المطبخ المكسيكى من أحب المطابخ لقلبى، أو بصراحة هو فى المكانة الأولى بالنسبة لى، تسألونى ليه؟ أقولكم لأنه جذاب جدا جدا، وصفاته كتير منها سهل وسريع التحضير، حراق، وبالرغم من ده طعم اوى.. السلطات فى المكسكيك بيقولوا عليها صلصة، ومن أحلى السلطات وأكثرها شُهرة هى موضوع وصفتنا النهارده. طريقة تحضير سلطة بيكو دى جايو سهلة، وهتلاقوا إنها بتستخدم فى وصفات مكسيكية كتيرة، زى التاكوز Tacos و الناتشوز Nachos، وبتتقدم معاهم باستمرار، وحقيقى بترفع مستوى الطعم لسابع سما.

طريقة تحضير سلطة بيكو دى جايو بتعتمد على إتقان النسب بين المكونات، وده هنعرفه واحنا بنوصف الطريقة، وكمان بتعتمد على البراعة فى تقطيع الطماطم والبصل لقطع صغيرة جدا ومتساوية جدا، ده بيخلى الشكل جذاب للعين وشهى للمعدة.  

طبعا غزو الأسبان للمكسيك غير فى طبيعة المطبخ المكسيكى، وأثر عليه، وهتلاقوا كمان إن التأثير ده، بيظهر جدا فى الفوارق فى استخدامات الوصفات فى المكسيك نفسها، ما بين الشمال والوسط والجنوب، يعنى شمال المكسيك مشهورين بحبهم لوصفات لحوم والأبقار والماعز، أما الجنوب، فمشهورين أكتر باستخدام التوابل والخضراوات. لتفاصيل أكتر عن المطبخ المكسيكى اضــــغط هنــــــا وتعالوا نتعرف سوا على طريقة تحضير سلطة بيكو دى جايو.

طريقة تحضير سلطة بيكو دى جايو:

المكونات:

3 حبات طماطم مُقطعة مكعبات صغيرة

2 حبات فلفل أخضر حار منزوعة البذور ومُقطعة قطعا صغيرة

1/2 بصلة حمراء مُقطعة قطعا صغيرة

2 ملعقة طعام من الكزبرة الطازجة المفرومة

2 حبات عصير ليمون

ملح، فلفل أسود مطحون

2 ملعقة طعام زيت زيتون

طريقة التحضير:

يتم غسل حبات الطماطم جيدا، ثم نقسمها إلى نصفين باستخدام السكين، وبواسطة ملعقة صغيرة، ننزع قلب حباة الطماطم (العصارة) ونتركه جانبا.

بواسطة السكين، نبدأ فى تقطيع الطماطم على شكل قطع صغيرة متساوية فى الحجم، ويراعى أن تكون صغيرة فى الحجم.

نقوم بإضافة البصل والكزبرة إلى الطماطم.

نقوم بتقطيع الفلفل الحار، إلى قطع صغيرة متساوية فى الحجم، ثم نُضيفه إلى قطع الطماطم.

شوفوا طريقة التورتييا  من هنــــــــا

فى طبق عميق مناسب، نبدأ فى تحضير صوص السلطة، حيث نضع زيت الزيتون وعليه عصير الليمون، ثم نضيف حوالى ربع ملعقة صغيرة من الملح، ورشة فلفل أسود، ونخلط المكونات جيدا مع بعضها البعض، حتى تمتزج.

نقوم بوضع الصوص على مكونات سلطة بيكو دى جايو، وبواسطة ملعقة مناسبة، نخلط الصوص جيدا مع المكونات حتى يتم تشربه جيدا على مكونات السلطة.

تُقدم سلطة بيكو دى جايو مع تاكو الدجاج و الناتشوز.

طريقة تحضير سلطة بيكو دى جايو، زى ما شوفتوا سريعة، وإمكانياتها متوفرة فى كل بيت، وحقيقى أنا متأكدة إنها هتعجبكم، ولو كنتم من عشاق الأكل الحار، يبقى متنزعوش البذور من الفلفل الأخضر الحار، عشان تستمتعوا بالشطشطة على آخرها.. ادعمونا بعمل شير لموضوعاتنا لو شايفين إنها بتفيدكم، وبالهنا.