طريقة تحضير باذنجان مخلل


أنا اتولدت من النهاردة، أيوه لما أكلت باذنجان مخلل كان يوم ميلادى الحقيقى.. ههههههه، المصريين شعب يحب الأكلة الحِرشَة، ميملاش عينة صنف واحد بس على الغدا، لازم تنوع له فى الأصناف، وتبقى عملت معاه الواجب الصح لما تحط له طبق الباذنجان المخلل، هيحطك جوا عنيه ويحبك اكتر من أى وقت تانى! أنا والدى بيحب الحوادق جدا، وبيعشق المخللات وبيعرف يخلل كل الأصناف اللى بتخلل فى الدنيا، وكان بيعمل لنا ده بنفسه فى البيت، برطمانات الزيتون الأخضر (التفاحى)، والليمون المخلل العادى والمعصفر، والخيار المخلل، والقرنبيط، ياااااااااااااه متعدوش، بس الباذنجان المخلل، كان تقريبا يوم ويوم على سفرة الأكل فى بيتنا موجود، بابا بيعشق الحادق بطريقة رهيبة، وللأسف أنا واخواتى طلعنا copy-paste منه فى الحكاية دى، بقول للأسف لأن ده أثر سلبيا بعد كده على صحتى ونسبة الأملاح ارتفعت جدا فى جسمى، والدكتور قالى لو مغيرتيش أسلوبك فى الاكل وخصوصا مع الاملاح والدهون، هتتحولى بكل سهولة لمريضة ضغط، طبعا كان لازم أعمل وقفة قوية مع نفسى، وأهتم بصحتى زى ما بهتم بجودة وجمال أكلى، وأمنع نفسى من كل المخللات تماما، ومبقتش بعملها ولا بشتريها إلا فى أضيق أضيق الحدود، لكن ده ميمنعش إنى أقول لكم وصفة الباذنجان المخلل، وفى نفس الوقت أقول لكم حاسبوا على صحتكم من الإفراط فى تناول المخللات والأملاح الزايدة فى الأكل، وخصوصا لو عندكم أطفال، بلاش تعودوهم على عادات غذائية تضرهم فى المستقبل لما يبقوا شباب ورجالة وبنات فى سن النضج، ناكل كل حاجة أيوه بس بالمعقول، وبحساب، من غير إسراف لا فى الحلو ولا فى الحادق!

الباذنجان المخلل يعتبر طبق فاتح للشهية، بيتعمل ويتقدم مع أى وصفة تانية على سفرة الغداء، بينفع جدا مع وصفات المأكولات البحرية، سمك، وسبيط، وجمبرى، وغيرها كتير، بينفع جدا مع اليوم اللى فيه محشى، خصوصا لو محشى مشكل، بينفع مع المشاوى كلها وبالأخص مع الكفتة المشوية، طبق فاتح للشهية من الدرجة الأولى، يخليك تاكل أكتر من طاقتك، وتملا المعدة لحد ما تبقى خلاص هتنفجر، وأنت مستمر في جريمة الأكل زى ما أنت، على وضعك. يلا بينا سوا نروح على مكونات ومقادير وطريقة عمل الباذنجان المخلل، وأحب بس أوضح إن المقادير دى خاضة للذوق المعتدل، اما اللى بيحبوا ملح زيادة جدا وشطة زيادة جدا أو اللى بيحبوا طعم الخل يكون أوفر شوية في الباذنجان، يزدوا اللى بيحبوه وربنا يستر عليهم!

طريقة عمل باذنجان مخلل:

 

المكونات:
كيلو باذنجان عروس 
2 حبة فلفل رومى أخضر
1 حبة فلفل أخضر حار
ثوم مفروم (رأس ثوم كاملة)
4 ملاعق طعام خل أبيض
ملعقة طعام ملح
ملعقة صغيرة كزبرة ناشفة مطحونة
2 ملعقة صغيرة كمون
ملعقة طعام عصير ليمون
حبة طماطم مقطعة مكعبات صغيرة
ملعقة طعام بقدونس مفروم
ملعقة طعام زيت زيتون

 

 

طريقة التحضير:

 

 

فى مقلاة ساخنة بها حوالى 3 ملاعق كبيرة من زيت القلى، يتم وضع حبات الباذنجان المغسول والمجفف، وتترك على نار هادئة إلى متوسطة، مع مراعاة تقليب الباذنجان على الوجهين حتى يصل القلب إلى التسوية المطلوبة. تستغرق التسوية حوالى 20 دقيقة تقريبا، ويراعى تغطية المقلاة أثناء التسوية.

 

 

أثناء تسوية الباذنجان، يتم تحضير التتبيلة، وذلك بخلط جميع المكونات السابقة، باستثناء مكعبات الطماطم والبقدونس المفروم، فى الخلاط أو الكبة، حتى تمتزج تماما مع بعضها البعض وتعطى قواما متماسكا.

 

 

يتم استخراج الباذنجان من المقلاة وعمل فتحة طولية به باستخدام سكين أو ملعقة، ثم يتم حشو كل قطعة بالتتبيلة السابقة.

 

 

بعد الانتهاء من الحشو توضع مكعبات الطماطم بداخل كل حبة باذنجان، ثم يُرش الباذنجان بالقليل من زيت الزيتون ويتم التزيين باستخدام البقدونس المفروم.

يُمكن عمل نفس الخطوات السابقة بالضبط، ولكن مع تغيير بسيط، وهو سلق الباذنجان بدلا من قليه فى الزيت، ويُراعى أثناء السلق ألا تصل حبات الباذنجان لتسوية عالية جدا فى السلق حتى لا تهترئ وتفقد شكلها وقوامها، وبعد السلق تستخرج ويتم حشوها بالخلطة الموضحة.

إن شاء الله الوصفة تكون سهلة، جربوها وبالهنا.