طريقة عمل بطاطس مهروسة بالصوص البنى

فى أيام بتعدى علينا احنا البنات والستات بنكون مش قادرين نطبخ، من حقنا نفصل، دى التلاجة بتفصل، بس هو أكيد إن اليوم اللى مش بنكون قادرين على الطبخ فيه، لازم بردو هناكل، مش هنجوع يعنى!

فى وصفات كتير سهلة ليوم زى ده، نقدر نعملها فى دقايق معدودة، وناكل ونشبع من غير ما تتعبى نفسك فى مجهود وجبة متكاملة الأركان، ولا تقعدى جعانة، ولا تطلبى أكل من برا.

وعشان ده يحصل، بتفكرى فى المكونات اللى فعلا موجودة فى البيت والتلاجة عندك، وغالبا مفيش بيت بيخلى من البطاطس (البطاطا)، سواء كانت بطاطس للتحمير، أو للطبيخ. بس احنا هنخرج النهاردة عن المألوف ونعمل وصفة بطاطس مهروسة بالصوص البنى، يعنى مش هنقولك حمرى شوية بطاطس وكليهم.

البطاطس المهروسة سريعة جدا فى تحضيرها، ومحبوبة عند كل أفراد الأسرة، بنزود عليها إضافة جديدة هى الصوص البنى Gravy Sauce، اللى بيغير شكلها ومضمونها، وبيكون إضافة مُغرية جدا للطبق.

عادة فى المطاعم الأجنبية والعالمية، البطاطس المهروسة بالصوص البنى بتتقدم كطبق جانبى مع الخضار السوتية وشرائح اللحم أو الفراخ، لكن ممكن جدا تتقدم فى بيتك مع نفسها أو مع بواقى أكل من اليوم اللى قبله، وتتاكل بالعيش أو بالشوكة مع شوية خضار سوتيه واليوم حاله يمشى ببساطة.

الصوص البنى Gravy sauce عبارة عن سلسلة كبيرة جدا من أنواع الصوص اللى بتتعمل من شوربة اللحم أو الدجاج والزبدة وشوية دقيق (طحين)، كمكونات أساسية للوصفة. الصوص البنى مشهور جدا فى انجلترا وخصوصا أيام الأحد من كل أسبوع، هناك أغلب البيوت بتقدمه مع شرايح اللحم أو الاستيك؛ وهنلاقى كمان إنه منتشر على نطاق كبير فى أمريكا وكندا، وكل بلد بيكون ليها وصفة بتميزها عن غيرها.

أما البطاطس فهى بتحتوى على نسبة من البروتين اللى بيخلي ليها قيمة غذائية مناسبة ومش مكلفة، لأنه البروتين اللى فيها بيحتوى على نسبة عالية من الأحماض الأمينية الأساسية للجسم. وكمان بتتميز البطاطس إن سعراتها الحرارية عالية، يعنى بتمد الجسم بالطاقة والنشاط.

هنتعرف مع بعض على طريقة عمل البطاطس المهروسة بالصوص البنى ومكوناتها ونبدأ نعملها إن شاء الله فى البيت عندنا لو حبينا الوصفة، وإن شاء الله هنحبها.

طريقة عمل بطاطس مهروسة بالصوص البنى:

المكونات:

أولا: الصوص البنى

2 ملعقة طعام زبدة ذائبة

1 ملعقة دقيق (طحين)

1/2 لتر من شوربة اللحم أو الدجاج

ملعقة طعام صويا صوص

قليل من الملح والفلفل الأسود المطحون

ثانيا: البطاطس (البطاطا)

1 كيلو بطاطس

1 ملعقة زبدة ذائبة

1 ملعقة زيت زيتون

1 ملعقة شاى ملح

1/4 ملعقة شاى فلفل أسود مطحون

1/4 لتر لبن (حليب)

1 فص ثوم مفروم

خطوات التحضير لطريقة عمل بطاطس مهروسة بالصوص البنى

طريقة التحضير:

تُوضع الزبدة الذائبة مع القليل من قطرات زيت نباتى إلى مقلاة ساخنة على نار هادئة.

يُضاف الدقيق إلى الزبدة ويُقلب جيدا لمدة 5 دقائق حتى يمتزج الدقيق مع الزبدة.

تُوضع الشوربة شيئا فشيئا إلى الخليط السابق مع التقليب المستمر حتى نحصل على قوام متماسك.

نُضيف الصويا صوص لإكساب اللون البنى المناسب، ثم يوضع الملح والفلفل حسب الرغبة، مع مراعاة عدم الإفراط فى إضافة الملح لأن الصويا صوص مالح.

نضع كمية من الماء "حوالى 2 لتر"، فى وعاء عميق، ثم نتركه ليصل لدرجة الغليان.

نضيف قطع البطاطس إلى الماء المغلى بعد غسلها وتقشير القشرة الخارجية لها.

نترك البطاطس حتى تصل لتمام التسوية، ثم نصفيها من الماء المغلى.

فى نفس الوعاء، نضع كمية الزبدة وزيت الزيتون ثم نضيف البطاطس والثوم واللبن والملح والفلفل ونخلط جميع المكونات جيدا مع بعضها البعض ونتركها لمدة من 5-7 دقائق لتمتزج المكونات تماما.

تستخرج البطاطس بعد تمام التسوية، وتوضع فى طبق التقديم، ثم نُضيف الصوص البنى إليها بشكل جذاب فى منتصف كمية البطاطس. 
لمشاهدة طريقة عمل بطاطس مهروسة بالصوص البنى فيديو >> اضغط على لينك قناتنا على يوتيوب