طريقة تحضير تشيز كيك الكريز


تعددت الصوصات والحلو واحدُ.. تشيز كيك وصفة مشهورة على مستوى العالم، طبقات ثابتة، الأولى بسكويت مطحون بالزبدة، والتانية جبنة، والتالتة دى بقى اللى فيها الحوار، طبقة الصوص، بتتغير طبعا حسب نوع الفاكهة اللى بنستخدمه فيها، واللى غالبا بيكون إما فاكهة الموسم، أو الفاكهة اللى بنحب طعمها مع التشيز كيك.. تشيز كيك الكريز أخد اسمه أكيد من الصوص اللى معمول بيه، وهو الكريز طبعا، شكله زى ما انتوا شايفين فى الصورة، حاجة مبهجة ومُبهرة فى نفس الوقت، وعموما تشيز كيك الكريز من وصفات كيكة التشيز السهلة، زى ما قلنا لكم قبل كده، الاختلاف فى طبقة الصوص بس!!

أوقات كتيرة أنتِ كست بيت، أو بنوتة لسه فى بيت والدك، مش بيكون عندك وقت كفاية تعملي فيه أصناف من الحلو، تبسطى بيها نفسك واللى فى البيت معاكي، بس وصفتنا النهارده، تشيز كيك الكريز، وصفة سهلة وسريعة التحضير جدا، خصوصا إنها معمولة على البارد، يعنى من غير فرن، يعنى من غير وجع دماغ! بتتميز تشيز كيك الكريز عن غيرها من الأنواع التانية، بتناغم الألوان، البيج والكريمي والأحمر الزاهي، أنا بصراحة معرفتش أكتب الوصفة غير لما شفت الصورة قدامي، لأنها شجعتني بشكل كبير على الكتابة بحماس. تعالوا مع بعض نتعرف على مكونات وطريقة تحضير تشيز كيك الكريز على البارد "بدون فرن".

تشيز كيك الكريز:

المكونات:

500 جرام من البسكويت السادة

125 جم كريز طازج أو مُعلب

2 ملعقة طعام زبدة ذائبة غير مملحة

750 جم جبنة كريمى

ملعقة طعام قشدة

8 ملعقة طعام سكر أبيض

ملعقة طعام نشا ذرة

ملعقة طعام عصير ليمون

ملعقة طعام ماء ورد

2 ملعقة شاى روح الفانيليا Vanilla extract

شوفوا طريقة تحضير أوريو تشيز كيك من هـــــنا 

طريقة التحضير:

نقوم بتجهيز 4 كاسات زجاجية مناسبة الحجم، ويراعى أن يتم تنظيفها جيدا وتجفيفها جيدا.

فى كيس بلاستيك، نضع كمية البسكويت السادة، ثم نغلق الكيس بإحكام، ونبدأ فى طحن البسكويت داخل الكيس باستخدام يد الهون، أو أى أداة تُساعد على طحن البسكويت.

نراعى أن نطحن البسكويت بحيث يصير مفتتا، نستخرج البسكويت المطحون ثم نضيف إليه الزبدة الذائبة، ونخلطها جيدا مع البسكويت بحيث تمتزج تماما معه، ثم نقوم بوضع البسكويت كطبقة أولى فى أرضية الكاسات.

شوفوا طريقة تحضير تورتة تشيز كيك بالفراولة من هنـــــــــا

فى وعاء عميق، نضع الجبن الكريمى ونضيف إليه 5 ملاعق من السكر، ونضيف القشدة وملعقة روح الفانيليا، ونخلطهم جيدا حتى نحصل على قوام لبانى متماسك، ثم نقوم بوضع طبقة الجبن الكريمى كطبقة ثانية فى الكاسات.

فى مقلاة عميقة غير قابلة للالتصاق، نضع الكريز ونضيف إليه 3 ملاعق من السكر، وملعقة روح الفانيليا، ونشا الذرة، وماء الورد وعصير الليمون، ونُقلب المكونات جيدا على نار هادئة، حتى تبدأ حبات الكريز فى الذوبان مع السكر والمكونات الأخرى، ونترك الصوص حتى يأخذ السمك المطلوب مدة 10 دقائق على النار الهادئة.

نترك الصوص ليبرد، ثم نقوم بإضافته كطبقة ثالثة فوق طبقة الجبن الكريمى، ونراعى توزيعه جيدا حتى يغطى المساحة أسفله بالكامل.