمل كذا وكذا وكذا، وبعدين نقلى الفراخ فى زيت عشان نحصل على التسوية المطلوبة والسطح المقرمش الجميل.. قلت ما بدهاش يا إيمان، التغيير مطلوب.. أنتِ تجيبى صدور الفراخ المخلية، وتتصرفى فيها بطريقة ذكية، والطبخ عايز تصرف خاص كل ست تتصرف زى ما تحب، بحيث تخدم الذوق اللى يناسبها. وبالفعل استغنيت تماما عن القلى فى زيت بمجرد التحمير فى زيت زيتون وبعدها أدخل الفراخ فى بايركس على الفرن السخن مدة حوالى 15 دقيقة، وبكده أحافظ أكتر على صحتى أنا واللى معايا وفى نفس الوقت أرحم صحتى من أضرار الزيت السخن، التويستاية البسيطة دى كمان سهلت عليا الحصول على شكل نهائى ممتاز للكوردون بلو، ووفرت عليا صدمة إنى الحشو يسقط فى الزيت، أو البقسماط يفك والدنيا تضرب واليأس يمسكنى وأقول الصنف ده مبعرفش أعمله.. أنا إن شاء الله هكتب بالتفصيل الممل الطريقة وأتمنى تجربوها وتقولوا لى مدى نجاحها معاكم. بس المهم للى هيجربوا الطريقة إنهم يمشوا مع الخطوات واحدة واحدة لحد ما نوصل سوا لوصفة ناجحة بكل المقاييس ونطمن إننا فى المطبخ أشطر الشطار.. تعالوا نعرف فوايد الفراخ البيضا وبعدين نروح للوصفة والمكونات.

فوائد الدجاج الأبيض:

يُفيد أكل الدجاج في محاربة نموّ وانتشار الشوارد الحرّة في خلايا الجسم، لذا فهو يحدّ من نمو الأورام السرطانيّة بمختلف أنواعها؛ لاحتوائه على مضادّات الأكسدة. يساعد في تخفيض نسبة ضغط الدم المرتفعة في الجسم، ولكن مع ضرورة نزع الجلد عنه. يقوّي أداء الجهاز المناعيّ، ويحفّز قدرة الجسم على مقاومة الأمراض المختلفة، ويحمي الأنسجة من التلف. يعمل على تحفيز نموّ العضلات وتقويتها، وتحسين أدائها لغناه بالبروتين الحيوانيّ الجيّد قليل الدهون. يمنع الإصابة بالأنيميا " فقر الدم " ويقي من الشعور بالضعف العام والإرهاق المزمن لقدرته على إنتاج كريات دم حمراء جديدة وهيموجلوبين الدم. يحفّز عمل الدماغ والخلايا العصبيّة، ويقي من الإصابة بمرض الزهايمر"النسيان" ويحسّن القدرات العقليّة كالذاكرة والاستيعاب. يساعد على توازن إفراز الهرمونات في الجسم، كما يُفيد في عمليات إنتاج الكربوهيدرات والدهون في الجسم، ويُساعد على إنتاج الطاقة وتبادل الأوكسجين في الخلايا. يلعب دوراً كبير في بناء عظام متينة ويحميها من الإصابة بالهشاشة، كما يقوّي الأسنان ويمنع تكسّرها.

طريقة تحضير كوردون بلو الدجاج ومكوناتها.

المكونات: (تكفى 4 أفراد)

كيلو صدور دجاج طازجة خالية من العظم

حبة بصل أبيض صغيرة مفرومة

عصير 2 ليمونة

شرائح لانشون سادة (أو بسطرمة أو لانشون رومى.. حسب الرغبة)

شرائح جبنة شيدر (أو ريكفورد أو موتزاريلا.. حسب الرغبة)

2 بيضة

ربع كوب لبن خالى الدسم

بقسماط ناعم

1/2 ملعقة شاى ملح

1/4 ملعقة شاى فلفل أسود مطحون

1/4 ملعقة شاى زنجبيل مطحون

1/4 ملعقة شاى بودرة ثوم

1/4 ملعقة شاى بودرة بصل

4 ملعقة طعام زيت زيتون

طريقة التحضير

يتم غسل شرائح الدجاج جيدا، ثم تُقطع من الجنب بواسطة سكين حاد، بحيث نصنع فراغا فى كل قطعة صدر من صدور الدجاج، ويُفضل عدم ترقيق قطع الصدور حتى تكون مناسبة لاستقبال الحشو.

تضاف التوابل (ملح، فلفل، زنجبيل، عصير ليمون) إلى صدور الدجاج بعد عمل الفراغ، وتترك داخل التتبيلة فى الثلاجة (البراد) ساعتين على الأقل أو طوال الليل.

بعد تتبيل شرائح الدجاج، تُستخرج وتبدأ عملية حشو الفراغ، بحيث نقوم بوضع قطعة من شرائح الانشون أو البسطرمة داخل الفراغ ثم يتبع ذلك وضع الجبنة الشيدر أو الموتزاريلا حسب الرغبة.

فى طبق عميق نخلط البيض مع كمية اللبن خالى الدسم، ونضع على المكونات القليل جدا من الملح والفلفل الأسود، ثم نخفقها بالمضرب اليدوى، ونبدأ فى وضع كل قطعة من صدور الدجاج بعد حشوها فى البيض المخفوق بحيث تُغطى جميع جوانب صدر الدجاج.

فى طبق آخر، نضع كمية كافية من البقسماط الناعم ونمزجها بالقليل جدا من الملح والفلفل الأسود المطحون، وبودرة الثوم وبودرة البصل، ثم بعد استخراج قطع الصدور من طبق البيض المخفوق، نقوم بتقليب كل قطعة من قطع الصدور فى البقسماط، بحيث يُغطى الصدور من جميع الاتجاهات وبشكل كافٍ.

فى مقلاة ساخنة بها زيت الزيتون تُوضع صدور الدجاج المحشية والمُغطاة بطبقتين من البيض والبقسماط، على نار متوسطة.

تقلب صدور الدجاج على الوجهين حتى تأخذ اللون الذهبى البنى، ثم فى فرن سبق تسخينه لمدة ربع ساعة على درجة 150°م، نقوم بوضع صدور الدجاج المحشوة فى طواجن بايركس وندخلها الفرن، بشرط ألا تكون فوق صاج الفرن مباشرة، بل تكون على أول رف مقارب لصاج الفرن.

تترك صدور الدجاج فى الفرن مُدة 15 دقيقة، ثم تُستخرج وتُقَطَّع وتُقدم مع الأرز الأبيض المصرى أو الأرز الأبيض البسمتى، ويُقدم معها الخضار السوتيه والصلصة البيضاء.

هاه؟ الوصفة سهلة؟ الوصفة هايلة؟! جربوها وعرفونا مدى نجاحها معاكم وياريت لو تصوروا الأكلة بعد ما عملتوها وتبعتوها لنا على المدونة أو فى رسالة على صفحتنا الرسمية على الفيسبوك.. وألف هنا وشفا على الجميع.