أولادنا هم أغلى ثروة عندنا، الواحد (ة) مننا قبل ما يكون عنده أطفال بيبقى شخص تانى، لكن لما ربنا بيرزقه بالأطفال، بيفهم معانى كتيرة كانت غايبة عن حياته، زى الحُب، والخوف، والتضحية، والرعاية الكاملة.. جزء رئيسى جدا من الرعاية الكاملة لأطفالنا، مُتعلقة بالأكل، ونظام التغذية، اللى بيهم بيبدأ نمو أجسامهم، وتشكيل أول لَبِنَة فى نظامهم الغذائى، لكن أطفال كتير بيرفضوا أنواع معينة من الأكل، زى الخضار، وبيكون دورنا فى البيوت، إننا نبحث عن طريقة نتحايل عليهم بيها، عشان ياكلوا حاجة همه رافضينها، لكنها أساسية لاكتمال النمو.. طريقة تحضير كُفتة الخضار، فكرة ذكية للتعامل مع الأطفال اللى بترفض تاكل الخضار فى أكلهم خصوصا لو شايفينه واضح وصريح قدامهم فى طبق الأكل، طريقة تحضير كفتة الخضار، سهلة ومش محتاجة لا وقت ولا مجهود، وكمان مش مُكلفة، والظريف فى الوصفة دى، إنها بتتقدم للأطفال على إنها صنف من أصناف الكفتة، وعن تجربة، بيحبوها وياكلوها بانبساط، وبكده بتكون كل أم ضمنت حصول أولادها على الفوائد الغذائية اللى أجسامهم محتاجة لها من خلال وجبة كفتة الخضار.

طريقة تحضير كفتة الخضار:

المكونات:

٢حبة بطاطس

٢حبة كوسة

٢حبة جزر

ملح وفلفل وجوزة الطيب وزعتر

ملعقة نشا

ملعقتين زيت ذرة

طريقة التحضير:

 نبشر الخضروات السابقة كل نوع علي حده.

نصفي البطاطس بعد بشرها من المياه وكذلك الكوسة.

نخلط الخضروات المبشورة معا ونضيف ملح وفلفل وجوزة الطيب وزعتر وملعقة النشا التى تعمل على ربط الخضروات ببعضها وعدم تفككها بعد ذلك أثناء القلي.

تشكل الخضراوات علي هيئة أقراص ثم تقلي في معلقتين زيت ذرة علي نار هادئة لحين النضج.

تستخرج على ورق المطبخ، لامتصاص الزيت الزائد، ثم تُقدم مع البقدونس الطازج.

لو أولادكم وبناتكم مش بيحبوا ياكلوا الخضار، يبقى لازم تجربوا معاهم الوصفة الهايلة دى، واللى بسببها هتضمنوا أكلهم لكمية خضار مفيدة جدا ليهم ولصحتهم، وبالهنا.