احنا كمصريين لينا شخصية بتميزنا فى كل حاجة، حتى فى تسمية الأشياء، تلاقينا عاملين دماغ لوحدينا، يعنى لما تسأل عن موديل للعربية المرسيدس، تلاقى اللى يقولك "زلموكة"، "تمساحة"، "عيون صفية"، كل تسمية من دول بالنسبة لنا كمصريين تعريف بموديل من موديلات العربية المرسيدس، بس من الكتالوج المصرى بتاعنا، يعنى بالتاتش بتاعنا، ولما تحب تسأل عن أسامى الأكل، مينفعش متبقاش عارف التسمية المصرى ليها، يعنى أوراك الدجاج المخلية المحشية، اسمها عندنا "حمام كداب"، وصينية اللحمة بالخضار فى الفرن، اسمها "ورقة لحمة" كله بالتاتش المصرى مختلف ومميز، إنما غالبا الوصفة بتبقى زى ما هى معروفة فى كل دول العالم، لكن الاسم مصرى صرف.

وصفتنا النهاردة "ورقة اللحمة"! ورقة لحمة؟! اللى أعرفه عنها إنها كانت بتظهر فى أفلام زمان الأبيض والأسود، لونها بنى وليها سمك، كانوا زمان أيام العز وأكل البط والوز، بيروحوا يشتروا اللحمة من الجزار، كان يلف لهم اللحمة فى ورق لحمة، ليه شكل كده ومحترم وشياكة، حتى الفواكه والخضار وكل لوازم البيت زمان كانت بتتلف فى ورق اللحمة، كان ورق قوى وبيستحمل، شوفوا كده أفلام نجيب الريحانى، والا أنور وجدى، وهمه راجعين من "الدُكان" شايلين طلبات البيت، هتلاقوا الحاجة كانت ملفوفة لهم فى ورق اللحمة، دلوقتى الدنيا كلها ماشية بنظام الأكياس البلاستيك، اللى أغلب الدراسات كل يوم تكتشف ضرر كبير ليها على صحة الإنسان! كان غريب جدا بالنسبة لى إنى أعرف إن وصفة اللحمة بالخضار فى ورق الفويل، اسمها ورقة لحمة، الناس اللى بتقعد تفنن فى التسمية دول، ناس فعلا رايقة ودماغها عالية.. الغريب إن والدتى لما سألتها هو إيه ورقة اللحمة فى طرق الطبخ؟ قالت لى "معرفش"! الواحد(ة) لو مكنش يعمل تحديث لمُسميات الأكل الحديثة فى الشارع المصرى يتوه ويبقى دقة قديمة، وسوقه فى الأكل يقف ويتعطل. هنروح مع بعض دلوقتى للمكونات وطريقة التحضير اللى إن شاء الله مفيش أسهل منها، والوصفة دى بتكون هايلة خصوصا فى العزومات وفى العيد الكبير.

المكونات: 

كيلو لحم مكعبات أو بفتيك
2 حبة بصل متوسطة الحجم

2 حبة بطاطس (بطاطا) متوسطة الحجم

2 حبة طماطم متوسطة الحجم

2 حبة كوسة متوسطة الحجم

2 حبة جزر متوسطة الحجم

2 ملعقة طعام خل أبيض

2 ملعقة شاى ملح

1/2 ملعقة شاى فلفل أسود مطحون

1/2 ملعقة شاى بودرة بصل

1/2 ملعقة شاى ببريكا

1/2 ملعقة شاى كزبرة ناشفة مطحونة

1/2 ملعقة شاى حبهان (هيل) مطحون (حسب الرغبة)

1/2 ملعقة شاى زعتر ناشف

ورق قصدير (فويل)

ورق زبدة

طريقة التحضير:

نقوم بغسل اللحم جيدا بالماء ثم نقوم بتصفيته تماما من الماء الزائد بعد عملية الغسيل.

نقوم بغسل جميع الخضراوات جيدا بماء الصنبور، ثم نبدأ فى تقطيع الخضراوات على شكل مكعبات أو على أشكال دائرة أو طولية حسب الرغبة، ونقوم بتتبيلها بالملح والفلفل والتوابل المختلفة.

نضع ورق فويل ومن الداخل نضع بنفس مقاسه ورق زبدة، ثم نضع البصل وجميع الخضراوات التى قمنا بغسلها وتقطيعها، ثم نضع اللحم ونرش عليه التوابل المختلفة والملح والفلفل والخل الأبيض الذى سيعطيه مذاقا رائعا، وبإحكام، نقوم بغلق ورق الفويل على جميع المكونات استعدادا لإدخالها فى الفرن.

نضع ورقة اللحمة فى صينية ألومنيوم مناسبة، ونضع بها حوالى نصف لتر من ماء الصنبور، ليعمل كحمام مائى للصينية ويساعد على التسوية الجيدة، ويساعد كذلك على عدم تبخر السوائل من ورقة اللحمة وبالتالى جفاف قطعة اللحم وتحولها لقطعة ناشفة غير طرية وغير محببة فى الأكل.

نقوم بتحمية الفرن أولا على درجة حرارة 200°م، لمدة ربع ساعة، ثم نُدخل الصينية، ونُراعى أن توضع الصينية على الرف الأوسط، ونتركها فى الفرن لمدة ساعة تقربيا، قبل أن نكشف على مدى التسوية التى وصلت إليها قطع اللحم، فإذا لم تكن كاملة التسوية والنضج، نتركها مدة نصف ساعة أخرى، ثم نستخرجها.

بعد استخراج الصوانى من الفرن، نتركها ربع ساعة لتهدأ، ثم نقوم بتقديمها فى طبق مناسب فى الحجم، ويُفضل أن تُقدم كما هى فى الورق الفويل. يمكن عمل الأزر المصرى أو البسمتى بمختلف الطرق ليقدم مع ورقة اللحمة.

إن شاء الله وصفتنا تكون عجبتكم، وتقدرى تعملى جنب ورقة اللحمة، ممبار وجلاش بالجبنة واللحمة المفرومة، تقدرى كمان تقدمى معاها سمبوسك كفاتح للشهية، والدنيا تبقى احلى مع طبق سلطة التومية والزبادى بالخيار. وبألف هنا... متنسوش تبعتوا لنا صور الأكل بتاعكم على صفحتنا الرسمية على الفيسبوك.