يا ناعمة يا غُريبة.. يا فرحة وقُريبة.. أهو جانا العيد.. واستقبلناه بقلوبنا الحلوة الطيبة.. يااااااااااا

يا ناعمة يا غُريبة.. يا فرحة وقُريبة.. أهو جانا العيد زى العادة.. أنواره وأفراحه زيادة.. صبحنا عليه واتهنينا.. ولاقينا مع الكل سعادة.. الله على أجمل أعيادنا.. الله يا جماله بيسعدنا..  واستقبلناه وفرحنا معاه.. بقلوبنا الحلوة الطيبة.

أُغنية من أغانى العيد.. بصوت المطربة المصرية حُورية حسن من مواليد طنطا سنة 1932، مش من الأغانى اللى أخدت شُهرة  زى غيرها كتير من أغانى العيد الجميلة، لكنها تميزت جدا عن غيرها لأنها غنت لواحدة من أجمل مخبوزات عيد الفطر، وهى الغُريبة. ولما ندور كويس فى الفلكلور الشعبي المصري، نلاقى إن الغُريبة أخدت حظ كبير من أغانى الفلكلور، وإن الأغانى دى امتد أثرها لما بعد عيد الفطر، إلى الأفراح والأعراس والليالى الملاح. هتلاقى إن من الأغانى اللى اشتهر الغناء فيها للغُريبة أغنية شعبية بتقول: "يا ناعمة يا غريبة.. يا بنت الناس الطيبة.. يا ناعمة دوبى دوبى.. يا ناعمة يا غريبة"!

الُكل بيتكلم عن حاجة أساسية فى أغانى الغُريبة، إنها #ناعمة، وبعد كده تتعدد فيها الأوصاف، بس الأساس إنها ناعمة بزيادة. فى الفلكلور البورسعيد تلاقى الكلمات بتقول: "يا ناعمة يا غريبة.. يا ناعمة يا حنينة.. يا ناعمة يا غريبة.. يا ناعمة يا أُم السُكر"!

والحقيقة إن وصف الغُريبة فى الأغانى بيعبر فعلا عن حقيقتها، إنها #ناعمة جدا وبتدوب بين الشفايف بسرعة جدا، وأنا طفلة كنت أحب آكل الغريبة بس ومقربش لأى حاجة تانية، يعنى لو فى البيت 2 كيلو غريبة يبقى أنا أكلت 2 كيلو غريبة إلا 5 حبات. لما كبرت شوية بدأ أحب كل مخبوزات العيد خصوصا البتي فور والكحك السادة، بس مخبيش عليكم، "ما الحُب إلا للحبيب الأول"، الغريبة هى الأصل مهما أكلت من مخبوزات العيد الصغير. وانتوا يا جماعة إيه أكتر حاجة من مخبوزات العيد بتحبوها؟! شاركونا بآرائكم فى التعليقات، خلونا نرجع للذكريات.

ولما ييجى العيد، فرحتها بتكمل بالعيدية للأطفال ولبس العيد، وبالكحك والغريبة للكبار والأطفال، وعشان سعادتنا تكمل هنتعرف معاكم على مكونات وطريقة عمل الغُريبة الناعمة.

المكونات:

2 كوب سمن 

1 كوب سكر ناعم

4 أكواب دقيق 

بياض بيضة 

ملعقة شاى فانيليا 

رشة ملح 

طريقة التحضير:

 فى إناء نعجن السمن جيدًا ثم نضيف السكر ثم نضيف الدقيق بالتدريج مع الاستمرار فى العجن.

حين يصبح العجين كثيفًا نضيف بياض البيضة. 

فى الخلاط الكهربائى نضرب المكونات جيدًا .

نقوم بتشكيل العجين حسب الرغبة، ويُفضل شكل الكرة الصغيرة.

نكرر الخطوات على كل العجينة حتى تنتهى الكمية. 

نسخن الفرن لدقائق على درجة 180° م قبل أن ندخل الغريبة الفرن .

ندخل الغريبة الفرن 15 دقيقة ونُخفض الحرارة إلى 120 ° م مع المتابعة المستمرة، حتى لا يتغير لون الغريبة وتحترق. 

بعد 15- 20 دقيقة، نُخرج صوانى الغريبة من الفرن، ونضعها على شبك معدنى لتبرد.

طريقة عمل الغريبة بالكاكاو:

المكونات:

2 كوب سكر مطحون ناعم

2 كوب سمن 

5 أكواب دقيق 

2 ملعقة طعام كاكاو 

طريقة التحضير:

بالمضرب الكهربائى نخلط السكر والسمن جيدًا

 نضيف الدقيق تدريجيًا مع استمرار الضرب حتى تصبح العجينة ناعمة

نقسم العجينة نصفين ونضيف إلى أحدهما الكاكاو 

نشكل العجينة الملونة حسب الرغبة وندخلها الفرن على حرارة 120 ° م ونتركها حوالى 20 دقيقة حتى تمام التسوية.