البلدي يوكل.. جملة قصيرة مفيدة، مشهورة جدا عندنا فى مصر، معناها إن أى حاجة مصرية أصيلة أحب لينا فى الأكل من غيرها.. البط البلدى، والفراخ البلدى وكمان السلطة البلدى.. طريقة تحضير السلطة البلدى سهلة جدا ومش محتاجة مهارة، والمكونات الخاصة بطريقة تحضير سلطة بلدى، رخصية ومتوفرة فى كل بيت فى مصر، احنا فى جوا الحلة هنقول لكم فى نهاية الوصفة على تكاية و اتنين يخلوا طعم السلطة البلدى واوووو جدا.

السلطة البلدى مشهورة جدا فى المحلات، خصوصا محلات الفول والفلافل، ومحلات الأسماك والمأكولات البحرية، وطبعا فى محلات الكبدة وحلويات المدبح، ومن أشهر الحاجات اللى بتتقدم فى المحلات دى، كوباية الويسكى، اللى هى الصوص الناتج من طريقة تحضير سلطة بلدى أصيلة وبنت حلال.. وده هتعرفوه معانا فى وصفتنا اللى أحلى من كل المحلات.

طريقة تحضير سلطة بلدي:

المكونات:

2 حبة طماطم طازج

حبة خيار بلدى طازج

2 ملعقة طعام بقدونس طازج

نصف بصلة مقطعة شرائح (جوليان)

عصير ليمونة

ملعقة شاى خل أبيض

رشة ملح

رشة كمون مطحون

رشة فلفل أحمر حار (حسب الرغبة)

طريقة التحضير:

يتم تقطيع الطماطم والخيار إلى قطع صغيرة متساوية في لحجم، وتقطيع البقدونس لقطع صغيرة بشكل متساوٍ.

فى طبق عميق، نضع الطماطم والخيار بعد تقطيعهم، ونضيف لهم البصل المُقطع شرائح، ثم نبدأ فى إضافة باقى المكونات.

نُضيف الملح والكمون، والخل، والفلفل الحار، وعصير الليمونة، ونقلب جميع التوابل مع المكونات السابقة حتى تمتزج تماما.

لإعطاء الطعم المميز في المحلات للسلطة البلدى، نقوم بإضافة ملعقة كبيرة من ماء المخلل، سواء إذا كان مخلل مشكل، أو أى نوع آخر مثل مخلل الخيار، ونُقلب المكونات جيدا مرة أخرى، ثم نضع السلطة في أطباق التقديم المناسبة وتقدم.

تُقدم السلطة البلدى مع جميع المشويات، وأناوع الكبدة المختلفة، وكذلك مع حلويات المدبح، وغيرها من المأكولات الشعبية المصرية.

أتمنى الوصفة تكون سهلة وتكون عجبتكم، الصوص أو الـ dressing اللى بيتعمل فى أى سلطة هو اللى بيخليها ليها طعم مميز وشهى، اهتموا جدا بعمل الصوصات الخاصة بأنواع السلطة المختلفة عشان تحققوا طعم شهى للأكل، ومتنسوش فى طريقة تحضير سلطة بلدى تضيفوا مية طرشى للطبق عشان توصولوا لطعم المحلات بالظبط، وبالهنا.